އުފާވެރި ޚަބަރެއް، ފްރާންސް ގައި ކޮރޯނާ ވައިރަސް އިން މަރުވާ މީހުންގެ އަދަދު ބޮޑުތަނުން ދަށްވަނީ
ކޮރޯނާ ވައިރަސް އެންމެ ގަދައަށް ފެތުރެމުންދާ ފަސް ގައުމުގެ ތެރޭގައި ހިމެނޭ ފްރާންސްގައި ބަލި ޖެހިގެން މަރުވާ މީހުންގެ އަދަދު ދަށްވާންފަށައިފިއެވެ.
މިގޮތުން ހުކުރު ދުވަހާއި އަޅާބަލާއިރު ހޮނިހިރު ދުވަހު މަރުވި މީހުންގެ އަދަދުވަނީ 588 އިން 441 އަށް ތިރިވެފައެވެ. މިއީ ވައިރަސް ހަލުވިކަމާއެކު ފެތުރެންފެށި ފަހުން މި އަދަދު ދަށްވި ފުރަތަމަ ފަހަރު ކަމުގައި ވެސް ރިޕޯޓުތައް ބުނެއެވެ.މިއާއެކު ފްރާންސްގައި މަރުވި މީހުންގެ ޖުމްލަ ވަނީ 7,560 އަށް އަރާފައެވެ.
މަރުވި މީހުންގެ އަދަދު ދަށްވެފައި ވީނަމަވެސް ފްރާންސްގައި ވައިރަހަށް ޕޮސިޓިވްވި މީހުންގެ އަދަދުވަނީ 9 އިންސައްތަ އިތުރުވެފައެވެ. އެގޮތުން ހުކުރު ދުވަހު އެކަނި ވެސް 5,233 ކޭސް އިތުރުވެފައިވެއެވެ. މިހާރު ފްރާންސްގައި ޖުމްލަ 89,953 މީހަކުވަނީ ވައިރަހަށް ޕޮސިޓިވްވެފައެވެ. މީގެ ތެރެއިން ބަލިން ރަނގަޅުވެފައި ވަނީ 15,438 މީހުނެވެ. އަދި 66,955 މީހަކަށް އަދިވެސް ހޮސްޕިޓަލުގައި ގެންދަނީ ފަރުވާެމުންނެެވެ.
ވައިރަސް ކޮންޓްރޯލުކުރުމަށްޓަކައި 17 މާރޗު ވަނަ ދުވަހު ފްރާންސްގައި ވަނީ 15 ދުވަހުގެ ފުރަބަންދެއް އިއުލާނުކޮށްފައެވެ. ނަމަވެސް އިއްޔެވަނީ މި މުއްދަތު އޭޕްރިލް 15 ވަނަ ދުވަހާއި ހަމައަށް އިތުރުކޮށްފައެވެ.
ދުނިޔޭގެ އެކި ހިސާބުތަކުގައި ހަލުވިކަމާއެކު ފެތުރެމުން އަންނަ ކޮރޯނާ ވައިރަހުގެ އަސަރު ވަނީ 180 އަށް ވުރެ ގިނަ ގައުމަކަށް ކޮށްފައެވެ. މިހާތަނަށް ކޮރޯނާ ވައިރަހުގެ 1,199,583 ކޭސް ރިޕޯޓުކުރެވިފައިވާއިރު މަރުވި މީހުންގެ އަދަދުވަނީ ފަސްދޮޅަސް ހަތަރު ހާހަށް ވުރެ ގިނަވެފައެވެ.
