ރާއްްޖެ އަށް ފިޔައާއި ބިސް ހިފައިގެން އަންނަ ބޯޓެއްގެ އިންޖީނުގައި ރޯވެއްޖެ
ފިޔާ އާއި ބިސް ހިފައިގެން ރާއްޖެ ދަތުރު ކުރަމުން އަންނަ ބޯޓެއްގެ އިންޖީނުގައި ރޯވެ އަލިފާނުގެ ހާދިސާއެއް ރޭ ހިނގައިފި އެވެ.
އެމްއެންޑީއެފުން ބުނިގޮތުގައި އިންޖީނުގައި ރޯވެގެން ރޭ 12:30 ކަން ހާއިރު ރިޕޯޓް ކޮށްފައިވަނީ އެމްވީ ވީބީ ޕްރޮގްރެސް ކިޔާ މުދާ އުފުލާ ބޯޓެއްގަ އެވެ. އަލިފާނުގެ ހާދިސާ ހިނގިއިރު އެ ބޯޓް އޮތީ ރާއްޖޭގެ ބޭރު ކަނޑުގައި ކަމަށާއި މައްސަލަ ހައްލު ކުރީ ބޯޓްގެ ފަޅުވެރިން ކަމަށް ވެސް އެމްއެންޑީއެފުން ބުންޏެވެ.
އެ ހާދިސާގައި އެއްވެސް މީހަކަށް އަނިޔާއެއް، ގެއްލުމެއް ނުލިބޭ ކަމަށާއި ބޯޓުގައި ތިބީ 11 އިންޑިއާ މީހުން ކަމަށް އެމްއެންޑީއެފުން ބުންޏެވެ.
ބޯޓުގެ ފަޅުވެރިން ބޯޓުގެ އިންޖީނު ހެދުމަށް ފަހު، މިހާރު ބޯޓް ރާއްޖެ އަށް ދަތުރު ކުރަމުން އަންނަ ކަމަށާއި އެ ބޯޓަށް މާލޭ ބަނދަރަށް ވަދެވޭނެ ކަމަށް ލަފާކުރެވެނީ މިއަދު މެންދުރު ފަހު، 15:00 އެހާކަންހާއިރު ކަމަށް ވެސް އެމްއެންޑީއެފުން ބުނެފައިވެއެވެ.
