މިހާތަނަށް ހަތަރު ރިސޯޓަކާއި 19 ސަފާރީއަކުން މީހުން ފޭބުމުގެ ހުއްދަ ދީފައިވޭ

މިރޭ ބޭއްވި ނޫސްވެރިންގެ ބައްދަލުވުމުގައި ކޮވިޑް19އާ ތަރުޖަމާނު މަބްރޫކު އަޒީޒް ވިދާޅުވީ މިއަދާ ހަމައަށް ހަތަރު ރިސޯޓަކާއި 119 ސަފާރީއަކުން މީހުން ފޭބުމުގެ ހުއްދަދީފައިވާ ކަމަށެވެ.

އެގޮތުން މުވައްޒަފުން ފޭބުމުގެ ހުއްދަ ދީފައިވާ ހަތަރު ރިސޯޓުތަކަކީ މަލަހިނި ކުޑަ ބަނޑޮސް، ބްރެނިއާ ކޮއްޓެފަރު، ރަހާ ރިސޯޓް އަދި ފޯ ސީޒަން ޕްރައިވެޓް އައިލެންޑް މޯލްޑިވްސް އެވެ.

އެންމެ ފަހު ފަތުރުވެރިޔާ ފުރާތާ 14 ދުވަސް ފަހުން ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ހުއްދައާއެކު ރިސޯޓުތަކުން މުވައްޒަފުންނަށް ފޭބޭނެ ގޮތަށް މިހާރު ވަނީ އުސޫލު ބަދަލުކޮށްފައެވެ.

އަދި ރިސޯޓެއްގައި އެންމެ ފަހު ފަތުރުވެރިޔާ އައިތާ މިހާތަނަަށް 14 ދުވަސްވެފައިވާނަމަ އަދި މިވީހާތަނަށް ޕޮޒިޓިވް ކޭސްއެއް ފެނިފައި ނެތް އަދި ބަލީގެ އަލާމާތްތައް ހުރި މީހެއްވެސް ނެތް ރަށެއް ކަމުގައިވާނަމަ އެ މީހުންނަށް އެރަށުން ފޭބުމަށް ހުއްދަދޭނެ އިންތިޒާމުވެސް އެޗްޕީއޭއިން އޮތީ ހަމަޖައްސާފައި ކަމަށެވެ.

މީގެ އިތުރުން މިދިޔަ 14 ދުވަސް ތެރޭގައި އެރަށަށް ފަތުރުވެރިއަކު ނާރާ ރަށްތަކުގެ މުވައްޒަފުންނާ މެދުވެސް އަމަލު ކުރަމުން އަންނާނީ އެ އުސޫލުގެ ތެރެއިންނެވެ.