ބަންގާޅުގެ ހާލަތު ގޯސްވަނީ، އެ ގައުމުގައި ދިރިއުޅޭ ދިވެހި ދަރިވަރުން ތާށިވެފައި!
ކޮވިޑް-19ގެ ސަބަބުން މިހާތަނަށް ބަންގާޅުން 70 މީހުން މަރުވެފައިވާ ކަމަށް ތަފާސްހިސާބުތަކުން ދެއްކި ނަމަވެސް އެ ގައުމުގައި ވައިރަހަށް ޓެސްޓު ކުރާލެއް މަދުކަމުން ހަގީގަތުގައި އެގައުމުގައި ވައިރަސް ފެތުރިފައި އޮތް މިންވަރު މިހާރު ބުނަން ނޭނގޭ ކަމަށް ގިނަ ކަމާ ބެހޭ ފަރާތްތަކަކުން ދަނީ ބުނަމުންނެވެ.
ބަންގާޅުގައި ކިޔަވާ 80 ވަރަކަށް ދިވެހި ދަރިވަރުން އެ ގައުމުގައި އުޅެމުންދާއިރު، އެ މީހުންނަށް ރާއްޖެ އާދެވޭނެ ގޮތެއް ނެތި މިވަނީ ތާށިވެފައެވެ. ބަންގާޅުގެ ކޮމާޝަލް ފްލައިޓުތައް މިހާރު އޮތީ ހުއްޓިފައިވާއިރު، އެ ކުދިންނަށް ރާއްޖެއާދެވޭނެ މަގެއް ހޯދުމަށް އަދި ސަރުކާރު ވަނީ ނުކުޅެދީފައެވެ. ބަންގާޅުގެ ހާލަތު ގޯސްކަމުން އެތަނުން ގިނަ މީހުން ތިބީ ރާއްޖެނާދެވިގެން ކެތް މަދުވެފައެވެ.
ު ދިވެހީންނަށް އެގައުމުން ނުކުމެވޭނެ ދޮރުތައް ބަންދެވެ. އެގައުގައި ތިބި ދިވެހީންގެ އާދޭހަކީ ކޮންމެ ގޮތެއް ހަދާފައި ވިޔަސް އެތަނުން ނެރެދިނުމެވެ. އެ އާދޭހުގެ މެސެޖުތައް އެ މީހުން ދަނީ ސަރުކާރުގެ ކަމާ ބެހޭ ފަރާތްތަކަށް ކުރަމުންނެވެ.
އެ ގައުމުގައު ކިޔަވަން އުޅޭ ބައެއް ދަރިވަރުންނާ ހަވާލާދީ "ސަން"ގައި ބުނެފައިވަނީ އެގައުމުގެ ހާލަތު ސަރުކާރުގެ މަސްދަރުތަކުން ބުނާ ވަރަށް ވުރެ ގޯސް ކަމަށެވެ. ކޮވިޑް-19ގެ އަލާމާތްތަކާ އެކު ގިނަ ބަޔަކު މަރުވެގެން ދާއިރު ވައިރަހަށް ޓެސްޓު ނުކުރުމުގެ ސަބަބުން އެ މީހުން ކޮވިޑް-19ގެ ރަސްމީ ހިސާބުތަކުގެ ތެރެއަށް ނުވައްދާ ކަމަށް އެ ކުދިން ބުނެއެވެ.
ޗިޓަގޮން މެޑިކަލް ކޮލެޖުގައި ތައުލީމު ހާސިލު ކުރަމުންދާ އިޔާދު ނަސީރު "ސަން"އަށް ބުނީ އޭނާ އުޅޭ ހޮސްޕިޓަލުގައި އެކަނިވެސް ކޮވިޑްގެ އަލާމާތްތައް ފެނި މަރުވެފައިވާ ގާތްގަނޑަކަށް 40 މީހުން އެބަތިބިކަމަށާއި އެ މީހުންގެ ޓެސްޓު ހެދިފައި ނުވާ ކަމަށެވެ.
ކޮވިޑް-19 އަށް ޝައްކުވާ އަލާމާތްތައް ހުރިނަމަ އާދައިގެ ހޮސްޕިޓަލެއްގައި އެޑްމިޓްކޮށެއް ނުދޭ ކަމަށާއި ޔަގީން ނުވާނަމަ ޑެޒިގްނޭޓެޑް ހޮސްޕިޓަލުތަކުން އެޑްމިޓް ކޮށެއް ނުދޭ ކަމަށް ޗިޓަގޮން މެޑިކަލް ކޮލެޖުގައި ތައުލީމު ހާސިލުކުރަމުންދާ ފާތިމަތި ޒާހިޔާ "ސަން" އަށް ބުނެފައިވެއެވެ.
"ޕޭޝަންޓުން ޖެހެނީ އެއް ހޮސްޕިޓަލުން އަނެއް ހޮސްޕިޓަލަށް ދުވެ ދުވެ ތިބެން. އެހެން ތިއްބާ ސަމް ޕީޕަލް އާ ޖަސްޓް ޑައިއިން،" ޒާހިޔާ "ސަން"އަށް ކިޔައިދިނެވެ.
ދަރިވަރުން ބުނާ ގޮތުގައި ބަންގާޅު ލޮކްޑަައުންގެ ހާލަތުގައި އޮތް ނަމަވެސް، އެއަށް ގިނަ މީހުން ބޯނުލަނބަ އެވެ. ގިނަ ފިހާރަތައް ބަންދުކޮށްފައި ހުންނަ އިރު ހުޅުވާފައި ހުންނަނީ މަދު ސުޕަމާޓުތަކެކެވެ. އެންމެންވެސް ދާން ޖެހެނީ އެ ސުޕަމާޓުތަކަށެވެ. އެހެންކަމުން އެ ތަންތަނަކީ ބަލި ފެތުރުމުގެ ނުރައްކާ ބޮޑު ތަންތަނެވެ.
ޒާހިޔާ ބުނީ އޭނާ ދިރުއުޅޭ ހޮސްޓެލްއިން ބޭރަށް ނުކުންނަން ޖެހޭތީ ވަރަށް ބިރު ގަންނަ ކަމަށާއި ހޮސްޓެލްއިން އެމީހުންނަށް ނުކުމެވެނީ ހޮސްޕިޓަލުގެ އިމަޖެންސީ ގޭޓަށް ކަމަށެވެ.
އެކުދިން ބުނާ ގޮތުގައި އެ ގައުމުގެ ހާލަތު ދަނީ ދުވަހުން ދުވަހަށް ގޯސްވަމުންނެވެ. އެހެންކަމުން މާބޮޑަށް ސަކަރާތްވުމުގެ ކުރިން، އަނެއްކާ "ދެވެނަ އިޓަލީއަކަށް"ވުމުގެ ކުރިން ނޫނީ ޗައިނާއަކަށްވުމުގެ ކުރިން އެ ކުދިން ބޭނުން ވަނީ ބަންގާޅުން ނިކުމެވޭނެ މަގެކެވެ.
