ދުވާފަރު އެމްޑީޕީ ކައުންސިލަރު ޔަޝްފާ ފުލުހަށް ހާޒިރުކުރަނީ
އިދިކޮޅު އެމްޑީޕީން ކާނިވާ ސަރަހައްދުގައި ބޭއްވި ޖަލްސާ އެއްގައި "ތީ ބަހުލޫލެކޭ" ލަވަކި ރ. ދުވާފަރުގެ އެމްޑީޕީ ކައުންސިލަރު, މަރިޔަމް ޔަޝްފާ ފުލުހަށް ހާޒިރުވާން އަންގައިފި އެވެ.
"ދެން" އާ ވާހަކަ ދައްކަމުން ޔަޝްފާ ވިދާޅުވީ ދުވާފަރު ޕޮލިސްޓޭޝަނުން ބަލަމުންދާ މައްސަލައެއްގައި އެ ޕޮލިސް ސްޓޭޝަނަށް ހާޒިރުވާން އެންގުމަށް ރޭ 8:10 ހާއިރު ފުލުުހުން ގުޅި ކަމަށެެވެ.
އެކަމަކު މި ވަގުތު ހުރީ ރަށުގައި ނޫންކަން ފުލުހުންނަށް އަންގާފައިވާނެ ކަމަށް ޔަޝްފާ ވިދާޅުވި އެވެ.
"ދެން މާލެ ޕޮލިހުން ގުޅާލާފައި ބުނެފި އެއީ ދަނޑިކޮށި ޖަގަހައިގާ އަޅުގަނޑު ދެއްކި ވާހަކައަކާ ގުޅޭ ގޮތުން ސުވާލުތަކެއް ކޮށްލަންވެގެންނޭ."
މާދަމާ ހެނދުނު 10:30 އަށް ފުލުހުންގެ ޝާޖަންޓް އާދަމް ހަލީމް ކްރިމިނަލް އިންވެސްޓިގޭޝަން ބިލްޑިންއަށް ހާޒިރުވާން ޗިޓު ލިބިފައިވާ ކަމަށް ޔަޝްފާ ވިދާޅުވި އެވެ.
ޔަޝްފާ ވިދާޅުވީ އެ ދަނޑިކޮށި ޖަގަހައިގައި ވާހަކަ ދެއްކީ ދުވާފަރު ކައުންސިލް މެންބަރުގެ ހައިސިއްޔަތުން ކަމަށެވެ.
އެ ރަށުގައި ކުރިއަށް ދިޔަ މަޝްރޫއުތައް ހުއްޓިފައި ހުރި ވާހަކައާއި އެ މަސައްކަތްތައް ނުފެށި ލަސްވާ ވާހަކައިގެ އިތުރުން ބައެއް މަސައްކަތްތައް އުނިކޮށްފައި ހުރި ވާހަކަވެސް އެ ރޭ ދައްކާފައިވާނެ ކަމަށް އޭނާ ވިދާޅުވި އެވެ.
އެ ޖަލްސާގައި ރައިވަރެއް ކިޔާފައިވާނެކަން ފާހަގަކޮށް ޔަޝްފާ ވިދާޅުވީ އެ ރައިވަރުގައި ވަކި މީހެއްގެ ނަން ހިމަނާފައި ނުވާނެ ކަމަށެވެ.
ދާދިފަހުން "ގާނޫނުއަސާސީގެ ދިފާއުގައި" ނަމުގައި ކާނިވާ ސަރަހައްދުގައި އެމްޑީޕީން ބޭއްވި ޖަލްސާއެއްގައި ޔަޝްފާ ކިޔާފައިވާ ލަވަ ދަނީ ދައުރުވަމުންނެވެ.
Ads by STO
