އިސްލާމްދީން ނައްތާލަން ކާފަރުން ކުރާ މަސައްކަަތަށް ސަމާލުވާން ޖެހޭ: ހުތުބާ
އިސްލާމްދީން ނައްތާލުމަށް ކާފިރުން ކުރާ މަސައްކަތްތައް ބަލައި، އެކަމަށް ފަރުވާތެރިވެ، ސަމާލުވާން ޖެހޭ ކަމަށާއި ދީނުގެ ކަންކަން މޮޅަށް އުނގެނި އަދާވާތްތެރިންގެ ރޭވުންތަކަށް ހޭލާ ތިބެން ޖެހޭ ކަމަށް މިއަދުގެ ހުކުރު ހުތުބާގައި ބުނެފި އެވެ.
ހުތުބާގައި ބުނީ ކީރިތި ގުރްއާނަކީ، މާތް الله ގެ ކަލާމްފުޅު ކަމަށެވެ. އެއީ ޖިބުރީލުގެފާނު މެދުވެރިކުރައްވައި، އެންމެފަހުގެ ނަބިއްޔާގެ މައްޗަށް الله ބާވައިލެއްވި މުއުޖިޒާތެއް ކަމަށެވެ. އޭގެ ލަފުޒާއި މާނަ އައިސްފައިވަނީ އެކަލާނގެ ހަޒުރަތުން ކަމަށެވެ.
އެފޮތް އަހަރެމެންނާ ހަމައަށް އައިސްފައި ވަނީ ތަވާތުރުކޮށް ކަމަށެވެ. ކަލިމަތަކާއި އަކުރުތައް، ރިވާވެފައިވާ ގޮތަށާއި، އަކުރު އަދާކުރުމުގައި ލުއިކުރުމާއި ބަރުކުރުމަށް، އެއްވެސް ބަދަލެއް ނައިސް، ސަނަދު ގުޅިގެން ކަމަށެވެ. އަދި ކީރިތި ރަސޫލާގެ ޒަމާނުން ފެށިގެން، މިއަދާ ހަމައަށް، ކީރިތި ގުރްއާން އަހަރެމެންނާ ހަމައަށް އައިސްފައި ވަނީ، ދޮގުކުރުން މުސްތަހީލުވާ ގިނަ އަދަދެއްގެ ރާވީން ސަނަދުގައި ހިމެނިގެން މުތަވާތިރުކޮށް ކަމަށެވެ. އެހެންކަމުން އެ ފޮތް އަހަރެމެންނާ ހަމައަށް އައިސްފައި ވަނީ ބާވައިލެއްވި ގޮތަށްކަން ކަށަވަރުވާ ކަމަށެވެ.
ކީރިތި ގުރްއާނަކީ، الله ގެ ކަލާމްފުޅު ކަމާއި އެފޮތް އަހަރެންނާ ހަމައަށް އައިސްފައިވާ ގޮތާ އަދި އެފޮތުގައި ކުށެއް ނެތް ކަމާ މެދު ޝައްކެއް ނެތަސް، މި ކަންކަމުގައި ޝައްކުތަކާއި ޝުބުހަތައް އުފައްދަން ބަޔަކު މަސައްކަތްކުރާ ކަމަށް ހުކުރު ހުތުބާގައި ބުންޏެވެ. އެފޮތް ބާވައިލައްވަން ފެއްޓެވުމާ ހަމައިން، މިއަދާ ހަމައަށް އެކަން ދެމި އެބައޮތް ކަމަށެވެ.
"އޭގެ ބޭނުމަކީ، މުސްލިމުން الله އާއި އެކަލާނގެ ފޮތާއި، ނަބީންނާއި ރަސޫލުންގެ މައްޗަށްވާ އީމާންކަމުގައި، އެއުރެން ބައިބައިކޮށްލައި، އީމާންކަމާއި މަތިވެރި އަގީދާ އާ އެއުރެން ދުރުކުރުމެވެ. މުސްލިމުން އިސްލާމީ ޝަރީއަތާ ބީރައްޓެހިކުރުމެވެ. މިއީ މުސްލިމުން ފިސާރި ހުޝިޔާރުވެ ހޭލައި ތިބެން ޖެހޭ ކަމެކެވެ. މައުލޫމާތު ފެތުރުމުގެ ވަސީލަތްތައް ގިނަ މި ޒަމާނުގައި، ނޭނގި ތިއްބައި، އެފަދަ މީހުންގެ ދަލުގައި ޖެހި، މަޅީގައި ބެދުމަކީ ދުރުކަމެއް ނޫނެވެ،"
ކީރިތި ގުރްއާނާ މެދު، އުފައްދާ ޝުބުހަތަކުގެ މައްޗަށް އަލިއަޅުވާލައި މިއަދުގެ ހުތުބާގައި ބުނި ގޮތުގައި ޝައްކު އުފައްދަން އެންމެ ފުރަތަމަ ކުރި މަސައްކަތަކީ، އެއީ الله ގެ ކަލާމްފުޅު ނޫން ކަމަށް ހަދަން ކުރި ނާކާމިޔާބު މަސައްކަތް ކަމުގަ އެވެ. އެކަމަށް، އެމީހުން ހަދައިގެން ތަފާތު ވާހަކަ ދެއްކި ކަމުގަ އެވެ.
ކީރިތި ގުރްއާނަކީ ކީރިތި ރަސޫލާ އަމިއްލަފުޅަށް އުފައްދަވައިގެން ގެންނަވާ ފޮތެއް ކަމަށް މައްކާގެ މުޝްރިކުން ދައުވާކުރުމުން، الله އެމީހުންނަށް ރައްދު ދެއްވައި އެންގެވީ، އެމީހުން އެ ކުރަނީ ތެދު ދައުވާއެއް ކަމުގައި ވަނީ ނަމަ، އެ މީހުން ވެސް އެފަދަ ގުރްއާނެއް ގެނެސްގަތުމަށެވެ. ކީރިތި ގުރްއާނާ އެއްފަދަ ފޮތެއް ގެނެސްގަތުމަކީ އިންސީންނާއި ޖިންނީން ގުޅިގެން މަސައްކަތް ކުރިޔަސް ކުރެވޭނެ ކަމެއް ނޫން ކަމުގައި އެންގެވި އެވެ.
ހުތުބާގައި ބުނީ ގުރްއާނަކީ މާތް ﷲ ގެ ކަލާމްފުޅުކަން ކަށަވަރުވާ ގިނަގުނަ އިލްމީ ހެކިތައް އެބަހުރި ކަމަށެވެ. އޭގެ ތެރެއިން އެއް ހެއްކަކީ، މައިމީހާގެ ބަނޑުގައި ދަރިފުޅު ގަރުބަގަތީއްސުރެ، ފުރިހަމަ އިންސާނަކަށް ވުމާ ހަމައަށް އަންނަ ބަދަލުތަކުގެ ވާހަކަ ކީރިތި ގުރްއާނުގައި ތަފުސީލުކޮށް ބަޔާންކުރައްވާފައިވުން ކަމަށެވެ. މިއީ އެޒަމާނުގައި އިލާހީ ވަހީގެ ޒަރީއާއިން ނޫން ގޮތަކަށް، އެއްވެސް މީހަކަށް އެނގޭނެ މައުލޫމާތެއް ނޫން ކަމަށެވެ. އެހެންކަމުން މިޒަމާނުގެ އިލްމީ ދިރާސާތަކަށް ބަލާއިރު، މި މިސާލުން އެކަނި ވެސް ގުރްއާނަކީ، الله ގެ ކަލާމްފުޅުކަން ކަށަވަރުވާ ކަމަށެވެ.
ކީރިތި ގުރްއާނަކީ، ކީރިތި ރަސޫލާ ޝާމުކަރަޔަށް ކުރެއްވި ދަތުރުފުޅުގައި، ނަސްރާނީ ދީނުގެ ރާހިބެއް ކަމުގައިވާ ބަހީރާ ގާތުން އުނގެނިވަޑައިގަތް ތަކެތި ކަމަށް ބައެއް މުސްތަޝްރިގުން ދައުވާކުރެ އެވެ. އެ މީހުން އެހެން ބުނާ ސަބަބަކީ، ގުރްއާނުގައި ހުރި ބަސްފުޅުތަކާއި ތައުރާތާއި އިންޖީލުގައި ހުރި ބައެއް ވާހަކަތަކާ، އެއް ގޮތްކަމެއް ހުރީމަ އެވެ. ނަމަވެސް ކީރިތި ގުރްއާނަކީ ރަސޫލާ އެކަލޭގެފާނުގެ ބޮޑުބޭބޭފުޅު އަބޫތާލިބު އަރިހުގައި ކުރެއްވި ދަތުރުފުޅުގައި، ކުޑަ ވަގުތުކޮޅަކަށް ބައްދަލުވި ރާހިބުގެ ގާތުން އުނގެނިވަޑައިގަތް ތަކެތި ކަމުގައި ވުމަކީ، މުސްތަހީލު ކަމެކެވެ.
އިސްލާމްދީނުގެ އަދާވާތްތެރިން އަބަދާއި އަބަދު އަންނަނީ الله ގެ ނޫރުފުޅު ނިއްވައިލުމަށް މަސައްކަތް ކުރަމުން ކަމަށް ހުތުބާގައި ބުންޏެވެ. ކާފިރުން ކިތަންމެ ބޭނުންވިޔަސް އެގޮތަށް އެކަން ނުވާނޭކަން ކީރިތި ގުރްއާނުގައި އަންގަވާފަ އެވެ.
"ކީރިތި ގުރްއާނާއި ކީރިތި ރަސޫލާގެ ތާހިރު ސުންނަތުގައި އަހަރެމެން ހިފިވަރަކުން އަހަރެމެންގެ ކަންތައްތައް މާތް ﷲ އިސްލާހު ކުރައްވާނެތެވެ. ދެ ދުނިޔޭގެ އިއްޒަތާއި ޝަރަފު އެކަލާނގެ އަހަރެމެންނަށް ދެއްވާނެތެވެ. އަހަރެމެން އެއާ ދުރުވި މިންވަރަކުން އަހަރެމެންގެ ބާއްޖަވެރިކަން ގެއްލޭނެތެވެ. އިސްލާމް ދީން ދޫކޮށް، ކާފިރުކަންމަތީ މަރުގަންނަވާ މީހުން، އެމީހުން ކުރި ހުރިހާ އަމަލެއް ބޭކާރުވީ އެވެ. އޭރުން އެމީހުން ދާއިމަށް ތިބޭން ޖެހޭނެ ތަނަކީ ނަރަކަ އެވެ،"
އިސްލާމްދީން ނައްތާލުމަށް ކާފިރުން ކުރާ މަސައްކަތްތައް ބަލައި، އެކަމަށް ފަރުވާތެރިވެ، ސަމާލުވާން ޖެހޭކަން ފާހަަގޮށް މިއަދުގެ ހުތުބާގައި ބުނި ގޮތުގައި ދީނުގެ ކަންކަން މޮޅަށް އުނގެނި އަދާވާތްތެރިންގެ ރޭވުންތަކަށް ހޭލާ ތިބެން ޖެހޭ ކަމުގަ އެވެ. ކާފިރުން މަސައްކަތް ކުރަމުން އަންނަނީ މުސްލިމުން އެމީހުންގެ ދީނާ ދުރުކުރެވޭތޯ ކަމަށާއި އަހަރެމެންގެ އަޒުމަކަށް ވާންވާނީ މަރުދުވަހަށް ދާންދެން އިސްލާމްދީންމަތީ ސާބިތުވެ ތިބުމަށް ކަމުގަ އެވެ. އެގޮތުގެ މަތީގައި ސާބިތުވެ ތިބެއްޖެ ނަމަ އަހަރެމެން މުސްލިމުން މަގުފުރައްދައި، އިސްލާމީ އުންމަތް ބަލިކޮށް ނުލެވޭނެ ކަމަށް ހުތުބާގައި ވަނީ ފާހަގަކޮށްފަ އެވެ.
