ފަތުރުވެރިން ހުސްވެފައިވާ އިތާފުށީގެ ގޮނޑުދޮށުން ވެސް ޤުރުއާނުގެ އަޑު ، މާޝާ ﷲ ، ވަަރަށް ރީތި!

މިހާރު މުޅި މީސްމީޑިއާގައި އާންމު ވެފައިވަނީ ޑރ.މުޙައްމަދު ޝަހީމް ޢަލީ ސަޢީދު ފެއްޓެވި ކީރިތި ޤުރުއާން ކިޔެވުމުގެ ޕްރޮގްރާމްގެ އަޑުތަކެވެ. މީސްމީޑިއާގައި ތަފާތު ޗެލެންޖުތަކެއް ގިނަވެފައި ވަނިކޮށް ، ޤުރުއާން ކިޔެވުމަށް ބާރު އެޅުމުގެ ގޮތުން ޑރ.ޝަހީމް ފެއްޓެވި ޗެލެންޖަށް ގިނަ ބައެއްގެ ތަރުހީބު ދަނީ ލިބެމުންނެވެ. ކުޑަކުދިންނާއި އެކި އުމުރުފުރާތަކުގެ ދިވެހީންގެ އިތުރުން ސައުދީ އަރަބިއްޔާގައި ތައުލީމް ހާސިލް ކުރާ އެކި ގައުމުތަކުގެ ޒުވާނުން މި ޕްރޮގްރާމްގައި ބައިވެރިވެ ކީރިތި ޤުރުއާން ކިޔެވިއިރު އެންމެ ބޮޑަށް ފާހަގަވީ ޒިމްބާބުވޭގެ މުފްތީ އިސްމާއީލް މެންކް ވެސް މިޕްރޮގްރާމްގައި ބައިވެރިވެޑައިގަތުމެވެ.

Ads by STELCO

މިފަހަރު މި ޕްރޮގްރާމްގައި އިވެނީ ފަތުރުވެރިންނެތި ހުސްކޮށް އޮތް ވޯލްޑްރޮފް އެސްޓޮރިއާ އިތާފުށީގެ ގޮނޑުދޮށުން އިވޭ ޤުރުއާން ކިޔެވުމުގެ އަޑެވެ. އާލްއިމްރާން ސޫރަތުގެ 23 ވަނަ އާޔަތުން ފެށިގެން 27 ވަނަ އާޔަތުގެ ނިޔަލަށް ކިޔަވާ މޫރިތި ގުރުއާނުގެ އަޑެވެ.

އިތާފުށީ މިސްކިތުގެ ޒުވާން އިމާމު އުމުރުން 26 އަހަރުގެ އަފީފް ބިން މުޙައްމަދުގެ ކިޔެވުން ވަރަށް ހިތްގައިމެވެ. ގޮނޑުދޮށަށް ރާޅު ބީއްސާ ހިތްގައިމު އަޑާއެކު އެހިތްގައިމުކަން އިންތިޒާމް ކުރެއްވި އިލާހުގެ ވަހީ ބަސްފުޅުތައް އިވޭ އަޑުއަހާލުމުން ހިތަށް ފިނިކަންދެއެވެ.

ޑރ.ޝަހީމް އެދިލައްވާފައިވަނީ ވީހާވެސް ގިނަ ބަޔަކު މިޕްރޮގްރާމްގައި ބައިވެރިވުމެވެ. އެގޮތުން ޝަހީމް ވެސް ގެންދަވަނީ އެކި ބައެއް ސިޔާސީ އިސްފަރާތްތަކާއި އާންމުންނަށް ވެސް ޕްރޮގްރާމްގައި ބައިވެރިވުމަށް ދަޢުވަތު ދެއްވަމުންނެވެ.