މިހާރުވެސް 100 އަށްވުރެ ގިނަ މަޝްރޫއު ކުރިއަށް އެބަދޭ: އެޑިއުކޭޝަން މިނިސްޓަރު
ރާއްޖޭގެ އެކި ސަރަހައްދުގައި އެޑިއުކޭޝަން މިނިސްޓްރީން 100 އަށްވުރެ ގިނަ މަޝްރޫއެއް ކުރިއަށްގެންދާ ކަމަށް އެޑިއުކޭޝަން މިނިސްޓަރު ޑރ. އިސްމާއީލް ޝަފީއު މިއަދު ވިދާޅުވެއްޖެ އެވެ.
ގަލޮޅު އުތުުރު ދާއިރާގެ އެމްޑީޕީ މެންބަރު މުހައްމަދު އިބްރާހީމް (ކުޑޫ) ކުރައްވާ ސުވާލަށް ޖަވާބު ދެއްވުމަށް މިނިސްޓަރު ޝަފީއު ވަނީ ރައްޔިތުންގެ މަޖިލީހުގެ މިއަދު ޖަލްސާ އަށް ހާޒިރުވެވަޑައިގެންފަ އެވެ.
ވަޒީރާ ސުވާލުކުރުމުގެ ފުރުސަތުގައި ހިތަދޫ ދެކުނު ދާއިރާގެ މެންބަރު އަދި އެމްޑީޕީގެ ޕީޖީ ލީޑަރު އިބްރާހިމް ނާޒިލް ވަނީ ހިތަދޫ ސަރަފުއްދީން ސްކޫލާއި އައްޑޫ ހައި ސްކޫލުގެ މަލްޓިޕާޕަސް ހޯލާއި ރިސޯސް ބިލްޑިންގެ މަސައްކަތާ ގުޅޭ ގޮތުން ޝަފީއުއާ ސުވާލުކޮށްފަ އެވެ.
އެ ސުވާލުގެ ޖަވާބުގައި މިނިސްޓަރު ވިދާޅުވީ ރާއްޖޭގެ ހުރިހާ ސަރަހައްދެއްގައި އެޑިއުކޭޝަނުން މަޝްރޫއުތަކެއް ކުރިއަށްދާ ކަމަށާއި އެކަމުގެ ސީދާ ތަފްސީލު ލިބިވަޑައިގެންފައިނުވާ ކަމަށެވެ. އެކަމަކު 100 އަށްވުރެ ގިނަ މަޝްރޫއު ކުރިއަށްދާ ކަމަށް ވިދާޅުވި އެވެ.
"މިނިސްޓްރީ އޮފް އެޑިއުކޭޝަނުން އެބަ ގެންދަވާ ގާތްގަނޑަކަށް 111 ވަރަކަށް ޕްރޮޖެކްޓްސް"
ވިދާޅުވީ މަޝްރޫއުތަކުގެ މައުލޫމާތު ޓެކްސްޓް މެސެޖެއްގެ ޒަރިއްޔާއިން، ނާޒިލްއާ މިއަދު ހިއްސާކުރައްވާނެ ކަމަށެވެ.
މިނިސްޓްރީން މި ވަގުތު ކުރިއަށްގެންދާ އެންމެ ބޮޑު މަޝްރޫއު އަކީ ސަރުކާރުން ހިންގާ ސްކޫލްތައް ފިނިކުރުމަށްޓަކައި ސަރުކާރުން އިސްނަގައިގެން ކުރިޔަށް ގެންދާ "ކޫލް ސްކޫލް ޕްރޮޖެކްޓް" އެވެ. މިދިޔަ އަހަރުގެ ޖޫން މަހު އިފްތިތާހުކުރި އެ މަޝްރޫއު ނިމުމުން ސްކޫލްތަކުގެ ކަރަންޓު ބިލަށް ހޭދަވާ ވަރަށްވުރެ އިތުރަށް ހަރަދުވެގެން ދާނީ 38 އިންސައްތަ ކަމަށް މިނިސްޓަރު ޝަފީއު މީގެ ކުރިން ވިދާޅުވެފައިވެ އެވެ.
Ads by STO
