ސްޓެލްކޯގެ ފަސް އަހަރުގެ ސްޓެރެޓެޖިކް ޕްލޭން އިފްތިތާހުކޮށްފި
ކުރިއަށް އޮތް ފަސް އަހަރަށް ސްޓެލްކޯއިން ކަނޑައެޅި ސްޓްރެޓީޖިކް އެކްޝަން ޕްލޭން އިފްތިތާހުކޮށްފި އެވެ.
2028 ވަނަ އަހަރާ ހަމަައަށް ސްޓެލްކޯއިން ހާސިލުކުރަން ބޭނުންވާ ލަނޑުދަނޑިތައް ހިމަނައިގެން ތައްޔާރުކުރި އެ އެކްޝަން ޕްލޭން އިފްތިހާހުކޮށްދެއްވީ މިއަދު ސްޓެލްކޯގައި އެކަމަށް ބޭއްވި ހާއްސަ ރަސްމިއްޔާތެއްގައި އެ ކުންފުނީގެ މެނޭޖިން ޑިރެކްޓަރު ހުސެއިން ފަހުމީ އެވެ.
ސްޓެލްކޯއިން ބުނީ މިއީ ފަހުމީ ސްޓެލްކޯގެ އެމްޑީގެ މަގާމާ ހަވާލުވެވަޑައިގަތުމަށްފަހު، ރާއްޖެއަށް އަންނަމުން މިދާ ތަރައްގީއާއި ތަހުޒީބާއި، ކުރިއެރުންތަކާއި އެއް ހަމަޔަކަށް ކަރަންޓާއި، ފެނާއި ނަރުދަމާގެ ސިނާއަތް ގެންދިއުމަށް ކުރެވެން ހުރީ ކޮން މަސައްކަތްތަކެއްތޯ ބައްލަވައި، އެ މަސައްކަތްތައް ބާރު ސްޕީޑެއްގައި ކުރެވިގެންދާނެ މަގުކޮށްޓެވުމަށް ފެއްޓެވި މަސައްކަތްޕުޅުގެ ތެރެއިން، ކުންފުނީގެ ބޯޑުގެ ހަރުދަނާ ލަފަޔާއި އިރުޝާދާއި އެކުގައި ތައްޔާރުކޮށްފައިވާ އެކްޝަން ޕްލޭނެއް ކަމަށެވެ.
އެ އެކްޝަން ޕްލޭން އެކުލަވާލުމުގައި އަސާސްތަކެއްގެ ގޮތުގައި ބަލާފައިވަނީ ހިދުމަތުގެ ކުރިއެރުމާއި، ދެމެހެއްޓެނިވިކަން ކަށަވަރުކުރުމާއިއެކު، ރައްޔިތުންގެ އިތުބާރާއި ޔަގީންކަން ކަށަވަރު ކުރުން ކަމަށް ސްޓެލްކޯއިން ބުންޏެވެ.
އެ އެކްޝަން ޕްލޭންގައި އެކުލަވާލެވިފައިވާ ފްރޭމްވަރކްގައި ފަސް ސްޓްރެޓިޖިކް އޮބްޖެކްޓިވް، 19 ސްޓްރެޓިޖިކް ގޯލް، 55 ޓާގެޓް އަދި 96 އެކްޝަން ކަނޑައަޅާފައިވެ އެެވެެެ.
އަދި ސްޓެލްކޯގެ ކޮންމެ ޑިޕާޓްމަންޓަކަށްވެސް އެކްޝަންތަކަކާއި ޓާގެޓްތަކެއް ކަނޑައެޅިފައިވާނެ ކަމަށާއި އަދި މި ޓާގެޓްތައް ހާސިލުވޭތޯ ބެލުމަށް މޮނިޓާކުރެވޭނެ ނިޒާމެއް ޤާއިމްކުރެވިފައިވާ ކަމަށް ސްޓެލްކޯއިން ބުންޏެވެ.
ސްޓެލްކޯގެ އެމްޑީ ފަހުމީ ވިދާޅުވީ ތައުލީމީ ޒުވާނުން ތައްޔާރު ކުރި އެ އެކްޝަން ޕްލޭނަކީ މުސްތަގުބަލް ކަނޑައެޅުމުގެ ހަރުދަނާ ބިންގަލެއް ކަމަށެވެ.
"މިފަދަ ޕްލޭނެއް އޮތުމުން ކުންފުނި ހިންގުމަށް އިތުރަށް ފަސޭހަވެ، ކުންފުނީގެ ހުރިހާ ދާއިރާއަކުންވެސް އެއް އަމާޒަކަށް މަސައްކަތްކުރެވި، ހިންގުން ހަރުދަނާކުރެވި، ކުންފުނީގެ މާލިއްޔާއިން ކުރެވޭ ހަރަދުތަކަކީ ކުންފުނިން އެކަށައަޅާފައިވާ ލަނޑުދަނޑިތަކަށް ވާސިލުވުމަށް މަގުފަހިވެގެންދާ ގޮތަށް ކުރެވޭ ހަރަދުތަކެއް ކަމުގައި ވެގެންދާނެ. އަދި ކުންފުނިން ފޯރުކޮށްދޭ ހިދުމަތްތަކުގެ ފެންވަރު މަތި ކުރެވި، ރައްޔިތުންނާއި ކުންފުންޏާއި ދެމުދު އޮންނަ އިތުބާރާއި ގުޅުން އިތުރަށް ރަނގަޅު ކުރެވިގެންދާނެ" އޭނާ ވިދާޅުވި އެވެ.
