އެޗްޑީސީން ސޯޝަލް ހައުސިންއަށް ހާއްސަކޮށް 2،100 ހައުސިން ޔުނިޓް އާއެކު އިތުރު ޕްރޮޖެކްޓުތަކެއް
ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ސޯޝަލް ހައުސިންއަށް ހާއްސަކޮށް އާ ޕްރޮޖެކްޓުތަކެއް ލޯންޗުކޮށްފި އެވެ.
ހުޅުމާލޭ ސެންޓްރަލް ޕާކުގައި ރޭ ބޭއްވި ހާއްސަ ރަސްމިއްޔާތުގައި، "ޓްރާންސްފޯމިން ޓުމޯރޯ: ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ކީ ޕްރޮޖެކްޓްސް" ލޯންޗްކޮށްދެއްވީ، އިކޮނޮމިކް ޑިވެލޮޕްމަންޓް އެންޑް ޓްރޭޑް، މުހައްމަދު ސައީދެވެ.
ހުޅުމާލޭގައި ހިންގާ އިތުރު ބޯހިޔާވަހިކަމުގެ މަޝްރޫއުތަކާއި ރާއްޖެއަށް މުޅިން އަލަށް ތައާރަފުކުރެވޭ މަޝްރޫއުތައް ހިމެނޭހެން ޖުމްލަ 15 މަޝްރޫއެއް ރޭ ވަނީ ލޯންޗުކޮށްފަ އެވެ. އޭގެ ތެރޭގައި ހިމެނޭ ބައެއް މަޝްރޫއުތަކުގެ މޮޑެލްތައް ވެސް ދައްކާލައިފި އެވެ.
ރަސްމިއްޔާތުގައި ލޯންޗުކުރެވުނު އައިލް އެޑްވެންޗާ ޕާކުގެ ޑިޒައިން ކޮންސަލްޓަންސީ އަދި ތަނުގެ އޮޕަރޭޝަނަށް މުހިންމު ތަމްރީނުތައް ދިނުމާ ގުޅޭ ފަހުމުނާމާ (އެމްއޯޔޫ) އެއްގައި ވެސް ސޮއިކުރި އެވެ. މި ފަހުމުނާމާގައި ސޮއިކުރެއްވީ އެޗްޑީސީގެ އެމްޑީ ފަޒުލް ރަޝީދު އަދި ޑޭވިޑް ޕިއެރިސް ސިޓީ ޑިވޮލަޕްމަންޓްސް ޕްރައިވެޓް ލިމިޓެޑްގެ ޑިރެކްޓަރެވެ.
އެޗްޑީސީން ލޯންޗުކުރި މި މަޝްރޫއުތަކަކީ ރައީސް ޑރ. މުހައްމަދު މުއިއްޒުގެ މެނިފެސްޓޯ އާ އެއްގޮތަށް، ހުޅުމާލެ ހިމެނޭހެން އެޗްޑީސީގެ ބެލުމުގެ ދަށުގައި އޮތް ރަށްތައް ތަރައްގީ ކުރުމަށް ލޯންޗުކުރެވިގެންދިޔަ މަޝްރޫއުތަކެކެވެ. އެ ކޯޕަރޭޝަނުން ބުނީ މި މަޝްރޫއުތަކުގެ މަގުސަދަކީ ދިވެހިންގެ ދިރިއުޅުމުގެ ފެންވަރު ރަނގަޅުކޮށް، ރާއްޖޭގެ އިގުތިސޯދަށް ރަނގަޅު ބަދަލެއް ގެނައުން ކަމަށެވެ.
އެގޮތުން، މި ދައުރުގެ ތެރޭގައި ބޯހިޔާވަހިކަމުގެ މައްސަލަ ހައްލުކުރުމުގެ ރިޔާސީ ވައުދުފުޅާ އެއްގޮތަށް، ލޯންޗުކުރެވުނު މަޝްރޫއުތަކުގެ ތެރޭގައި ހުޅުމާލޭގައި ހިންގޭ އިތުރު ދެ ސޯޝަލް ހައުސިންގެ މަޝްރޫ އާއި ރޯ ހައުސް މަޝްރޫއެއްގެ އިތުރުން ބިންވެރިޔާ ސްކީމުން ގޯތި ލިބިފައިވާ ފަރާތްތަކަށް ހާއްސަކޮށްގެން ކުރިއަށްގެންދާ ޕްރީ ފެބް ގެތަކުގެ މަޝްރޫއު ހިމެނެ އެވެ.
އެޗްޑީސީން ބުނި ގޮތުގައި އެ ކޯޕަރޭޝަނުން އަބަދުވެސް މަސައްކަތް ކުރަނީ ރައްޔިތުން އެދޭފަދަ ތަރައްގީ އާއި ޒަމާނީ ހިދުމަތްތައް ތައާރަފުކޮށް، ދިރިއުޅުމުގެ ފެންވަރު ރަނގަޅު ކުރުމަށް ކަމުގަ އެވެ.
ރަސްމާލެ ޕްރޮޖެކްޓް - ރާއްޖޭގެ ފުރަތަމަ އިކޯ ސިޓީ
މާލޭ ސަރަހައްދަށް ކުރިމަތިވެފައިވާ ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދުމަށް ރައީސްގެ ލީޑަޝިޕްގެ ދަށުން ރަސްމާލެ މަޝްރޫއު ފެށީ މިދިޔަ އަހަރުގެ ޑިސެމްބަރު މަހުގެ ތެރޭގަ އެވެ. ބިމުގެ ގޮތުން ހުޅުމާލެއަށް ވުރެ ތިން ގުނަ ބޮޑު މި ޕްރޮޖެކްޓަކީ 325،000 މީހުންގެ އާބާދީއަށް ދިރިއުޅުމުގެ ފަސޭހަތައް ހޯދައި ދިނުމަށް ތަރައްގީކުރާ ޕްރޮޖެކްޓެކެވެ. މި ޕްރޮޖެކްޓުގެ ދަށުން 65،000 ހައުސިން ޔުނިޓު ތަރައްގީ ކުރުމަށް ވަނީ ހަމަޖެހިފަ އެވެ. މި މަޝްރޫއު ޝެޑިއުލާ އެއްގޮތަށް ކުރިއަށް ގެންގޮސް، ރައީސްގެ ރިޔާސީ ވައުދުފުޅާ އެއްގޮތަށް މި ދައުރުގައި ބޯހިޔާވަހިކަމުގެ މައްސަލައަށް ހައްލު ހޯދައިދެވޭނެ ކަމަށް އެޗްޑީސީން ބުނެ އެވެ.
ރޯ ހައުސް - މޮޑާން ކަނެކްޓެޑް ހޯމްސް، (ހުޅުމާލެ)
މިއީ ރައީސްގެ މެނިފެސްޓޯގައި ކަނޑައަޅާފައިވާ ގޮތަށް ހުޅުމާލެ ފޭސް ދޭއްގައި މުޅިން އަލަށް އަޅާ ރޯ ހައުސްތަކެކެވެ. މި މަޝްރޫއުގެ ދަށުން 32 ޔުނިޓް އަޅާނެ އެވެ. މި ޕްރައިވެޓް ރޯ ހައުސްތައް ތަރައްގީ ކުރުމަށް ހަމަޖެހިފައި ވަނީ އެކްސްކްލޫސިވް ކްލަބް ހައުސްތަކާއި ޕޫލް އަދި އެންމެފަހުގެ ޒަމާނީ ވަސީލަތްތަކާ އެކުގަ އެވެ. އެޗްޑީސީން ބުނި ގޮތުގައި މިއީ، ހަމައެކަނި ބޯހިޔާވަހިކަމުގެ މައްސަލަ ހައްލުކުރުމަށް އެޅޭ ފިޔަވަޅެއްގެ އިތުރުން ވަޒީފާގެ ފުރުސަތުތައް ފަހިވެ، ލޯކަލް އިގުތިސޯދު ހަރުދަނާވެ އަދި އާންމުންގެ ފުދުންތެރިކަން އިތުރުވެގެންދާނެ މަޝްރޫއެއް ކަމުގަ އެވެ.
ސޯޝަލް ހައުސިން ޕްރޮޖެކްޓްސް - (ހުޅުމާލެ)
ބޯހިޔާވަހިކަމުގެ މައްސަލަ ހައްލުކުރުމުގެ ރިޔާސީ ވައުދުފުޅާ އެއްގޮތަށް، ހުޅުމާލޭގައި އިޖުތިމާއީ ބޯހިޔާވަހިކަމުގެ އިތުރު ދެ މަޝްރޫއު ކުރިއަށްގެންދިއުމަށް މިވަނީ ނިންމާފަ އެވެ. މި ދެ މަޝްރޫއުގެ ދަށުން ޖުމްލަ 2،100 ހައުސިން ޔުނިޓް ހުޅުމާލޭގައި ގާއިމުކުރާނެ އެވެ. އެއީ ދެ ކޮޓަރި އަދި ތިން ކޮޓަރީގެ ސޯޝަލް ހައުސިން އެޕާޓްމަންޓްތަކެކެވެ. މި މަޝްރޫއުގެ ތެރެއިން، ދިވެހި ވިޔަފާރިތަކަށް ފުރުސަތު ލިބޭ ގޮތަށް ކޮމާޝަލް ޔުނިޓުތައް ވެސް ގާއިމުކުރުމަށް ވަނީ ނިންމާފަ އެވެ.
މޮޑާން ޕްރީފެބް ހޯމްސް - އިނޮވޭޓިވް އަދި ސަސްޓެއިނަބަލް ލިވިން (ހުޅުމާލެ)
ރާއްޖޭގެ އިމާރާތްކުރުމުގެ އިންޑަސްޓްރީއަށް އިނޮވޭޓިވް ސޮލިއުޝަނެއްގެ ގޮތުގައި ޒަމާނީ ޕްރީފެބް ގެތައް ތައާރަފުކުރަން ވަނީ ނިންމާފަ އެވެ. މިއީ ބިންވެރިޔާ ހައުސިން ސްކީމުން ގޯތި ލިބިފައިވާ ފަރާތްތަކަށް އަމާޒުކޮށްގެން ހިންގާ މަޝްރޫއެކެވެ. މޮޑާން ޕްރީފެބް ގެތަކަކީ ޑިޒައިން ކަސްޓަމައިޒް ކުރެވޭ ގޮތަށް، އަވަހަށް އަދި ކުޑަ ހަރަދަކުން އިމާރާތް ކުރެވޭނެ ގެތަކެކެވެ. ސަރުކާރުން މި މަހު ފަސް ވަނަ ދުވަހު އިފުތިތާހުކުރި "ހިޔާވަހި ފައިނޭންސް ސްކީމް" ގެ ދަށުން، ފަސް އިންސައްތައަށް ވުރެ އިންޓްރެސްޓް ބޮޑު ނުވާގޮތަށް ދޫކުރާ ލޯނު ސްކީމާއި މާލެ ސަރަހައްދަށް ދޫކުރާ ހަ މިލިއަން ރުފިޔާގެ ލޯނު ސްކީމުން، މި ޕްރީ ފެބް ގެތައް ގަތުމަށް ފަސޭހަވާނެ އެވެ. މިއީ، ސަރުކާރުގެ ދެމެހެއްޓެނިވި ތަރައްގީ އާއި ހެޔޮ އަގުގައި ބޯހިޔާވަހިކަން ފޯރުކޮށްދިނުމުގެ ސިޔާސަތުގެ ދަށުން ކުރިއަށް ގެންދެވޭ މަޝްރޫއެކެވެ.
ފަރުކޮޅުފުށި ގޭޓެޑް ކޮމިއުނިޓީ - ޕްރައިވެޓް ލަގްޒަރިއަސް ލިވިން (ހުޅުމާލެ)
ފަރުކޮޅުފުށި، ގޭޓެޑް ކޮމިއުނިޓީއަކީ ޕްރައިވެޓް ލަގްޒަރީ ލިވިން ތަޖުރިބާ ކޮށްލަން ބޭނުންވާ ފަރާތްތަކަށް ޒަމާނީ ވަސީލަތްތަކާ އެކު ތަރައްގީކުރާ މަޝްރޫއެކެވެ. އެތަނުގައި 20 ބީޗް ވިލާ އާއި 60 ގާޑަން ވިލާ އާއި 26 އާބަން ވިލާ އަދި 230 ސާވިސް އެޕާޓްމަންޓް ތަރައްގީ ކުރާނެ އެވެ. އެތަނުގެ ވަށައިގެން ޕްލާޒާ، އިންޑޯ ސްޕޯޓްސް ކޮމްޕްލެކްސް، ކްލަބްހައުސް، ރެސްޓޯރަންޓް އަދި ލެޕް ޕޫލް ފަދަ ހިތްގައިމު ވަސީލަތްތައް ގާއިމުކުރާނެ އެވެ. އަދި އިވެންޓު ސްޕޭސް ވެސް ފަރުކޮޅުފުށީގައި ގާއިމު ކުރެވިގެންދާނެ އެވެ.
މީގެ އިތުރުން ފަސް ފަންގިފިލާގެ ހޮޓެލް އިމާރާތެއް އެތަނުގައި ގާއިމުކުރާނެ އެވެ. އެއީ 85 ކޮޓަރި ހިމެނޭ އިމާރާތެކެވެ. އެ ހޮޓަލުގައި ޕޫލް އާއި އިވެންޓް ހޯލް އަދި ވީއައިޕީ ޕާކިން ހިމެނޭނެ އެވެ. މިއީ ރައީސްގެ ވިޝަން އާ އެއްގޮތަށް ހައުސިންގެ އިތުރުން ލަގްޒަރީ ލިވިން ތަޖުރިބާ ކޮށްލުމުގެ ފުރުސަތު ފަހިކޮށްދިނުމަށް ފެށޭ މުހިންމު މަޝްރޫއެއް ކަމަށެވެ. މި މަޝްރޫއުގެ ސަބަބުން ވަޒީފާގެ ފުރުސަތުތައް އިތުރުވެ، އިގުތިސޯދު އިތުރަށް ފުޅާވެ، އާންމު ތަނަވަސްކަން އިތުރުވާނެ ކަމަށް އެޗްޑީސީން ބުނެ އެވެ.
އެސްއޯއީ އޮފީސް ބިލްޑިން އަދި އެސްއެމްއީ ބިލްޑިން (ހުޅުމާލެ)
ސަރުކާރު ހިއްސާވާ ކުންފުނިތައް އެއް އިމާރާތެއްގައި ހިންގޭ ގޮތަށް، ހުޅުމާލޭގައި އެސްއެމްއީ ބިލްޑިންއެއް އެޅުމަށް އެޗްޑީސީން ރޭ އިއުލާނުކުރި ޕްލޭންގައި ވަނީ ހިމަނާފަ އެވެ. 10 ފަންގިފިލާގެ މި އިމާރާތް ތަރައްގީ ކުރާނީ އެސްއޯއީތައް ހިންގުމަށް އެންމެ އެކަށީގެންވާ ގޮތަށެވެ. އަދި ވިޔަފާރިތަކަށް ފުރުސަތު ދިނުމުގެ ގޮތުން މި އިމާރާތުގައި ކޮމާޝާލް ޔުނިޓުތައް ހިމަނާނެ އެވެ. އެ ކޯޕަރޭޝަނުން ބުނީ މެގަ ޕްރޮޖެކްޓުތަކުގެ ތެރޭގައި އެސްއެމްއީ ބިލްޑިން އެއް ތަރައްގީކުރުން ހިމެނުމުގެ މަގުސަދަކީ ކުދި އަދި މެދުފަންތީގެ ވިޔަފާރިއަށް އިތުރު ފުރުސަތު ފަހިކޮށްދިނުން ކަމަށެވެ. މިއީ ލޯކަލް ވިޔަފާރިތައް ބާރުވެރި ކުރުމަށް ރައީސް ގެންގުޅުއްވާ ވިސްނުންފުޅު ދަށުން ހިންގާ މަޝްރޫއެއް ކަމަށެވެ. މި އެސްއެމްއީ ބިލްޑިންގައި ކޮންފަރެންސް ރޫމްތަކާއި ކޯ ވޯކިން ސްޕޭސްގެ އިތުރުން ރޫފް ޓޮޕް ގާޑެން ހިމެނޭނެ އެވެ. އަދި އިމާރާތުގައި ކޮމާޝަލް އައުޓްލެޓްސް ވެސް ހުންނާނެ އެވެ.
އެޗްޑީސީ ބިލްޑިން (ހުޅުމާލެ)
މިއީ އެޗްޑީސީގެ އޮޕަރޭޝަންތައް ހަރުދަނާކޮށް މަސައްކަތް ފަސޭހަކަމާ އެކު ކުރިއަށް ގެންދިއުމަށް އަޅާ އާ ހެޑް އޮފީހެކެވެ. މި ހެޑް އޮފީސް އިމާރާތުގައި ކޮމާޝަލް ސްޕޭސްތަކާއި ޓްރެއިނިން ސެންޓަރަކާއި ރިކްރިއޭޝަނަލް އޭރިއާ އާއި ޑޭކެއާ އާއި އެކްސްޕީރިއެންސް ސެންޓަރުތަކާއި އެގްޒިބިޝަން އަދި ޕާކިން ސްޕޭސްތައް ހިމެނެ އެވެ. މި ބިލްޑިންގެ އެންމެ ބޮޑު އެއް މަގުސަދަކީ އެފިޝިއެންޓް ވޯކް ސްޕޭސްއެއް އުފެއްދުން ކަމަށް އެޗްޑީސީން ބުނެ އެވެ.
އެލްޑަލީ ކެއާ ފެސިލިޓީ (ހުޅުމާލެ)
މިތަނުން އިސްރަށްވެހިންނަށް ބޭނުންވާ ހުރިހާ ހިދުމަތެއް ލިބޭނެ އެވެ. އެގޮތުން ކޮމްޕްރިހެންސިވް ކެއާގެ ދަށުން އިސްރަށްވެހިންނަށް ހެލްތް އެންޑް ވެލްނެސް ޕްރޮގްރާމްތައް ހިންގާނެ އެވެ. އަދި އެފަރާތްތަކަށް ބޭނުންވާ އެންމެ އެކަށީގެންވާ ނިއުޓްރިއަސް މީލްސް ނުވަތަ ކެއުން ލިބޭނެ އެވެ. އެޗްޑީސީން ބުނި ގޮތުގައި މިއީ އިސްރަށްވެހިންނަށް ދިރިއުޅުމަށް ހިތްފަސޭހަ މާހައުލަކަށް ވާނެ އަދި އެތަނުގައި އޮފީސް ސްޕޭސްތައް ވެސް ހުންނާނެ ކަމުގަ އެވެ. އެތަނުން ކޮންމެ އިސްރަށްވެއްސަކަށް ބޭނުންވާ ސްޕެލައިޒްޑް ކެއާ ލިބޭނެ ކަމަށާއި އެމީހުންގެ ޖިސްމާނީ އަދި ނަފްސާނީ ދުޅަހެޔޮކަން ރަނގަޅު ކުރުމަށް ޕްރޮގްރާމްތައް ހިންގާނެ ކަމުގަ އެވެ. މިތަން ތަރައްގީ ކުރާނީ އެންމެފަހުގެ ވަސީލަތްތަކާއި ސެކިއުރިޓީ ހިމެނޭ ގޮތަށް ކަމުގަ އެވެ.
ޕާކިން ބިލްޑިން - އިނޮވޭޓިވް ޕާކިން ސޮލިއުޝަން (ހުޅުމާލެ)
މިއީ ވެހިކަލް ޕާކިން މައްސަލައަށް ހައްލު ހޯދުމަށް ހުޅުމާލޭގައި 15 ޕާކިން ބިލްޑިން ތަރައްގީ ކުރުމަށް ކުރިއަށް ގެންދާ މަސައްކަތެކެވެ. ސޯލާ ހަކަތަ ބޭނުންކުރާ ގޮތަށް ފަރުމާކުރާ މި 15 ޕާކިން އިމާރާތުގައި 4،000 އަށް ވުރެ ގިނަ ވެހިކަލް ޕާކު ކުރެވޭނެ ޖާގަ ތަނަވަސް ކުރެވޭނެ ކަމަށް އެ ކޯޕަރޭޝަނުން ބުނެ އެވެ. މިތަންތަން ތަރައްގީކުރާނީ ހާއްސަ އެހީއަށް ބޭނުންވާ ފަރާތްތަކަށް ވެސް ފަސޭހައިން އެކްސެސް ވެވޭ ގޮތަށެވެ. އަދި އިލެކްޓްރިކް ވެހިކަލް ޗާޖިން ސްޓޭޝަންތައް ވެސް ހިމެނޭ ގޮތަށެވެ. އޭގެ އިތުރުން އެކި ޕާކިން ބިލްޑިންތަކަށް ބަހާލައިގެން، ރޫފް ޓޮޕްގައި ރެސްޓޯރެންޓުތަކާއި ޓެނިސް އާއި ސްކޭޓް ޕާކާއި މިނީ ގޮލްފް އާއި ޖިމް އަދި ރޮކް ކްލައިމްބިން ތަރައްގީ ކުރާނެ އެވެ. މި މަޝްރޫއަކީ މަގުގެ ދެފަރާތުގައި ޕާކު ކޮށްފަ ހުންނަ މައްސަލަ އާއި މަގު ތޮއްޖެހުމުގެ މައްސަލައަށް ވެސް ހައްލު ހޯދައިދޭނެ މަޝްރޫއެކެވެ.
އައިލް އެޑްވެންޗާ ޕާކު (ހުޅުމާލެ)
އައިލް އެޑްވެންޗާ ޕާކަކީ ރާއްޖޭގައި ފުރަތަމަ ފަހަރަށް ގާއިމްކުރެވޭ ރޭސިން ޓްރެކް، ޑްރިފްޓް ޓްރެކް، ގޯ-ކާޓް ޓްރެކް، ޕެއިންޓްބޯލް، ރޯލާ ސްކޭޓިން އަދި ވޯޓާ ތީމް ޕާކެއް ހިމެނޭ ގޮތަށް، ހުޅުމާލޭގައި ތަރައްގީކުރާ މަޝްރޫއެކެވެ. މިއީ އާންމު ރައްޔިތުންނަށް މުނިފޫހިފިލުވުމުގެ ތަފާތު ވަސީލަތްތައް ގާއިމުކުރުމުގެ ވައުދުފުޅާ އެއްގޮތަށް ކުރިއަށްގެންދާ މަޝްރޫއެކެވެ. ޒުވާނުންނަށް މިފަދަ ކަންކަމުން ހުނަރު ތަރައްގީކޮށް، ބައިނަލްއަގުވާމީ މުބާރާތްތަކުގައި ވެސް ވާދަކުރުމުގެ ފުރުސަތު ފަހިވުމަށް އެޅިގެންދާ މުހިންމު ފިޔަވަޅަކަށް ވާނެ ކަމަށް އެޗްޑީސީން ބުނެ އެވެ. މިތަން ހުންނާނީ ބީޗަށް އެކްސެސް ވެވޭ ގޮތަށެވެ. އޭގެ އިތުރުން މިތަނުގައި ކުދި ފިހާރަތަކާއި ފުޑް އެންޑް ބެވެރެޖް އައުޓްލެޓްތައް އަދި އޮން ސައިޓް ހޮޓެލް ސާވިސަސް ލިބޭނެ އެވެ.
މި މަޝްރޫއުގެ ސަބަބުން ލޯކަލް ޓޫރިޒަމަށް ރަނގަޅު އަސަރު ކުރާނެ އަދި ވަޒީފާގެ ފުރުސަތުތައް ވެސް ފަހިވާނެ އެވެ.
ހިސްޓްރީ ސެންޓަރު (ހުޅުމާލެ)
ދިވެހިންގެ ދިވެހިވަންތަކަން ދެމެހެއްޓުމަށް ރައީސް ދެއްވާ އަހައްމިއްޔަތުކަމުގެ ދަށުން، "ދިވެހިންގެރާއްޖެ" ސްލޯގަން އާ އެއްގޮތަށް، ދިވެހިންގެ ތާރީހު ދައްކުވައިދޭ މަރުކަޒެއް ހުޅުމާލޭގައި ގާއިމުކުރުމަށް އެޗްޑީސީން ވަނީ ނިންމާފަ އެވެ. މިއީ ރާއްޖޭގެ ތާރީހު ކިޔައިދީ، އަންނަން އޮތް ޖީލުތަކާ ހަމައަށް އެ ވާހަކަތައް ގެނެސްދިނުމުގެ މަގުސަދުގައި ތަރައްގީ ކުރެވިގެންދާ ތާރީހީ މަރުކަޒެކެވެ. މިތަން ތަރައްގީ ކުރެވިގެންދާނީ ހުޅުމާލޭގެ ސެންޓްރަލް ޕާކުގަ އެވެ. އެޗްޑީސީން ބުނި ގޮތުގައި މިތަނުގެ ސަބަބުން އަންނަ އޮތް ޖީލުތަކަށް ކުރިން ދިވެހިން ކަންކަން އުޅުނު ގޮތާއި ދިވެހިންގެ ތާރީހު އޮތްގޮތަށް އަދުގެ ޅަދަރިންނަށް އިނގޭނެ ކަމުގަ އެވެ. މިއީ ކުޑަކުދިންނަށް ޝައުގުވެރި ގޮތަށް ދިވެހި ތާރީހު ކިޔައިދިނުމަށް މުހިންމު ރޯލެއް އަދާކުރާނެ މަރުކަޒެއް ކަމުގަ އެވެ. އަދި ރާއްޖެ ޒިޔާރާތްކުރާ ފަތުރުވެރިންނަށް ވެސް ރާއްޖޭގެ ތާރީހު ދައްކާލުމަށް މުހިންމު މަޝްރޫއެއް ކަމުގަ އެވެ.
ނޮލެޖް ޕާކް - އެޑިއުކޭޝަނަލް އިނޮވޭޝަން ސެންޓަރު (ހުޅުމާލެ)
ހުޅުމާލޭގައި ތަރައްގީ ކުރެވޭ މި ނޮލެޖް ޕާކުން ދަރިވަރުންގެ އުނގެނުމުގެ ތަޖުރިބާ ބަދަލުކޮށްލާނެ ކަމަށް އެޗްޑީސީން ބުނެ އެވެ. މިއީ ތައުލީމު އުގަންނައިދޭ މަރުކަޒުތަކަށް މާލެ ސަރަހައްދުގައި އޮތް ޑިމާންޑަށް ލުއިކަމެއް ގެނެސްދޭނެ ޕްރޮޖެކްޓެއް ކަމަށެވެ. އެގޮތުން މިތަނުން، މާލެ ސަރަހައްދުގެ ވަކިވަކި ކޮލެޖް ޔުނިވާސިޓީތައް ހިންގުމަށް ޖާގަ ދޫކުރާނެ އެވެ. މިތަން ތަރައްގީ ކުރާނީ އުނގަންނައިދޭ އެކިއެކި އިންސްޓިޓިއުޓްތައް ހިމެނޭ ގޮތަށެވެ. ތަނުގައި ލެކްޗަ ހޯލްސްތަކާއި ސްޓާފް ރޫމް އާއި މީޓިންގ ރޫމް އަދި ލެބޯޓަރީތަކުގެ އިތުރުން މެނޭޖްމަންޓް އޮފީހެއް ހިމެނޭނެ އެވެ. އޭގެ އިތުރުން މި ނޮލެޖް ޕާކުގައި ސްޓޫޑެންޓް ހޮސްޓެލްތައް ވެސް ހުންނާނެ އެވެ.
ނޫވެލި - އައިލެންޑް ރިޓްރީޓް (ގަލުފަޅު)
މިއީ ތަރައްގީގެ ބިޔަ މަޝްރޫއެއްގެ ގޮތުން ގަލުފަޅުގެ ފަޅުތެރޭގައި "ނޫވެލި" ގެ ނަމުގައި ލަގްޒަރީ ގެތަކެއް ތަރައްގީ ކުރުމުގެ މަޝްރޫއެކެވެ. މިތަނަކީ މާލެ އަދި ހުޅުމާލެ އާ ވަރަށް ކައިރީގައޮ އޮންނަ ގަލުފަޅުގައި ތަރައްގީކުރާ ތަނެކެވެ. މާލެ އާ 10 މިނެޓު ދުރުގައި އޮންނަ މިތަނުގައި ލެގޫން ވިއު ފެންނަ 31 ޔުނިޓާއި ހޮރައިޒަން ވިއު ފެންނަ 31 ޔުނިޓު އަދި 39 ގެސްޓް ވިލާ ތަރައްގީ ކުރާނެ އެވެ. މިތަނުގައި ވޯޓަ ސްޕޯޓްސް، ޑައިވް ސެންޓަރު، ރިކްރިއޭޝަނަލް ސްޕޭސެސް، ބޯލް ގޭމްސް އަދި ކޮމާޝަލް ޕްލާޒާ ހުންނާނެ އެވެ. އަދި އޭގެ އިތުރުން އިވެންޓް ސްޕޭސްތަކާއި ކޮންވެންޝަން ސެންޓަރާއި އެގްޒިބިޝަން ހޯލްސް އަދި ބެންކުއެޓް ހޯލްސް ހުންނާނެ އެވެ. މި ޕްރޮޖެކްޓުގެ ސަބަބުން މި ސަރަހައްދާ ކައިރީގައި ވިޔަފާރިތައް ފުޅާކުރުމަށް މަގުފަހިވާނެ ކަމަށް އެ ކޯޕަރޭޝަނުން ބުނެ އެވެ.
ކިނާރިއާ - ޑެސްޓިނޭޝަން އައިލެންޑް (ކުޑަގިރި ފަޅު)
"ކިނާރިއާ" ޑެސްޓިނޭޝަން އައިލެންޑަކީ ޓޫރިޒަމާއި މުނިފޫހިފިލުވުމާއި ކޭމްޕިން އަދި ހިތްހަމަޖައްސާލުމަށް ދިއުމަށް އެންމެ އެކަށީގެންވާ ގޮތަށް ތަރައްގީކުރާ ރަށެކެވެ. ކުޑަގިރި ފަޅުގައި ތަރައްގީކުރާ މިތަނަށް، މާލެއިން ސްޕީޑް ބޯޓުގައި 15 މިނެޓުން ދެވޭނެ އެވެ. މިތަން ތަރައްގީ ކުރާނީ އިންޓަގްރޭޓެޑް ޓޫރިޒަމް އައިލެންޑެއްގެ ގޮތުގަ އެވެ. އެގޮތުން ގެސްޓް ހައުސް ސްޓޭ އާއި ސްޕާތައް ވެސް މިތަނުގައި ހުންނާނެ އެވެ. މިއީ ރައީސްގެ ވައުދުފުޅާ އެއްގޮތަށް، މުނިފޫހިފިލުވުމުގެ ފުރުސަތު ފަހިކޮށްދިނުމަށް ހިންގޭ މަޝްރޫއެއް ކަމަށް އެޗްޑީސީން ބުނެ އެވެ.
ސްމާޓް ވެއާ ހައުސް ކޮމްޕްލެކްސް (ހުޅުމާލެ)
އެޗްޑީސީން ވަނީ ހުޅުމާލޭގައި މުޅިން އާ ސްމާޓް ވެއާ ހައުސް ކޮމްޕްލެކްސްއެއް ވެސް ގާއިމުކުރުމަށް ނިންމާފަ އެވެ. ރައީސްގެ ވިޝަން އާ އެއްގޮތަށް ތަރައްގީކުރާ މިތަނަކީ ކޯލްޑް ސްޓޯރޭޖާއި އެމްޕަލް ވެއާހައުސިން އަދި ލޯކަލް ވިޔަފާރިތަކަށް ސްޕާޓް ވެއާހައުސް ކޮމްޕްލެކްސް ހިމެނޭ ތަނެކެވެ. މި ފެސިލިޓީގެ ސަބަބުން މުދާ ރައްކާކޮށް ބެލެހެއްޓުމުގެ ކުރުމުގެ ހަރަދު ކުޑަކުރެވި، ވިޔަފާރުތައް ބާރުވެރި ކުރުވާޏެ އެވެ.
ސީނިކް ސިޓީ - ގަސް އިންދުމުގެ މަޝްރޫއު (ހުޅުމާލެ)
މިއީ މި ދައުރުގެ ތެރޭގައި ފަސް މިލިއަން ގަސް އިންދުމަށް ރައީސް ވެވަޑައިގެންފައިވާ ރިޔާސީ ވައުދުފުޅާ އެއްގޮތަށް، އެކަމަށް އެއްބާރުލުން ދިނުމުގެ ގޮތުން އެޗްޑީސީން ކުރިއަށްގެންދަން ނިންމާފައިވާ ގަސް އިންދުމުގެ މަޝްރޫއެކެވެ. މި މަޝްރޫއުގެ ދަށުން އެޗްޑީސީގެ ބެލުމުގެ ދަށުގައި އޮތް ހިއްކާފައިވާ ރަށްތަކުގައި ގަސް އިންދުމުގެ އިތުރުން ހުޅުމާލޭގެ އެކި ސަރަހައްދުތަކުގައި ޕާކުތައް ތަރައްގީ ކުރާނެ އެވެ. އޭގެ އިތުރުން ހުޅުމާލޭގެ ރައްޔިތުން ހިތްފަސޭހަކޮށްލުމަށް އެއްވެ އުޅޭނެ ސަރަހައްދުތަކާއި ބެންޗުތައް ގާއިމުކުރާނެ އެވެ.
އަދި މަގުގެ ދެފަރާތުގައި ހިޔާ ލިބޭ ގަސްތަކާ އެކު ޖޮގިންނާއި ބައިސްކަލް ދުއްވާނެ ސަރަހައްދުތައް ހަދާނެ އެވެ. މި އާއެކު އެޗްޑީސީގެ ބެލުމުގެ ދަށުގައި އޮތް ރަށްތަކުގެ ފެހިކަން އިތުރުވެ، މަލަމަތި ރީތިވެ، ހުޅުމާލޭގެ ރައްޔިތުންނަށް ވެސް ފެހިކަންގަދަ މާހައުލެއްގައި ދިރިއުޅުމުގެ ފުރުސަތު ލިބިގެންދާނެ ކަމަށް އެޗްޑީސީން ބުނެ އެވެ.
