ޗައިނާއަށް މަސް އެކްސްޕޯޓްކުރަން ފަށަން ޗައިނާގެ ކަސްޓަމްސްއާއެކު އެއްބަސްވުމެއް
ޗައިނާއަށް މަސް އެކްސްޕޯޓްކުރަން ފަށަން އެއްބަސްވުމެއްގައި ސޮއިކޮށްފި އެވެ.
ޗައިނާއަށް ކަނޑުމަހުގެ ބާވަތްތަކާއި ސީފުޑްގެ ބާވަތްތައް އެކްސްޕޯޓުކުރެވެނީ ވަކި ހާއްސަ މިންގަނޑުތަކެއް ފުރިހަމަކުރުމުންނެވެ.
އެހެންވެ ޗައިނާއަށް އެކްސްޕޯޓްކުރާ މޯލްޑިވިއަން ވައިލްޑް އެކްވަޓިކް ޕްރޮޑަކްޓްސް އިންސްޕެކްޝަން އަދި ކަރަންޓީން ކުރުމުގެ ޝަރުތުތައް ކަނޑައެޅުމަށް ޗައިނާގެ ޖެނެރަލް އެޑްމިނިސްޓްރޭޝަން އޮފް ކަސްޓަމްސްއާ ޗައިނާ އާއި އެކު މޯލްޑިވްސް ފުޑް އެންޑް ޑްރަގް އޮތޯރިޓީ އިން ޕްރޮޓޮކޯލެއްގައި މިއަދު ވަނީ ސޮއިކޮށްފަ އެވެ.
އެ އެއްބަސްވުމުގައި އެމްއެފްޑީއޭ ގެ ފަރާތުން ސޮއިކުރެއްވީ ޑެޕިއުޓީ މިނިސްޓަރު އިސްމާއީލް ޒާހިރު އެވެ.
ޗައިނާގެ ފަރާތުން ސޮއިކުރެއްވީ ޖެނެރަލް އެޑްމިނިސްޓްރޭޝަން އޮފް ކަސްޓަމްސް އޮފް ޗައިނާގެ ވައިސް މިނިސްޓަރ ވޫ ހައިޕިންގް އެވެ.
މިއަދު ސޮއިކުރި އެއްބަސްވުމުގެ ސަބަބުން ރާއްޖެއާއި ޗައިނާއާ ދެމެދުގައި ވިޔަފާރި ކުރުމަށް މަގުފަހިވެގެންދާނެ އެވެ.
އެގޮތުން ދިވެހި ވިޔަފާރިވެރިންނަށް މިހާރު އެކްސްޕޯޓް ނުކުރެވޭ މަހުގެ ބާވަތްތައް އެކްސްޕޯޓް ކުރުމުގެ ފުރުސަތު ލިބިގެންދާނެ އެވެ. އޭގެ ތެރޭގައި ފަރުމަހާއި، ހުއިފިލަނޑާގެ ބާވަތްތައް ހިމެނެ އެވެ.
އެ ރަސްމިއްޔާތުގައި ޗައިނާ އިން ރާއްޖެއަށް ކަނޑައަޅުއްވާފައި ހުންނަވާ އެމްބެސެޑާ ވިދާޅުވީ މިއީ ދެގައުމަށްވެސް ފައިދާކުރުވަނިވި އެއްބަސްވުމެއް ކަމަށެވެ.
އެގޮތުން މަސްވެރިކަމުގެ ސިނާއަތަށާއި ގައުމުގެ އިގްތިސާދަށް ހެޔޮ ބަދަލެއް އަންނާނެކަން ދެގައުމުން ވެސް ފާހަގަކޮށްފައިވެ އެވެ.
"އެފްޓީއޭއަށްވެސް އަންނަ އަހަރު ކުރީކޮޅު އަމަލުކުރަން ފަށާއިރު، މިއެއްބަސްވުމާއެކު ރާއްޖޭން ޗައިނާއަށް މަހުގެ ބާވަތްތައް އެކްސްޕޯޓުކުރުމަށް ފަސޭހަވެގެންދާނެ،" ސަފީރު ވަންގ ލީޝިން ވިދާޅުވި އެވެ.
