ރައީސް މައުމޫންގެ ކޮއްކޯފުޅު އަދި ޔާމީންގެ ދައްތާފުޅު މޫމިނާ އަބްދުލްޤައްޔޫމް އަވަހާރަވެއްޖެ
ކުރީގެ ރައީސް މައުމޫން އަބްދުލް ޤައްޔޫމްގެ ކޮއްކޯފުޅު އަދި ރައީސް ޔާމީންގެ ދައްތާފުޅު މޫމިނާ އަބްދުލްޤައްޔޫމް މިއަދު މެންދުރެއްހާއިރު އަވަހާރަވެއްޖެއެވެ.
އާއިލާއިން ބައެއް މީޑިއާތަކަށް މައުލޫމާތު ދީފައިވާ ގޮތުގައި އުމުރުފުޅުން 80 އަހަރުގެ މޫމިނާ އަވަހާރަވީ އެއްވެސް ބޮޑު އާލާސްކަންފުޅަކާއި އުޅުއްވުމަށްފަހަކު ނޫނެވެ. އަދި މިއަދު ހެނދުނުވެސް އެކަމަނާ ހުންނެވީ ހެޔޮހާލުގައި ކަމަށް ވެސް މައުލޫމާތު ލިބެއެވެ.
އެގޮތުން މިއަދު ހެނދުނު ސައިފޮދު ހިއްޕަވައިގެން ގޮސް އޮށޯވެވަޑައިގެންނެވި ކަމަށާއި، ހޭފުޅުނުލައްވާ ގިނައިރުވުމުން ހޮސްޕިޓަލަށް ގެންދެވުމުން، ހޮސްޕިޓަލަށް ގެންދެވުމުގެ ކުރިން އެކަމަނާ އަވަހާރަވެފައިވާ ކަމަށް ޑޮކްޓަރުން ވިދާލުވިކަމަށް ވެސް މައުލޫމާތު ލިބިފައިވެއެވެ.
މޫމިނާއާއި ރައީސް މައުމޫން އަދި ކުރީގެ މިނިސްޓަރ އަބްދުﷲ ހަމީދު އަކީ އެއްބަނޑު އެއްބަފާ ތިން ބެއިންނެވެ. ރައީސް ޔާމީން އާއި މޫމިނާ އަކީ އެއްބަފާ ދެ ބޭފުޅުންނެވެ.
އައިޖީއެމްއެޗްގެ އަންހެނުންގެ ޚާއްސަ ޑޮކްޓަރު ޑރ. އަސީލް ޖަލީލާއި ވެލެންސިޔާގެ ކުރީގެ ހިންގުންތެރިޔާ އަދީލް ޖަލީލަކީ މޫމިނާގެ ދެ ބޭފުޅުންނެވެ. އަދި އެފްއޭއެމްގެ ރައީސް ބައްސާމް އަދީލް ޖަލީލަކީ އެކަމަނާގެ މާމަ ދަރިކަލެކެވެ.
މޫމިނާ އަބްދުލްޤައްޔޫމް އަކީ ގަލޮޅު އަވަށު އޮފީސް ހިންގުމުގައި އިސްކޮށް އުޅުއްވި ބޭކަނބަލެކެވެ.
އެކަމަނާ އަވަހާރަވުމާއި ގުޅިގެން ޕީޕީއެމް އަދި ޕީއެންސީ ކޯލިޝަނުން ވަނީ އާއިލާއަށް ތަޢުޒިޔާ ވިދާޅުވެފައެވެ.
