އިންޑިއާގެ ސްޓާޓްއަޕް ޕްރޮގްރާމުގެ ކާމިޔާބީކަން ފެނިގެންދޭ: މޯދީ
އިންޑިއާގެ ސްޓާޓްއަޕް ޕްރޮގްރާމްގެ ކާމިޔާބުކަން މިއަދުގެ އިންޑިއާގެ ކުރިއެރުމުން ފެނިގެންދާކަމަށް އެ ގައުމުގެ ބޮޑުވަޒީރު ނަރެންދްރަ މޯދީ ވިދާޅުވެއްޖެ އެވެ.
ސްޓާޓްއަޕް އިންޑިއާ ޕްރޮގްރާމް ފެށުނުތާ 8 އަހަރުފުރުމާ ގުޅިގެން ބޭއްވުނު ހަފްލާގައި ވާހަކަދައްކަވަމުން އިންޑިއާގެ ބޮޑުވަޒީރު މޯދީ ވިދާޅުވީ މި ޕްރޮގްރާމްގެ ސަބަބުން އިންޑިއާއަކީ ހަރަކާތްތެރި، އިތުބާރު ހުރި އަދި މުސްތަގުބަލަށް ތައްޔާރު ގައުމެއްކަން ދައްކުވައިދޭ ކަމަށެވެ.
މޯދީ ވަނީ ޕްރޮގްރާމްގެ ސަބަބުން އިންޑިއާގެ ސްޓާޓްއަޕް އިކޯސިސްޓަމް ބޮޑު ކުރިއެރުމެއް ހޯދާފައިވާކަންވެސް ފާހަގަކުރައްވާފަ އެވެ.
އެގޮތުން މިހާރުވެސް އިންޑިއާގައި 1 ލައްކައަށްވުރެ ގިނަ ސްޓާޓްއަޕްތައް ރަޖިސްޓްރީ ކޮށްފައިވާކަން މޯދީ ފާހަގަކުރެއްވި އެވެ. މީގެތެރެއިން 110 ކުންފުންޏެއް ޔުނިކޯން ސްޓޭޓްސް ހޯދާފައިވާއިރު، ޕްރޮގްރާމްގެ ސަބަބުން 10 ލައްކައަށްވުރެ ގިނަ ވަޒީފާތައް އުފެދިފައިވާކަމަށް މޯދީ ވިދާޅުވި އެވެ.
ސްޓާޓްއަޕް އިންޑިއާ ޕްރޮގްރާމަކީ 2016 ވަނަ އަހަރު ފެށުނު ޕްރޮގްރާމެކެވެ. މި ޕްރޮގްރާމްގެ މައިގަނޑު މަގްސަދަކީ އިންޑިއާގައި އާ ވިޔަފާރިތައް ފެށުމަށް ހިތްވަރުދީ، އެފަދަ ވިޔަފާރިތަކަށް ބޭނުންވާ އެހީތެރިކަން ފޯރުކޮށްދިނުމެވެ.
މި ޕްރޮގްރާމްގެ ކާމިޔާބީއަކީ އިންޑިއާގެ އިގްތިސޯދީ ކުރިއެރުމުގެ ހެއްކެއް ކަމަށް ބޮޑުވަޒީރު މޯދީ ވިދާޅުވި އެވެ.
