ދުނިޔޭގެ އެންމެ ބާރު ހައިޑްރޮޖަން ޓްރެއިން އިންޑިއާއިން އުފައްދައިފި
އިންޑިއާގެ ރެއިލްވޭ މިނިސްޓްރީން ދުނިޔޭގެ އެންމެ ބާރު ހައިޑްރޮޖަން ޓްރެއިން އިންޖީނު އުފައްދައިފި އެވެ.
މި އައު އިންޖީނު ތައްޔާރުކޮށްފައިވަނީ އިންޑިއާގެ ރެއިލްވޭ މިނިސްޓްރީގެ ދަށުން ހިންގާ ޑީޒަލް ލޮކޮމޯޓިވް ވާކްސް (ޑީއެލްޑަބްލިއު) އިންނެވެ. މި އިންޖީނަކީ ތިމާވެއްޓާ ރައްޓެހި، ދެމެހެއްޓެނިވި ހަކަތަ ބޭނުންކޮށްގެން ހިންގާ އިންޖީނެކެވެ. މި އިންޖީނުގެ ޓެސްޓިންގް މަސައްކަތްތައް ކުރިއަށް ގެންދިއުމަށް ހަމަޖެހިފައިވަނީ ސޮނީޕަތު-ޖިންދު ދަތުރު މަގުގަ އެވެ.
ރެއިލްވޭ މިނިސްޓްރީގެ އިސް އޮފިޝަލެއް ވިދާޅުވީ މި އިންޖީނަކީ 4500 ހޯސްޕަވާގެ ބާރު ހުރި އިންޖީނެއް ކަމަށެވެ. އަދި މިއީ ދުނިޔޭގެ އެންމެ ބާރު ހައިޑްރޮޖަން ޓްރެއިން އިންޖީނު ކަމަށްވެސް އެ އޮފިޝަލް ވިދާޅުވި އެވެ.
މި އިންޖީނު ބޭނުންކޮށްގެން ދުއްވާ ޓްރެއިނުގެ މަތީ ސްޕީޑަކީ ގަޑިއަކު 95 ކިލޯމީޓަރެވެ. އަދި މި އިންޖީނުގައި 1000 ކިލޯގްރާމްގެ ހައިޑްރޮޖަން ފިއުލް ޓޭންކެއް ހަރުކޮށްފައިވެ އެވެ. މި ޓޭންކުގައިވާ ފިއުލް ބޭނުންކޮށްގެން އެއްފަހަރާ 600 ކިލޯމީޓަރުގެ ދުރު ދަތުރެއް ކުރެވޭނެ ކަމަށް ރެއިލްވޭ މިނިސްޓްރީން ބުނެފައިވެ އެވެ.
އިންޑިއާގެ ބަޖެޓުގައި ހައިޑްރޮޖަން ޓްރެއިން ޕްރޮޖެކްޓަށް ހާއްސަ ސަމާލުކަމެއް ދީފައިވާ ކަމަށް ރެއިލްވޭ މިނިސްޓްރީން ބުނެ އެވެ. އަދި މި މަޝްރޫއުގެ ސަބަބުން އިންޑިއާގެ ރެއިލްވޭ ދާއިރާއަށް އައު ހަކަތައެއް ލިބި، ތިމާވެށި ހިމާޔަތްކުރުމަށް އިތުރު ބާރެއް ލިބޭނެ ކަމަށް އުއްމީދުކުރެވެ އެވެ.
