ރާއްޖެއާއި ބެހޭގޮތުން ދޮގު ވާހަކަތައް ފެތުރި ނަސް މިހާރު އުޅެނީ އިޒްރޭލުގެ އަނިޔާވެރިކަން މަތިއެޅުމުގައި!
ރާމަﷲ (ކިޔުއެންއެން): އިޒްރޭލުގެ އަނިޔާވެރިކަން މަތިއަޅާ ފޮރުވަން އުޅޭތީ ބޯއިކޮޓް ޑައިވެސްޓްމެންޓް ސޭންކްޝަންސް (ބީޑީއެސް) އިން ވްލޮގަރ ނުސެއިރު ޔާސިން (ނަސް) ބޯއިކޮޓް ކުރަން ގޮވާލައިފިއެވެ.
ބީޑީއެސް އިން ބުނެފައިވާ ގޮތުގައި ނަސް އުޅެނީ އިޒްރޭލުގެ އަނިޔާވެރިކަން މަތިއަޅާ، އެޤައުމުން ފަލަސްތީނުގެ ރައްޔިތުންނަށް ދެމުންގެންދާ އަނިޔާއަކީ އާދައިގެ ކަމަކަށް ހަދާށެވެ. މީގެއިތުރުން ފަލަސްތީނަށްދޭ ހަމަލާތަކަކީ ލާއިންސާނީ ޢަމަލުތަކެއް ނޫން ކަމުގައި ހެދުމަށް ވެސް ނަސް ވަނީ މަސައްކަތް ކޮށްފައި ކަމަށް ބީޑީއެސް އިން ވަނީ ބުނެފައެވެ.
"ނުސެއިރު ނުވަތަ ނަސް އަކީ އިޒްރޭލުގެ ނުބައި ޢަމަލުތައް ފޮރުވާ، އިޒްރޭލަކީ އެޤައުމާއި ގުޅިފައިވާ ޔޫއޭއީ އާއި ބަހްރޭން އާއެކު އެކުވެރި ގުޅުމެއް ބާއްވަން މަސައްކަތް ކުރަމުންދާ މީހެއް. އޭނާ ބުނަމުން ދަނީ، ފަލަސްތީނާއި އިޒްރޭލާއި ދެމެދު އޮތް ހަމަނުޖެހުންތަކުގެ ޙައްލަކީ ހުރިހާ ޢަރަބި ޤައުމަކުން ވެސް އިޒްރޭލާއި ގުޅުން ކަމަށް" ބީޑީއެސް އިން ބުނެފައިވެއެވެ.
ތިމާއަކީ މުސްލިމެއްކަމުގައި އެއްއިރަކު ބުނި ކަމުގައިވިޔަސް، އެއްވެސް ދީނެއް ޤަބޫލު ނުކުރާ ކަމަށް ފަހުން ބުނެފައިވާ ނަސް އަކީ، އިސްލާމްދީނުގެ އުސޫލުތަކާއި ހަމަތަކަށް ވަރަށް ބޮޑަށް ފާޑުކީ މީހެކެވެ. އެގޮތުން އޭނާ ވަނީ މީގެ ދެ އަހަރު ކުރިން ރާއްޖެ އައިސް، ރާއްޖެ އާއި ބެހޭގޮތުން ވެސް ހަގީގަތާއި ޚިލާފު ވާހަކަތަކެއް ދައްކާ މުޅި ދުނިޔޭގައި ރާއްޖޭގެ އަގު ވައްޓާލާފައެވެ.
އެގޮތުން ނަސް އާއި (އެއްވެސް ދީނެއް ޤަބޫލު ނުކުރާ) އޭނަގެ ލޯބިވެރިޔާ އެލީން ވަނީ ރާއްޖޭގެ އަންހެން ކުއްޖަކާއި އިންޓަވިއުކޮށް، އޭނާ ބުރުގާ އަޅައިގެން އުޅެނީ ގަދަބާރުން ކަމަށް ބުނެފައެވެ. އަދި ރާއްޖޭގައި ހަރުކަށި މުސްލިމުން އުޅޭކަމަށް ވެސް ނަސް ވަނީ އަޑުފަތުރާފައެވެ.
އެކަމުގެ ހަގީގަތް ނަސް އަށް ހާމަ ކުރަން ފެށުމުން އެއިރު އޭނާވަނީ އޭނަގެ ފޭސްބުކް ޕޭޖަށް އެއްވެސް ދިވެއްސަކަށް ނުވަދެވޭ ގޮތް ވެސް ހަދާފައެވެ.
Ads by STO
