ހައުސިން މިނިސްޓްރީގެ ހުރިހާ ޑޭޓާއެއް ގެއްލުމުގެ ބިރު ބޮޑުވެއްޖެ
އިއްޔެގެ ހެނދުނުގެ ވަގުތެއްގައި އެ މިނިސްޓްރީ ހިންގަމުން އައި މ. ގްރީން ބިލްޑިންގައި ހިނގި ނުރައްކާތެރި އަލިފާނުގެ ހާދިސާ އާ ގުޅިގެން މިނިސްޓްރީގެ ސާވާއަށް ވެސް ވަރަށް ބޮޑަށް ގެއްލުންވެ، އެއަށް "އެކްސެސް" ވުމުގެ ފުުރުސަތު ވަރަށް ކުޑަ ކަމަށް ހައުސިން، ލޭންޑް އެންޑް އާބަން ޑިވެލޮޕްމަންޓް މިނިސްޓަރު ޑރ. އަލީ ހައިދަރު އަހްމަދު ވިދާޅުވެއްޖެ އެވެ.
ދައުލަތުގެ މީޑިއާއަށް ދެއްވި އިންޓަވިއުއެއްގައި ހައިދަރު ވިދާޅުވީ އަލިފާނުގައި އެ މިނިސްޓްރީގައި ހުރި ހުރިހާ ލިޔެކިޔުންތަކާ އަދި ޑޭޓާއެއް ނެތި ގޮސްފައިވާ ކަމަށެވެ.
އަދި މިހާރު އަންދާޒާކުރެވިފައިވާ ގޮތުން ހައުސިން މިނިސްޓްރީގެ ސާވާ ސަލާމަތް ނުކުރެވޭނެ ކަމަށް މިނިސްޓަރު ފާހަގަކުރެއްވި އެވެ.
"އެހެންވެއްޖިއްޔާ އެއީ ވަރަށް ބޮޑު ގެއްލުމެއް. އެއީ އަޅުގަނޑުމެންގެ އަތުގައި ހުރި ހުރިހާ މައުލޫމާތެއް ގެއްލިގެން އެ ދިޔައީ. ވަރަށް ގިނަ މުވައްޒަފުންގެ މައުލޫމާތު އަދި އަޅުގަނޑުމެން ކުރަމުންދިޔަ ހުރިހާ މަޝްރޫއުތަކެއްގެ މައުލޫމާތު ވެސް ރައްކާކުރެވިފައި ހުންނާނީ ސާވާގައި" ހައިދަރު ވިދާޅުވި އެވެ.
މިނިސްޓަރު ވިދާޅުވީ އެ ސާވާއަށް "އެކްސެސް" ނުވެވޭނަމަ އެ މައުލޫމާތުތައް ހޯދޭނެ ގޮތެއް ނޯންނާނެ ކަމަށެވެ.
އަދި ހުރިހާ ލިޔެކިއުމެއް އަނދައިގެން ދިޔަ ދިއުމަކީ ވަރަށް ބޮޑު ގެއްލުމެއް ކަމަށް ވެސް ފާހަގަކުރެއްވި އެވެ.
އަލިފާނުގެ ހާދިސާ އާ ގުޅިގެން އެ މިނިސްޓްރީގެ އިތުރުން ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓްރީ އަދި ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީ މިނިސްޓްރީ ހިންގަމުން އަންނަ ގްރީން ބިލްޑިން ވަނީ ބޭނުން ނުކުރެވޭ ވަރަށް އަނދާފަ އެވެ. އަދި އެ ކޮށީގައި ހިންގަމުން އައި މާލެ ސިޓީ ކައުންސިލުގެ ލޭންޑް ބިލްޑިން އެންޑް ވައިޓަލް ސާވިސަސް ޑިޕާޓްމަންޓަށް ވެސް އަލިފާނުގެ އަސަރުކޮށްފައިވެ އެވެ.
