ލޯންޗަކުން ޖެހި ފަތުރުވެރިއަކު މަރުވެއްޖެ
އދ. އަތޮޅުގެ ރިސޯޓެއްގައި ޗުއްޓީ ހޭދަކުރަމުންދިޔަ ފަތުރުވެރިއަކު މޫދުގައި ހަރަކާތްތެރިވަނިކޮށް ދަތުރުކޮށްފައި ދިޔަ ލޯންޗަކުން ޖެހި މަރުވެއްޖެ އެވެ.
އެ ހާދިސާ ހިނގާފައި ވަނީ މިއަދު ހެނދުނު 10:00 ޖަހާކަންހާއިރު އެވެ.
މީޑިއާތަކަށް ފޮނުވި މެސެޖެއްގައި ފުލުހުން ބުނީ އެ މީހާއަކީ އދ. އަތޮޅުގެ ރިސޯޓެއްގައި ޗުއްޓީ ހޭދަކުރަމުންދިޔަ ފަތުރުވެރިއެއް ކަމަށެެވެ. އެ ހާދިސާ ހިނގީ ރެޑިސަން ބްލޫ މޯލްޑިވްސް ރިސޯޓު ބޭރު މޫދުގައި އެ މީހާ އުޅެނިކޮށް ކަމަށެވެ.
".. ރިސޯޓު ބޭރު މޫދުގައި އުޅެނިކޮށް އައިކޮމް ގްރީން ނަމަކަށް ކިޔާ ލޯންޗަކުން ޖެހި މީހާ ނިޔާވެފައިވާ މައްސަލަ ފުލުހުންނަށް ރިޕޯޓުކޮށްފައިވޭ،" މެސެޖުގައިވެ އެވެ.
މަރުވެފައި ވަނީ އާޖެންޓީނާއަށް ނިސްބަތްވާ އުމުރުން 55 އަހަރުގެ ފިރެހެނެއް ކަމަށް ފުލުހުން ބުންޏެވެ.
މި މައްސަލަ ފުލުހުން ގެންދަނީ ތަހުގީގު ކުރަމުންނެވެ.
މިއީ މިގޮތަށް ކަނޑުމަތީގެ ހާދިސާއެއްގައި ފަތުރުވެރިއަކު މަރުވި ކަމަށް މި އަހަރު ރިޕޯޓުކުރި ފުރަތަމަ ފަހަރެވެ.
