ނޭޝަނަލް ލެވެލްގައި މުޅި ސައިބާ ސްޕޭސް މެނޭޖްކުރަން ޖެހޭ: އިހުސާން
ނޭޝަނަލް ލެވެލްގައި މުޅި ސައިބާ ސްޕޭސް މެނޭޖްކުރަންޖެހޭ ކަމަށް މިނިސްޓާ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ މިނިސްޓަރު އަލީ އިހްސާން ވިދާޅުވެއްޖެ އެވެ.
ސައިބާ އެކްސްޕޯ 2024 ވެބްސައިޓް ލޯންޗު ކޮށްދެއްވާ ވާހަކަ ދައްކަވަމުން މިނިސްޓަރު ވިދާޅުވީ މި ސަރުކާރާ ހަވާލުވެގެން އައި އިރު ސަރުކާރުގެ އެކި އިދާރާތަކަށް ސައިބާ ތްރެޓްސް އައި މިންވަރާއި އަމިއްލަ ވިޔަފާރިތަކަށް ދޭތެރެ ދޭތެރެއިން ތްރެޓްސް އަންނަވަރު މިހާރުވެސް ވަޒަން ކުރަންޖެހޭ ކަމަށެވެ.
އަޅުގަނޑުމެންގެ އެންމަވަޔަރަމަންޓް ޙިމާޔަތްކުރުމަކީ ހަމައެކަނި ވަކި އިދާރާއެއްގެ ނުވަތަ ކުންފުންޏެއްގެ ޒިންމާއެއްގެ ތެރޭގައި ހިމެނޭކަމެއް ނޫން. އޭގެ އިތުރަށް އެއީ ޤައުމީ ފެންވަރުގައި މުޅި ސައިބަރ ސްޕޭސް މެނޭޖްކޮށް، ސައިބަރ ސްޕޭސް މެދުވެރިކޮށް އަންނަމުންދާ ނުރައްކަލަށް އަޅުގަނޑުމެންގެ ޑިފެންސް ޤާއިމުކޮށް އެކަމަށް ޤާބިލުވާންޖެހޭ.
މީގެ އިތުރުން އިހުސާން ވިދާޅުވީ ރައީސް ޑރ. މުހައްމަދު މުއިއްޒު ހަވާލުވެވަޑައިގަތުމާ ހިސާބުން ފެށިގެން، އެވަގުތު ރާއްޖޭގެ ސައިބާ ސްޕޭސްގެ ހާލަތު އޮތް ގޮތް ވަޒަންކޮށް، ރާއްޖޭގެ ގައުމީ ސަލާމަތާބެހޭ ކޮމިޓީން އެންމެ ފުރަތަމަ ނިންމެވި އެއް ނިންމެވުމަކީ ރާއްޖޭގައި މިކަމަށް ހާއްސަކޮށް އިދާރާއެއް ގާއިމުކުރުން ކަމަށެވެ.
އެ ހިސާބުން ރައީސް ނޭޝަނަލް ސައިބާ ސެކިއުރިޓީ އެޖެންސީ އުފެއްދެވީ ކަމަށާއި އެ އިރުގައިވެސް ދިވެހިރާއްޖޭގެ ސަލާމަތީ ހިދުމަތްތަކުން ރާއްޖޭގެ ސައިބާ ސްޕޭސް ސެކިއުއާ ކުރުމަށްޓަކައި އެ އިދާރާތަކުގެ ލަޔާގަތާ ގާބިލުކަން ހުރި މިންވަރުން އެ މަސައްކަތް ދިޔައީ ކުރަމުން ކަމަށް އިހުސާން ވިދާޅުވި އެވެ.
އިހުސާން ވިދާޅުވީ އެފަދަ ކަމެއް ތައާރަފްވެގެން އަންނައިރު، މި ދާއިރާގައި މި ރާއްޖޭގައި މިވަގުތު ޒިންމާވާ ހުރިހާ ފަރާތްތަކުން މިހަފްލާގައި ބައިވެރިވެ ވަޑައިގަންނަވާކަމީ މިހަފްލާއަށް ލިބޭ ވަރަށް ބޮޑު ޝަރަފެއް ކަމަށެވެ.
Ads by STO
