ރިސޯޓްތައް ކަރަންޓީނުގައި ، ހިނގާ ކަމަކީ ވެލި ނެގުމާއި ރަށް ސާފުކުރުން!
ކޮވިޑް19 އާއި ގުޅިގެން ރާއްޖެ މި ވަނީ ފުރަބަންދުގައެވެ. ވައިގެ ބަނދަރު އާންމުކޮށް މިވަނީ ބަންދުކޮށްފައެވެ. އެހެންކަމުން ފަތުރުވެރިންނަށް ރާއްޖެ ބަންދުވުމާއެކު ރިސޯޓްތައް ވަނީ ފަޅުވެފައެވެ. މުވައްޒަފުން ތިބީ 14 ދުވަހުގެ ކަރަންޓީނުގައެވެ. ކަރަންޓީނުގެ މުއްދަތު ހަމަވާ ރަށްރަށުން މުވައްޒަފުން ،މުސާރަ ލިބޭ ގޮތަށާއި ނުލިބޭ ގޮތަށް ފޮނުވާލަމުން ދަނީއެވެ.
މި ޙާލަތުގައި ކަރަންޓީނުގައި އޮތް ރަށްރަށުން ކުރަނީ ކޮންކަމެއް ހެއްޔެވެ؟ ކަރަންޓީނަކީ ކީއްކުރަން ކުރާ ކަމެއް ހެއްޔެވެ؟
ކަރަންޓީނުގެ މަގުސަދަކީ ރައްކާތެރިމަގު އިހްތިޔާރު ކުރުމެވެ. ބަލިޖެހިފައިވާ މީހެއްގެ ފަރާތުން ވިޔަސް ވައިރަސް ޖެހި ،އެ ވައިރަހުގެ އަލާމާތެއް ނުފެނި ގިނަވެގެން 14 ދުވަސް ނަގާތީ އެމުއްދަތުގައި އެކަހެރިކޮށް ބަހައްޓާ އެކަން ޔަގީން ކުރުމެވެ. ނަމަވެސް މިހާރު ކަރަންޓީނުގެ ހާލަތުގައި އޮތް ބައެއް ރަށްރަށުން މި މަގުސަދާއި ހިލާފު މަންޒަރުތަކެއް ދަނީ ފެންނަމުންނެވެ. މިކަމުގެ މަންޒަރާއި ވީޑިއޯ ''ދެން''އަށް ލިބިފައިވާއިރު ބައެއް ރަށްރަށުން މި މައުލޫމާތުތައް ވަނީ މި ނޫހާއި ހިއްސާކޮށްފައެވެ.
މާލެއާއި ކައިރި މަޝްހޫރު ރިސޯޓަކުން ގެންދަނީ ހުރިހާ މުވައްޒަފުން ނެރެ ރަށް ސާފުކުރުމުގެ މަސައްކަތް ކުރުވަމުންނެވެ. އިޖުތިމާއީ ގައިދުރުކަމަށްޓަކައި ރިސޯޓްތަކުގެ މިސްކިތު ޖަމާޢަތްތައް ހުއްޓާލާފައިވާ މި ދަނޑިވަޅުގައި ވެސް މަސައްކަތް ކުރުވާއިރު އެ ގައިދުރުކަމެއް ނެތެވެ. ހަމައެހެންމެ މަސައްކަތް ކުރުވާއިރު ވެސް ރައްކާތެރިކަމުގެ ސާމާނުތައް ވެސް ދީފައި ނުވާކަމަށް މައުލޫމާތު ލިބިފައިވެއެވެ.
އަދާރަން ، ކުލަބު ރަންނާޅިން ވާހަކަ ދެއްކި މީހަކު ބުނިގޮތުގައި އެރަށުގައި ކަން ހިނގަނީ އަދި އެއަށްވުރެ ދެރަވަރުކޮށް ކަމަށެވެ. އެގޮތުން މީހުން ނިދަން ތިބޭތީ ހަވީރު ހަތަރެއް ޖަހާއިރު ކަރަންޓް ކަނޑާލާ ކަމަށެވެ. އަދި އެރަށުގައި މައިގަނޑުގޮތެއްގައި ކުރުވާ ކަމަކީ ވެލިނެގުން ކަމަށް ވެސް މައުލޫމާތު ލިބިފައިވެއެވެ. އަދި ޗުއްޓީ އޮތް މީހުން ޕޭލީވްގައި، ޗުއްޓީ ނެތް މީހުން ނޯޕޭގައި ފޮނުވަން ތައްޔާރުވަމުންދާ ކަމަށާއި ޗުއްޓީ ނިމުމުން އަނބުރާ ރިސޯޓަށްދިއުމަށް ފުރުސަތު ދެނީ މަރާމާތުގެ މަސައްކަތްތަކާއި އެނޫން ވެސް ރިސޯޓުން ކުރަން ބޭނުންވާ މަސައްކަތް ކުރާނެ މީހުންކަމަށް މައުލޫމާތު ލިބިފައިވެއެވެ.
