ރައްޔިތުންގެ ބޭންކެއްގެ ސިފަ ބީއެމްއެލްގައި މިހާރު އެބަހުރި: ރައީސް
ހަގީގީ ރައްޔިތުންގެ ބޭންކެއްގެ ސިފަ ބޭންކް އޮފް މޯލްޑިވްސް (ބީއެމްއެލް) ގައި މިހާރު އެބަހުރި ކަމަށް ރައީސް ޑރ މުހައްމަދު މުއިއްޒު މިއަދު ވިދާޅުވެއްޖެ އެވެ.
ތިލަދުންމަތީ އުތުރުބުރީގެ ބައެއް ރަށްތަކަށް އެމަނިކުފާނު މިއަދު ފެއްޓެވި ދަތުރުފުޅުގައި ހއ މުރައިދޫގައި ބީއެމްއެލްގެ އޭޓީއެމް ބެހެއްޓުމަށް ނިންމުމާ ގުޅިގެން ވާހަކަފުޅު ދައްކަވަމުން ރައީސް ވިދާޅުވީ ރާއްޖޭގެ ހުރިހާ ރަށެއްގައި ބީއެމްއެލްގެ އޭޓީއެމް ބަހައްޓަން އެމަނިކުފާނު ރިޔާސީ އިންތިހާބުގައި ވެވަޑައިގެންނެވި ވައުދު ފުއްދުމަށް ބީއެމްއެލުން ވަރަށް ބޮޑު އެއްބާރުލުމެއް ލިބެމުންދާ ކަމަށެވެ.
"ހަގީގީ ރައްޔިތުންގެ ބޭންކެއްގެ ސިފަ މިހާރު ބީއެމްއެލްގައި އެބަހުރި" ރައީސް މުއިއްޒު ވިދާޅުވި އެވެ. އެކަމުގެ އިތުރު ތަފްސީލެއް ވިދާޅުނުވި ނަމަވެސް ބެލެވޭ ގޮތުގައި ރައީސް އެހެން ވިދާޅުވީ ބޭންކުގެ ބޯޑަށް ގެނައި ބަދަލުތަކަށް އިޝާރާތްކުރައްވަ އެވެ.
ބީއެމްއެލްގެ ބޯޑަށް ބަދަލުތަކެއް ގެނައީ އެ ބޭންކުގެ ރުފިޔާ އެކައުންޓްތަކުން ބޭރުގެ މުއާމަލާތްތައް ނުހިންގޭ ގޮތަށް ނިންމީ، މިހާރު އޮތް ސަރުކާރު ވައްޓާލުމުގެ ރޭވުމެއްގެ ތެރެއިން ކަމަށް ތުހުމަތުކުރެވޭ މައްސަލަ ފެންމަތިވި ދަނޑިވަޅާ ދިމާކޮށެވެ.
އެ ތުހުމަތުތައް ކުރެވިފައި ވަނިކޮށް، އޭރު ބޭންކުގެ ސީއީއޯގެ މަގާމުގައި ހުރި ކާލް ސްޓުމްކަ އިސްތިއުފާދެއްވި އެވެ.
އަދި ސެޕްޓެމްބަރު މަހުގެ 21 ވަނަ ދުވަހު ބޭންކުގެ ބޯޑަށް ބަދަލުތަކެއް ގެނަ އެވެ. ބޯޑަށް ބަދަލުތައް ގެނެސް އަލުން އެކުލަވާލާފައިވަނީ ބޭއްވި ހާއްސަ އާންމު ޖަލްސާ (އީޖީއެމް) ގަ އެވެ. ބޯޑަށް ދެ ޑިރެކްޓަރުން އައްޔަންކުރިއިރު، ޖަލްސާގެ ފަހުން ބޭއްވި ބޯޑުގެ ބައްދަލުވުމަކަށް ފަހު، ބީއެމްއެލްގެ ޗެއާޕާސަނަކަށް އަހުމަދު އަލީ ހަބީބް އައްޔަންކުރި އެވެ.
ކާލްގެ ބަދަލުގައި ބީއެމްއެލްގެ ސީއީއޯގެ މަގާމަށް މުހައްމަދު ޝަރީފް އައްޔަންކޮށްފައިވަނީ ހުސްވި އަހަރުގެ އޮކްޓޫބަރު މަހުގެ 16 ވަނަ ދުވަހު އެވެ.
ބަގާވާތުގެ މައްސަލަ ތަހުގީގުކުރާކަން ހާމަކޮށް ފުލުސް އޮފީހުން ފުރަތަމަ ނެރުނު ބަޔާނުގައި ބުނެފައިވަނީ، ބީއެމްއެލުން ގިނަ ރައްޔިތުންތަކަކަށް ސިހުމެއް ލިބޭ ފަދަ ނިންމުމެއް ނިންމިއިރު، ސިޔާސީ ފަރާތްތަކުން ސަރުކާރުގެ މާލީ ހާލަތާ ބެހޭ ގޮތުން ނޫސްވެރިންގެ ބައްދަލުވުމެއް ބޭއްވި ކަމަށެވެ.
ބީއެމްއެލުން އެ ނިންމުން ނިންމި ވަގުތު، އެމްޑީޕީ ސަރުކާރުގެ ފިނޭންސް މިިނިސްޓަރަކަށް ހުުންނެވި އިބްރާހީމް އަމީރު ނޫސްވެރިންގެ ބައްދަލުވުމެއް ބާއްވައި ސަރުކާރަށް މާލީ ކަންކަން މެނޭޖު ނުކުރެވޭ ކަމަށް ވިދާޅުވެ، ވާހަކަ ދައްކަވާފައިވެ އެވެ.
ހަމަ އެ ވަގުތު ސޯޝަލް މީޑިއާ އެތައް ސަތޭކަ ބޮޓް އެކައުންޓު ބޭނުންކޮށްގެން ސަރުކާރު ވައްޓާލަން މަގުތަކަށް ނިކުތުމަށާއި އާންމު ހަމަނުޖެހުން ނަގާލަން ގޮވާލާފައިވާ ކަމަށެވެ. އެހެންވެ އެ މައްސަލަ ސީރިޔަސް މައްސަލައެއްގެ ގޮތުގައި ބަލަން ފަށާފައިވާ ކަމަށް ފުލުހުން ނެރުނު ބަޔާނުގައި އޭރު ބުނެފައިވެ އެވެ.
Ads by STO
