މެލޭޝިއާއިން ދިވެހިން ގެންނަ ފުލައިޓްގެ ޓިކެޓު 6000 ރުފިޔާއަށް!
ކޮވިޑް-19އާ ގުޅިގެން މެލޭޝިއާގައި ތާށިވެފައި ތިބި ދިވެހިން ގެނައުމަށް މޯލްޑިވިއަނުން ބާއްވާ ފްލައިޓުގެ ޓިކެޓުގެ އަގަކީ 400 ޑޮލަރު(6168ރ) ކަމަށް އެ އެއާލައިނުން ބުނެފިއެވެ.
މެލޭޝިއާގައި ހުންނަ ދިވެހި ހައިކޮމިޝަނުން ބުނީ މެލޭޝިޔާއާއި ދިވެހިރާއްޖެއާ ދެމެދު މޯލްޑިވިއަން އިން ބާއްވަން ރާވާފައިވާ ފްލައިޓުން މާލެ ދަތުރު ކުރައްވަން ބޭނުންފުޅު ފަރާތްތަކުން، އެފަރާތްތަކުގެ މަޢުލޫމާތު މި ލިންކް މެދުވެރިކޮށް އެ ހައިކޮމިޝަނަށް ފޮނުއްވައި ދެއްވުން އެދޭ ކަމަށެވެ.
އަދި އެ ފްލައިޓުގެ ޓިކެޓް ވިއްކަން ހަމަޖެހިފައިވަނީ ގާތްގަޑަކަށް 400 ޔޫ. އެސް ޑޮލަރަށް ކަމަށް ވެސް އެ ކޮމިޝަނުން ބުނެފައިވެއެވެ.
އެ ކޮމިޝަނުން ބުނީ ފޯމް މެދުވެރިކޮށް ރަޖިސްޓަރ ކުރި ކަމުގައިވިޔަސް ފްލައިޓުން ޖާގަ ކަށަވަރެއް ނުވާނެ ކަމަށެވެ.
ފޮރިން މިނިސްޓަރު އަބްދުﷲ ޝާހިދު ރޭ ކުރެއްވި ޓްވީޓެއްގައި ވިދާޅުވީ ކުއަލަލަމްޕޫރާއި ޓްރިވެންޑްރަމްގައި ދިރިއުޅޭ ދިވެހިން ރާއްޖެ ގެންނައުމަށް ބާއްވާ ހާއްސަ ފްލައިޓްގެ ދަތުރުތަކުގެ ތަފްސީލު ވަރަށް އަވަހަށް ހާމަކުރައްވާނެ ކަމަށެވެ.
މީގެ އިތުރުން ކޮލަމްބޯ އާއި އިންޑިއާގެ ކޮޗިން އިން ނާދެވި ތިބި ދިވެހިން ގެންނަން މޯލްޑިވިއަން އިން ކުރާ ދަތުރުގައި ރާއްޖެ-ލަންކާގެ އެއްކޮޅު ޓިކެޓެއް 4،626ރ. އަށް، ކޮޗިން އިން އަންނަ މީހުންނަށް 4،086ރ. އަށް އެއްކޮޅު ޓިކެޓު ވިއްކަން ނިންމާފައިވާ ކަމަށް މޯލްޑިވިއަނުން މިއަދު ވަނީ ބުނެފައެވެ.
