ފިޔާޔާ، އަލުވި އަދި ބިސް އަގުބޮޑުކޮށް ވިއްކާ ނަމަ 1 ލައްކަ ރުފިޔާއިން ޖޫރިމަނާ ކުރަނީ
ފިޔާ، އަލުވި އަދި ބިހުގެ އަގު ކޮންޓްރޯލް ކޮށް، އަގުބޮޑުކޮށް ވިއްކާ ފަރާތްތައް ލައްކަ އަކުން ޖޫރިމަނާއެއް ކުރަން ސަރުކާރުން ނިންމައިފި އެވެ.
އިކޮނޮމިކް މިނިސްޓްރީ އިން މިއަދު ކުރި އިއުލާނެއްގައި ބުނީ، މި މަހުގެ ހައެއް ވާ ހޯމަ ދުވަހުން ފެށިގެން މީހުން ދިރިއުޅޭ ރަށެއްގައި ފިޔާ އަދި އަލުވި ކިލޯއެއް ވިއްކޭނެ އެންމެ ބޮޑު އަގަކީ 20 ރުފިޔާ ކަމަށެވެ. ރީނދޫ މުގު ކިލޯއެއް އެންމެ ބޮޑުކޮށް ވިއްކޭނީ 45 ރުފިޔާ އަށެވެ. އަދި ބިހެއް ވިއްކޭނެ އެންމެ ބޮޑު އަގަކީ 1.80 ކަމަށެވެ.
އެ އަގަށް ވުރެ ބޮޑުކޮށް އަގު ކޮންޓްރޯލުކޮށްފައިވާ މުދަލެއް ވިއްކައިފި ނަމަ، ހިލާފުވާ ފުރަތަމަ ފަހަރު، އެ ފަރާތެއް ގިނަވެގެން 100,000 ރުފިޔާ އިން ޖޫރިމަނާ ކުރާނެ ކަމަށް މިނިސްޓްރީން ބުނެއެވެ. އަދި، ކުށް ތަކުރާރުކުރާ ކޮންމެ ފަހަރަކު އެ ފަރާތް އެންމެ ގިނަވެގެން 100,000 ރުފިޔާއިން ޖޫރިމަނާކޮށް، އަދި ހަ މަސް ދުވަހަށްވުރެ ދިގުނޫން މުއްދަތަކަށް ވިޔަފާރިކުރާ ތަން ބަންދުކުރުމަށް އެންގުމުގެ ބާރު މިނިސްޓްރީއަށް ލިބިގެންވާ ކަމަށް ވެސް ބުނެފައިވެއެވެ.
ކޮވިޑް-19ގެ ސަބަބުން ބާޒާރުގައި ފިޔާ، އަލު އަދި ބިހުގެ އަގު ވަނީ ވަރަށް ބޮޑަށް އުފުލެން ފަށައިފައެވެ. މިހާރު ބާޒާރުގައި ފިޔާ ކިލޯއެއްގެ އަގު އުޅެނީ 25 ރުފިޔާ އަށެވެ. އަލުވި ކިލޯއެއްގެ އަގު ވަނީ 30 ރުފިޔާއަށް އުފުލިފައެވެ. އަދި ބިހެއް ލިބެނީ 2 ރުފިޔާ 30 ލާރިއަށެވެ.
Ads by STO
