އެސްޓީއޯއިން ފެނަކައިގެ ހިއްސާ ގަތުމުގެ މަސައްކަތް ހުއްޓާލައިފި
ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) ގެ ސަބްސިޑަރީއަކަށް ފެނަކަ ކޯޕަރޭޝަން ބަދަލު ކުރުމަށް ކުރަމުންދިޔަ މަސައްކަތް އެ ކުންފުނިން ހުއްޓާލައިފި އެވެ.
ދަރަނި ބޮޑުވުމުގެ ސަބަބުންނާއި ކުރީގެ މެނޭޖުމަންޓުތަކުގައި އެތެރޭގެ ކޮރަޕްޝަން ބޮޑުވުމުގެ ސަބަބުން ހިންގުމަށް ދަތިވެފައިވާ ފެނަކަ އެސްޓީއޯގެ ދަށަށް ގެންދަން ނިންމީ މިދިޔަ އޮގަސްޓް މަހުގެ 25 ވަނަ ދުވަހު ބޭއްވެވި ކެބިނެޓް ބައްދަލުވުމުގަ އެވެ. އެ ބަދަލާ ގުޅޭގޮތުން ރައީސް އޮފީހުން ބުނެފައި ވަނީ ކެބިނެޓުން އެ ގޮތަށް ފާސްކުރީ ފެނަކައިން ފޯރުކޮށްދޭ ހިދުމަތްތައް ވަރުގަދަ ކުރުމަށާއި ކުންފުނި ދެން ހިންގޭ ގޮތް ހޯދުމަށް ފިނޭންސް މިނިސްޓްރީން ދިރާސާކޮށް ހުށަހެޅި ކަރުދާހެއްގެ މައްޗަށް ބިނާކޮށް ކަމަށެވެ.
އެސްޓީއޯއިން މިއަދު ނެރުނު އިއުލާނެއްގައި ބުނީ އެ ކުންފުނީގެ ދަށަށް ފެނަކަ ބަދަލު ކުރުމަށް ކުރަމުން އަންނަ މަސައްކަތް ހުއްޓާލުމަށް ފިނޭންސް މިނިސްޓްރީން އެ ކުންފުންޏަށް އާދިއްތަ ދުވަހު އަންގާފައިވާ ކަމަށެވެ.
އެސްޓީއޯއިން ސަރުކާރަށް ހުށަހެޅި އެކުއިސިޝަން ޕްރޮޕޯސަލްގައި ހިމެނިފައިވާ ކަންކަން ކުރިއަށް ގެންގޮސްފައިވާ މިންވަރަށް ބަލައި، އެ ކުންފުނިން ފެނަކައިގެ ހިއްސާ ގަތުމުގެ މަސައްކަތް ހުއްޓާލުމަށް ކުންފުނީގެ ޑިރެކްޓަރުންގެ ބޯޑުން މިއަދު ނިންމާފައިވާ ކަމަށެވެ.
ފިނޭންސް މިނިސްޓްރީން މިފަހުން ބުނެފައި ވަނީ އެސްޓީއޯގެ ދަށަށް ފެނަކަ ބަދަލު ކުރުމުގެ މަސައްކަތް މަޑުޖައްސާލައި، އެހެން ގޮތެއް ހޯދަމުންދާ ކަމަށެވެ. އެގޮތުން ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) ފަދަ ކުންފުންޏަކާ އެއްކޮށްލުން ފަދަ ހައްލެއް ހޯދުމުގެ މަސައްކަތް ކުރަމުން އަންނަ ކަމަށެވެ. އެކަމަށް އަންނަ އަހަރު ދާއިމީ ހައްލެއް ހޯދޭނެ ކަމަށް ވެސް މިނިސްޓްރީން ބުނެފައިވެ އެވެ.
އެސްޓީއޯއަށް އެންމެ ބޮޑަށް ދަރަނިވެރިވެފައިވާ އެއް ކުންފުންޏަކީ ވެސް ފެނަކަ އެވެ. ތެޔޮ ގަތުމަށްފަހު އެ ކުންފުންޏަށް ދައްކަން ޖެހޭ 2 ބިލިއަން ރުފިޔާ އެބައޮތެވެ.
އެ ކުންފުނީގެ ދަށަށް ފެނަކަ ބަދަލުކޮށް، އެސްޓީއޯގެ ސަބްސިޑަރީއެއްގެ ގޮތުގައި ހިންގަން ހަމަޖެއްސީ އަންނަ ޖެނުއަރީ މަހުން ފެށިގެންނެވެ. އެ މަރުހަލާ ކުރިއަށް ގެންދިއުމަށް ފިނޭންސް މިނިސްޓްރީ އާއި ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) ގެ އިތުރުން އެސްޓީއޯގެ ވެރިންގެ ކޮމިޓީއެއް އުފައްދައި، މައުލޫމާތު ހިއްސާކޮށްގެން މަސައްކަތް ކުރިއަށް ގެންދިއުމަށް ވެސް ކެބިނެޓުން އޭރު ނިންމި އެވެ.
