ސިނގިރެޓް ފޮއްޓެއްގެ އަގު 250 އިން މައްޗަށް
ދުންފަތުގެ ބާވަތްތަކުން ނަގާ ޓެކްސް ބޮޑުކުރުމުން ސިނގިރެޓް ފޮއްޓެއްގެ އަގު ބޮޑުތަނުން އުފުލިއްޖެ އެވެ.
ރާއްޖެ އެތެރެކުރާ ދުންފަތުގެ ބާވަތްތަކުން ނަގާ ޓެކްސް ބޮޑުކުރީ މި މަހުގެ އެއް ވަނަ ދުވަހުން ފެށިގެންނެވެ.
އެ އާއެކު ކޮންމެ ސިނގިރެޓް އަދި ބިޑި ފަދަ ބާާވަތްތަކުން މިހާރު އަށް ރުފިޔާގެ ޓެކްސް ނަގަ އެވެ. އަދި ވޭޕްގައި ބޭނުންކުރާ ފްލޭވާތަކުން ވެސް ކޮންމެ މިލިލީޓަރަކަށް އަށް ރުފިޔާގެ ޓެކްސްއެއް ނަގަ އެވެ.
"ދެން" އާ ވާހަކަ ދެއްކި ފިހާރައެއް ހިންގާ މީހަކު ބުނި މިހާރު މާލޭގައި ސިނގިރެޓް ފޮއްޓެއްގެ އަގު އުޅެނީ 250 ރުފިޔާއިން މަތީގައި ކަމަށެެވެ.
އޭނާ ބުނީ ކުރިން ސިނގިރެޓް ކާޓަންއެއް ވިޔަފާރިވެރިން ގަންނަނީ 950 އެއްހާ ރުފިޔާއަށް ކަމަށާއި ނަމަވެސް މިހާރު ކާޓަންއެއް ގަންނަން ލިބެނީ ވެސް 2،200 އެއްހާ ރުފިޔާއަށް ކަމަށެވެ.
ދުންފަތުގެ ބާވަތްތަކުން ނަގާ ޓެކްސް ބޮޑުކުރިއިރު، ވޭޕްގެ އާލާތްތަކާއި ފްލޭވާތައް މި މަހުގެ 15 ވަނަ ދުވަހުން ފެށިގެން ރާއްޖެ އެތެރެކުރުން މަނާވާނެ އެވެ. އެކަމާ ބެހޭ ބިލު ދިރާސާ ކުރުމުގެ މަސައްކަތް ނިންމައި މިއަދު ހަވީރު ބޭއްވި އިޖުތިމާއީ ކޮމިޓީގެ ބައްދަލުވުމުގައި ވަނީ ފާސްކޮށްފަ އެވެ.
ސަރުކާރުން ނިންމާފައި ވަނީ ވޭޕްގެ އުފެއްދުންތައް އަންނަ މަހުގެ 15 ވަނަ ދުވަހުން ފެށިގެން ވިއްކުން މަނާކުރާ ގޮތަށެވެ.
Ads by STO
