ފަޒީލް، ސަފީރުކަމުގެ ފަތްކޮޅު ޗައިނާ ރައީސަށް އަރުވައިފި
ދިވެހިރާއްޖެއިން ޗައިނާއަށް ކަނޑައަޅުއްވާފައި ހުންނަވާ ސަފީރު ޑރ. ފަޒީލް ނަޖީބް، އެމަނިކުފާނުގެ ސަފީރުކަމުގެ ފަތްކޮޅު، ޗައިނާގެ ރައީސް ޝީ ޖިންޕިންއަށް އަރުވައިފި އެވެ.
ފަތްކޮޅު އެރުވީ ޗައިނާގެ ވެރިރަށް ބެއިޖިންގައި ހުންނަ ގްރޭޓް ހޯލް އޮފް ދަ ޕީޕަލްގައި މިއަދު އޮތް ހާއްސަ ރަސްމިއްޔާތެއްގަ އެވެ.
ފަތްކޮޅު އެރުވުމަށްފަހު ފަޒީލް ވަނީ ރައީސް ޑރ. މުހައްމަދު މުއިއްޒުގެ ފަރާތްޕުޅުންނާއި ދިވެހި ރައްޔިތުންގެ ފަރާތްޕުޅުން ރައީސް ޝީ އަށާއި ޗައިނާގެ ރައްޔިތުންނަށް ހެޔޮއެދުންތަކާއި ވެދުމާއި ސަލާން އަރިސްކުރައްވާފަ އެވެ.
ރާއްޖެއިން ޗައިނާއަށް ކަނޑައަޅުއްވާ ސަފީރުގެ މަގާމާ ފަޒީލް ހަވާލުވެވަޑައިގަތުމުން އެމަނިކުފާނަށް ރައީސް ޝީ ތަހުނިޔާ ވިދާޅުވި އެވެ.
އަދި ރާއްޖެ އާއި ޗައިނާ އާ ދެމެދު އޮތް ގާތްގުޅުން އިތުރަށް ބަދަހިކުރުމުގެ މަސައްކަތުގައި އެމަނިކުފާނުގެ ފުރިހަމަ އެއްބާރުލެއްވުން ލިބިވަޑައިގަންނަވާނެކަން ކަށަވަރުކޮށްދެއްވި އެވެ.
މި ރަސްމިއްޔާތުގައި ސަފީރުގެ އަރިހުގައި އެމަނިކުފާނުގެ އަނބިކަނބަލުން އާމިނަތު ފަރީޝާ ބައިވެރިވެވަޑައިގެންނެވި އެވެ.
ރާއްޖެ އާއި ޗައިނާ ސިޔާސީ ގުޅުން ގާއިމުކުރީ 1972 ވަނަ އަހަރުގެ އޮކްޓޫބަރު މަހުގެ 14 ވަނަ ދުވަހު އެވެ. ސަފީރު ފަޒީލްއަކީ ރާއްޖެއިން ޗައިނާއަށް ކަނޑައެޅި 5 ވަނަ ސަފީރެވެ.
