ހައި ވޯލްޓޭޖް ދެ ޓްރާންސްފޯމަރަކަށް ގެއްލުންދީ، ބައިތައް ވަގަށް ނަގައިފި
ހުޅުމާލޭ ފޭސް ދޭއްގައި ހުންނަ ސްޓެލްކޯގެ ދެ ޓްރާންސްފޯމަރަކަށް ގެއްލުންދީ، އޭގެ ބައިތަކެއް ވަގަށް ނަގާފައިވާ ކަމަށް އެ ކުންފުނިން މިއަދު ބުނެފި އެވެ.
ރަސްމީ އެކައުންޓުން "އެކްސް" ގައި ކުރި ޕޯސްޓެއްގައި ސްޓެލްކޯގެ އެމްޑީ ހުސެއިން ފަހުމީ ވިދާޅުވީ ހައި ވޯލްޓޭޖް ދެ ޓްރާންސްފޯމަރަށް ގެއްލުން ދިނުމުގެ ސަބަބުން ފޭސް ދޭއްގެ ކަރަންޓުގެ ހިދުމަތް ދިނުމަށް ބޮޑެތި ހުރަސްތަކެއްވެސް ކުރިމަތިވި ކަަމަށެވެ.
''ޓްރާންސްފޯމަރުތައް ރައްކާކުރަން ފާރުތަކާއި ޑަބަލް ތަޅުތައް އަޅުވާފައިވީ ނަމަވެސް، ވަގުން ވަނީ ގޭޓުތައް ހަލާކުކޮށް، ސިސްޓަމަށް ގެއްލުން ދީފައި" ފަހުމީގެ ޕޯސްޓުގައި ވިދާޅުވި އެވެ.
ފަހުމީ ވިދާޅުވި ގޮތުގައި ބެލިބެލުމުން އެނގޭ ގޮތުގައި އެކަން ކޮށްފައިވަނީ ޓްރާންސްފޯމަރުގެ މަސައްކަތްތައް ހިނގާ ގޮތް ގޮތް ރަނގަޅަށް އެނގޭ ބަޔަކު ކަމަށެވެ.
އެފަދަ މުހިންމު ނިޒާމުތަކަށް ގެއްލުން ދިނުމަކީ ނުރައްކާތެރި ކަމެއްކަން ފާހަގަކޮށް ފަހުމީ ވިދާޅުވީ އޭގެ ސަބަބުން ކަރަންޓު ޝޮކު ލިބުމާއި، ސީރިއަސް ޒަހަމްތައް ލިބުން އެކަށީގެންވާ ކަމަށެވެ.
މިދިޔަ އަހަރު ޓްރާންސްފޯމަރަށް ގެއްލުން ދޭން އުޅެނިކޮށް ކަރަންޓުގައި ޖެހި މީހަކު މަރުވެފައިވާއިރު، ޓްރާންސްފޯމަރުން ވައްކަން ކުރި ބަޔަކުވެސް ހައްޔަރުކުރި އެވެ.
ފަހުމީ ވިދާޅުވީ އެކަން ތަކުރާރުވިޔަ ނުދިނުމަށް ފިޔަވަޅުތައް އަޅަމުން އަންނަ ކަމަށެވެ.
Ads by STO
