ސުމިތު ފުރައްސާރަ ކުރި މައްސަލައިގެ ތަހުގީގު ނިމި، ޕީޖީ އޮފީހަށް ފޮނުވުމުގެ މަސައްކަތް ދަނީ ކުރަމުން
ރޭޕް ކުރުމަށް ހިތްވަރު ލިބޭފަދަ އިބާރާތަކުން، ޓޫރިޒަމް މިނިސްޓްރީގެ ސީނިއާ އެގްޒެކެޓިވްގެ މަގާމުގައި ހުރި އަލީ ހާޝިމް (ސްމިތު) ޓްވީޓެއް ކުރި މައްސަލައިގެ ތަހުގީގު ނިމި، ޕްރޮސެކިއުޓާ ޖެނެރަލް (ޕީޖީ) އޮފީހަށް ފޮނުވުމަށް ކުރަންޖެހޭ މަސައްކަތް ދަނީ ކުރަމުން ކަމަށް ފުލުހުން ވިދާޅުވެއްޖެއެވެ.
ސުމިތު ދެއްކި ވާހަކައަކަށް ޓްވިޓާގައި ރައްދު ދިން އަންހެނަކާއި ދިމާލަަށް އޭނާ ބުނެފައިވަނީ " (އެއަންހެންމީހާ) ރޭޕް ކުރީމަ ކަޑަވަނީ ދޯ" ކަމުގައެވެ.
ސުމިތު އެޓްވީޓު ކޮށްފައިވަނީ މިއަހަރުގެ ޖުލައިމަހުގެ 12 ވަނަ ދުވަހުގައެވެ. އެޓްވީޓު އޭނާ ޑިލީޓު ކުރި ނަމަވެސް، އޭނާ އާއި ދެކޮޅަށް ފުރައްސާރައިގެ މައްސަލައެއް ހަމަ އެދުވަހު ފުލުހަށް ހުށަހެޅިއެވެ.
އޮންލައިން ނޫސް "ސަން" އަށް މައުލޫމާތު ދެމުން ފުލުހުންގެ މީޑިއާ އޮފިޝަލަކު ވިދާޅުވެފައިވަނީ މައްސަލަ ފުލުހުންގެ ޖެންޑާ އެންޑް ފެމިލީ ޑިޕާޓްމަންޓުން ތަހުގީގު ކުރަމުން އަންނަ ކަމަށާއި އެ މައްސަލައާ ގުޅިގެން މިހާތަނަށް ފުލުހުންގެ ބެލުމުގެ ދަށަށް އެއްވެސް މީހަކު ގެންގޮސްފައި ނުވާކަމަށެވެ.
"މައްސަލައިގެ ތަހުގީގު ފުރިހަމަކޮށް ޕީޖީ އަށް ފޮނުވުމަށް ކުރަންޖެހޭ މަސައްކަތް މިހާރު ދަނީ ކުރަމުން،" އޮފިޝަލް ވިދާޅުވެފައިވެއެވެ.
