އަތުހަރު މަރުވި މައްސަލައިގައި ދެ ފުލުހަކަށް ދައުވާ ކުރަން ފޮނުވައިފި
ފުލުހުންގެ ބެލުމުގައި ދަށުގައި ހުއްޓައި އަމިއްލައަށް މަރުވާން މަސައްކަތް ކުރުމާ ގުޅިގެން ފަރުވާ ދެމުން ދަނިކޮށް މަރުވި އާދަމް އަތުހަރު، މަރުވި މައްސަލައިގައި ދެ ފުލުހެއްގެ މައްޗަށް ދައުވާކޮށްދިނުމަށް ޕްރޮސިކިއުޓާ ޖެނެރަލްގެ އޮފީހަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް) އިން އެދިއްޖެ އެވެ.
އަންހެނެއްގެ ކަރުގައި ވަޅި ޖައްސައި ރަހީނުކުރި މައްސަލައިގައި ށ. މިލަންދޫ، ހެޕީލޭންޑް އަތުހަރު (32އ) ހައްޔަރުކުރީ މިދިޔަ އޮގަސްޓް މަހުގެ 29 ވަނަ ދުވަހު އެވެ. މައްސަލައިގައި ދޫނިދޫގައި ބަންދުގައި ކޮށްފައި ހުއްޓާ އަމިއްލައަށް މަރުވާން މަސައްކަތްކޮށްގެން ހާލު ދެރަވެ، ފަރުވާދެމުން ދަނިކޮށް އޭނާ މަރުވެފައި ވަނީ ސެޕްޓެމްބަރު މަހުގެ ދެ ވަނަ ދުވަހު އެވެ.
ޕޯސްޓްމޯޓަމް ހެދުމަށް އަތުހަރުގެ ހަށިގަނޑު ރާއްޖެއިން ބޭރަށް ފޮނުވީ ސެޕްޓެމްބަރު މަހުގެ 5 ވަނަ ދުވަހު އެވެ. ހަށިގަނޑު އަނބުރާ ގެނެސް ވަޅުލާފައި ވަނީ އެ މަހުގެ 8 ވަނަ ދުވަހު އެވެ.
މިދިޔަ ސެޕްޓެމްބަރު މަހުގެ 18 ވަނަ ދުވަހު ބޭއްވި ނޫސްވެރިންގެ ބައްދަލުވުމުގައި އަތުހަރުގެ މަރާ ގުޅޭ ގޮތުން ފުލުހުންގެ ޗީފް ސުޕްރިޓެންޑެންޓް އޮފް ޕޮލިސް ހަސަން ޝިފާއު ވިދާޅުވެފައިވާ ގޮތުގައި އޭނާ މަރުވީ އަމިއްލައަށް މަރުވާން ކުރި މަސައްކަތްތަކުގެ ސަބަބުން ކަމަށް އޮޓޮޕްސީން ދައްކާ ކަމުގަ އެވެ.
ފުލުހުންގެ ބެލުމުގެ ދަށަށް އަތުހަރު ގެންގޮސް މަރުވުމާ ހަމައަށް އެ އިދާރާއިން އަމަލުކޮށްފައިވާ ގޮތް ބެލުމަށް އެޗްއާރުސީއެމުން ވަނީ ތަހުގީގެއް ކުރިއަށް ގެންގޮސްފަ އެވެ.
އެކަމާ ގުޅޭގޮތުން އެޗްއާރުސީއެމްގެ ސީނިއާ މީޑިއާ އޮފިސަރު އަލީ ޒާޖިލް ޝަހީދު މިއަދު "ދެން" އަށް ވިދާޅުވީ އަތުހަރުގެ މައްސަލައިގައި ޝާމިލުވާ ދެ އޮފިސަރެއްގެ މައްޗަށް ދައުވާ ކޮށްދިނުމަށް ޕީޖީ އޮފީހަށް ފޮނުވާފައިވާ ކަމަށެވެ. ކަމާ ގުޅޭ އިތުރު ތަފުސީލެއް އޭނާ ދެއްވާފައެއް ނުވެ އެވެ.
އެޗްއާރުސީއެމްގެ އިތުރުން ނޭޝަނަލް އިންޓެގްރިޓީ ކޮމިޝަނުން އަތުހަރުގެ މަރުގެ މައްސަލަ ތަހުގީގު ކުރަމުންދާކަން ހާމަކުރި އެވެ. އަދި އަމިއްލައަށް މަރުވާން އޭނާއަށް ފުރުސަތު ލިބުނު ގޮތާ ގުޅޭ އިންޓާނަލް ތަހުގީގެއް ކުރަމުން އަންނަ ކަމަށް ފުލުހުން ވެސް މީގެކުރިން ބުނެފައިވެ އެވެ.
އެހެންނަމަވެސް، އެކަމާ ގުޅޭގޮތުން އެއްވެސް މައުލޫމާތެއް ނޭޝަނަލް އިންޓެގްރިޓީ ކޮމިޝަނާއި ފުލުހުންގެ ފަރާތުން ހާމަކޮށްފައެއް ނުވެ އެވެ.
Ads by STO
