ލޯގަނޑެއް ފެންނަ އިރަށް ސެލްފީ ނަގާ މީހަކަށް ޓެގު ކޮށްލަބަލަ!
ސޯޝަލް މީޑިއާގައި ދުވާލެއްގެ މައްޗަށް ދައުރުވާ އެތަކެއް ހާސް ސެލްފީއިން ވެސް ސެލްފީ އަކީ ކިހާ އާންމު އެއްޗެއްކަން ހާމަވެގެންދެއެވެ. ފޫހިވާ ކޮންމެ ފަހަރަކު ސެލްފީ ނަގާ މީހުން ވެސް އުޅެއެވެ. އަދި ދެމީހަކު ނުވަތަ ގުރޫޕެއް އެއްތަން ވެއްޖެނަމަ ސެލްފީއެއް ނަގާލުމަކީ ކޮންމެހެން ވެސް ކުރަން ޖެހޭނެ ކަމެކެވެ. ސެލފީގެ މަގުބޫލުކަން އިތުރުވެ ތަފާތު ގޮތްގޮތަށް ސެލްފީ ނެގުމުގެ ވާދަވެރިކަންވެސް މިހާރު އޮވެއެވެ.
މިގޮތުން ވެސް އެންމެ ފާހަގަ ކޮށްލެވޭ ސެލްފީގެ އެއް ވައްތަރަކީ ލޯގަނޑު ކުރިމަތީ ހުއްޓި ނަގާ ސެލްފީއެވެ. ލިފްޓުން ލޯގަނޑުން ނުވަތަ ފާހަނާ ލޯގަނޑުން ނުވަތަ ސައިކަލްގެ ލޯގަނޑުން ވިޔަސް 'މިރަރ ސެލްފީ' އެއް ނަގާނުލައި ނޫޅެވޭ ކުދިން ވަރަށް މަދެވެ. އަދި ބައެއް ކުދިންނަކީ މިކަމަށް ދެވި ހިފާފައި ތިބޭ ކުދިން ކަންވެސް ފާހަގަ ކޮށްލެވެއެވެ.
މި ވައްތަރުގެ ސެލްފީ ފުރަތަމަ އީޖާދު ވެގެން އައީ އައިފޯނު މަޝްހޫރުވުމާއި އެކުގައި ކަމަށް ގިނަ ބަޔަކު ގަބޫލުކުރެއެވެ. އަދި ލޯގަނޑު ކުރިމަތީ ގައި ސެލްފީ ނަގަނީ ފޯނުގެ މޮޅުކަން ދައްކާލުމަށް ކަމުގައި ވެސް މިހެން ބުނެ އުޅޭ މީހުން ބުނެއެވެ.
ނަމަވެސް ލޯގަނޑު ސެލްފީ އާންމުކޮށް ނަގައި އުޅޭ ކުއްޖަކު "ދެން"އަށް މައުލޫމާތު ދެމުން ބުނި ގޮތުގައި ލޯގަނޑު ކުރިމަތީ ހުރެ އާންމުކޮށް ސެލްފީ ނަގަނީ ގެއިން ނިކުންނަމުން ނުވަތަ ލިފްޓަށް އަރައި މުޅި އައުޓްފިޓް ގެ ފޮޓޯއެއް ނަގާލުމަށެވެ. އަދި ލޯގަނޑު ސެލްފީ ނަގާއިރު މޫނު ފޮރުވައިގެން ސެލްފީ ނެގޭތީ ވެސް މެއެވެ. އެހެން ކުއްޖަކު ބުނި ގޮތުގައި އާންމުކޮށް ނަގާ ސެލްފީތަކުން ނެގެނީ މޫނު އެކަންޏެވެ. ނަމަވެސް ލޯގަނޑު ކުރިމަތީ ނަގައި ސެލްފީ އިން މުޅި މީހާ ގެ ފޮޓޯއެއް ނެގި ސެލްފީ އާމެދު އޮންނަ ކޮންފިޑެންސް އިތުރު ވެގެންދާ ކަމަށް ވެސް އެކުއްޖާ ބުންޏެވެ.
ކަން ކޮންމެ ގޮތަކަށް އޮތްނަމަވެސް ލޯގަނޑު ސެލްފީއެއް ވިޔަސް ނުވަތަ އާދައިގެ ސެލްފީއެއް ނަމަވެސް އެއީ ނަގާ މީހެއްގެ އަމިއްލަ އިޚްތިޔާރުގައި އޮންނަ ކަމެކެވެ.
Ads by STO
