މެޓުން ލަފާކުރަނީ ކުރިއަށް އޮތް ތިން ދުވަހު ވިއްސާރަވެދާނެ ކަމަށް
އާއަހަރު ފާހަގަކުރުމަށް ރާއްޖޭގެ އެކި ސަރަހައްދުތަކަށް މީހުން ދަތުރުކުރަން ފަށާފައިވާއިރު، ކުރިއަށް އޮތް 3 ދުވަހު ރާއްޖޭގެ އެކި ހިސާބުތަކަށް މޫސުން ގޯސްވާނެ ކަމަށް މޫސުމާ ބެހޭ ގައުމީ އިދާރާ (މެޓު) އިން ލަފާކޮށްފި އެވެ.
މެޓުގެ މީޓިއޮރޮލޮޖިސްޓް އަބްދުﷲ ހާފިޒް "ދެން" އަށް މިއަދު ވިދާޅުވީ ކުރިއަށް އޮތް 3 ދުވަހު މެދު ރާއްޖެ ތެރެއަށާއި އުތުރުގެ އަތޮޅުތަކަށް މޫސުން ގޯސްވާނެ ކަމަށް ލަފާކުރެވޭ ކަމަށެވެ. ދެކުނުގެ އަތޮޅުތަކަށް ކެރީގެ އަސަރުކުރާނެ ކަމަށް ހާފިޒް ވިދާޅުވި އެވެ.
"މެދު ރާއްޖެ، އުތުރަށް ފުދޭވަރަކަށް ވާރޭގެ ފަހި ފުރުސަތުތަކެ އެބައޮތް. ދެކުނަށް މާ ބޮޑު ވާރޭއެއް ނެތް" އޭނާ ވިދާޅުވި އެވެ.
ހާފިޒް ވިދާޅުވީ ރާއްޖެއާ ދުރުގައި މި ވަގުތު އުޅޭ ސާކިއުލޭޝަންއެއްގެ ސަބަބުން ވައިބާރުވުމުގެ ފުރުސަތުވެސް ބޮޑު ކަމަށެވެ.
މި މަހު މާލެއާއި ރާއްޖޭގެ އެކި ސަރަހައްދުތަކަށް ކުރި ވިއްސާރަގައި ބޯކޮށް ވާރޭވެހި ފެންބޮޑުވެ ބޮޑެތި ގެއްލުންތަކެއް ލިބުނެވެ. އަތޮޅު ތެރޭގެ 80 އަށްވުރެ ގިނަ ގެއެއްގެ އިތުރުން މާލޭގެ 30 ގެއަކަށް ވެން ވަދެ އެކި ވަރުގެ ގެއްލުންތައް ލިބިފައިވެ އެވެ.
އަތޮޅު ތެރެއިން އެންމެ ބޮޑު ގެއްލުމެއް ލިބުނީ ނ ހެނބަދޫ އަށެވެ. މާލޭގެ 8 ގެއެއްގެ ބަޔަކަށް ވަގުތީ ބޯހިޔާވަހިކަންވެސް ހަމަޖައްސައިދިނެވެ.
