މައުރޫފްއަށް އިތުބާރު އެބައޮތް، ނަޒާހަތްތެރިވާނެ: ރައީސް
އެޗްޑީސީގެ މެނޭޖިން ޑިރެކްޓަރުގެ މަގާމަށް އައްޔަނުކުރެއްވި މުހައްމަދު މައުރޫފް ޖަމީލުއާ މެދު އިތުބާރު އެބައޮތް ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ޝަރުތު ހަމަނުވިޔަސް ގޯތި ދޫކުރި މީހުންގެ ތެރޭގައި އެޗްޑީސީގެ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ ބޭބެ އަދި އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދު ހިމެނި ފާޑުކިއުންތައް އަމާޒުވެ މަގާމުން ސަސްޕެންޑްވެސްކޮށްފައި ހުއްޓާ ފަޒުލް އިސްތިއުފާ ދެއްވިީ އިއްޔެ އެވެ.
އެއާއެކު މިއަދު ވަނީ މައުރޫފް އެ މަގާމަށް އައްޔަނުކުރައްވައިފަ އެވެ.
މީޑިއާއަކަށް މިއަދު ދެއްވި އިންޓަވިއުއެއްގައި ރައީސް ވިދާޅުވީ އެޗްޑީސީގެ ކަންކަން ކުރިއޮތް ތަނުގައި ދެން ރަނގަޅުވާނެ ކަމުގެ ޔަގީންކަން އެބައޮތް ކަމަށެވެ.
އެގޮތުން މިއަދު އައްޔަނުކުރެއްވި މައުރޫފަށް އިޝާރާތް ކުރައްވައި ރައީސް ވިދާޅުވީ މައުރޫފަކީ ނަޒާހަތްތެރިކަން އެންމެ ފުރިހަމައަށް ހިފަހައްޓަވާނެ ބޭފުޅެެއް ކަމަށެވެ.
އަދި މައުރޫފަށް ފުރިހަމައަށް އިތުބާރު އެބައޮތް ކަމަށާއި އަދި މަގާމުގަ މަސްއޫލިއްޔަތުގައި ސާބިތުކަމާއެކު މައުރޫފް ޕްރޮފެޝަނަލިޒަމްއާއެކު މަސައްކަތް ކުރައްވާނެ ކަމަށް ވެސް ރައީސް ވިދާޅުވި އެވެ.
އިތުރަށް ވިދާޅުވީ އެއްވެސް މުއައްސަސާއެއްގެ ތެރޭގައި ކޮރަޕްޝަންއަށް ޖާގަ ދޭން ބޭނުންނުވާ ކަމަށެވެ.
"އެހެން ކުންފުންޏެއްގައި ވެސް އެ ކަހަލަ ކަމެއް ހިނގަން ފުރުސަތެއް ނުދޭނަން. މިނިސްޓްރީއެއްގައި ވިޔަސް، އެހެން އޮފީހެއްގައި ވިޔަސް." ރައީސް ވިދާޅުވި އެވެ.
މައުރޫފް ވަނީ ހުޅުމާލެ ހިއްކަން ފެށި ދުވަސްވަރު ކޮންސްޓްރަކްޝަން މިނިސްޓްރީގައި ހުންނަވައިގެން މަޝްރޫއު ކުރިއަށް ގެންދިއުމުގައި އިސް ދައުރެއް އަދާކުރައްވާފަ އެވެ.
އެ ފަހުން ރައީސް އޮފީހުގެ ދަށުން ހުޅުމާލެ ޑިވެލޮޕްމަންޓް ޔުނިޓް އުފެއްދިއިރު އެ ޔުނިޓުގައި އެންމެ އިސްކޮށް ހުންނެވީ އޭނާ އެވެ. އަދި އެޗްޑީސީގެ ސީއީއޯގެ މަގާމު ވެސް ދުވަސްކޮޅަކަށް އަދާކުރެއްވި އެވެ.
