މީރާގެ ޑިރެކްޓަރުންގެ ބޯޑުގެ މެމްބަރުކަމަށް ކުރިމަތިލުމުގެ ފުރުސަތު ހުޅުވާލައިފި
މޯލްޑިވްސް އިންލަންޑް ރެވެނިއު އޮތޯރިޓީ (މީރާ) ގެ ޑިރެކްޓަރުންގެ ބޯޑުގެ މެމްބަރުކަމަށް ކުރިމަތިލުމުގެ ފުރުސަތު ހުޅުވާލައިފި އެވެ.
ރައީސް އޮފީހުން ބުނީ އެ މަގާމަށް ކުރިމަތިލުމުގެ ފުރުސަތު ހުޅުވާލީ މިއަދުން ފެށިގެން މި މަހުގެ 24 ވަނަ ދުވަހާ ހަމައަށް ކަމަށެވެ.
އެ މަގާމަށް ކުރިމަތިލާން ހުޅުވާލީ ބޯޑު މެމްބަރެއްގެ ދައުރު ހަަމަވާތީ ކަމަށް ވެސް ބުނެފައިވެ އެވެ.
ރައީސް އޮފީހުން ބުނީ އެ މަގާމަށް އެދި ހުށަހަޅާ ފޯމު ބަލައިގަންނާނީ އެކަމަށް ދީފައިވާ މުއްދަތުގެ ތެރޭގައި ރަސްމީ ބަންދު ދުވަސްތައް ފިޔަވައި، އެހެން ދުވަސްދުވަހުގެ ހެނދުނު 08:30 އިން މެންދުރު 12:00 އަށް ކަމަށެވެ.
މީރާގެ މެމްބަރުކަމަށް އެދި ހުށަހަޅަން ޖެހޭ ފޯމު ރައީސް އޮފީހުގެ ވެބްސައިޓުން ލިބޭނެކަމަށް ވެސް ބުނެފައިވެ އެވެ.
މީރާގެ ބޯޑުގައި މި ވަގުތު 7 މެންބަރުން ތިއްބަވަ އެވެ. އެއީ ކޮމިޝަނާ ޖެނެރަލް އޮފް ޓެކްސްޓޭޝަން ހަސަން ޒަރީރު، ޑެޕިއުޓީ ޗެއާޕާސަން ލީނާ މުހައްމަދު ޒާހިރު ހުސައިން، ޗެއާޕަސަން އަހުމަދު ސާއިދު މުސްތަފާ، ބޯޑު މެންބަރު އައިޝަތު އަޝާ އަލީ، ބޯޑު މެންބަރު މަހްޒޫމް ސަލީމް އަދި ބޯޑު މެންބަރު މުމްތާޒް އަބްދުއްރަޝީދުގެ އިތުރުން ބޯޑު މެންބަރު ހުޝާމް ވަހީދު އެވެ.
