އިކޮނޮމިކް ޕެކޭޖުގެ ދަށުން ރިސޯޓަކަށް 7.71 މިލިއަން ރުފިޔާ ދޫކުރަނީ
ކޮވިޑް-19 ހާލަތާ ގުޅިގެން ބޭންކް އޮފް މޯލްޑިވްސްއިން ކަނޑައެޅި ރިލީފް ޕެކޭޖުގެ ތެރެއިން ރިސޯޓުތަކަށް 7.71 މިލިއަން ރުފިޔާއާ ހަމައަށް ލޯނު ނެގޭނެ ކަމަށް ފިނޭންސް މިނިސްޓްރީއިން ބުނެފި އެވެ.
އެ މިނިސްޓްރީ އިން ނެރުނު ބަޔާނުގައި ބުނެފައި ވަނީ ރިސޯޓުތަކަށް ދޫކުރާ ލޯނުތައް ދޫކުރާނީ ބޭންކް އޮފް މޯލްޑިވްސް އިން ކަމަށާއި ރިސޯޓުތަކަށް ލޯނު ދޫކުރުމުގައި ދިވެހި އޯނާޝިޕްގެ ނިސްބަތަށާއި ރިސޯޓުގައި ދިވެހި މުވައްޒަފުން ވަޒީފާގައި ގެންގުޅޭ ނިސްބަތް 45 އިންސައްތަ އަށް އަރައިތޯ އަދި އެއަށް ވުރެ މަތިވޭތޯ ބަލައި އިސްކަން ދެވޭނެ ކަމަށެވެ. އަދި މިކަން ކަން ސަރުކާރުން ބެލުމަށްފަހު ބީއެމްއެލް އާއި ހިއްސާ ކުރެވޭނެ ކަމަށް ފިނޭންސް މިނިސްޓްރީ އިން ބުނެ އެވެ.
ލޯނުތައް ދޫކުރާއިރު ރިސޯޓު ނުވަތަ ވިޔަފާރީގެ ނަން-ޕާފޯމިން ނެތް ތޯ އާއި 2019 ވަނަ އަހަރު ވިޔަފާރިއަށް ފައިދާ ވެފައި ވޭތޯ އާއި ކުރިއަށް އޮތް ތިން އަހަރު ކޭޝް ފްލޯ ފޯކާސްޓް ޕޮޒިޓިވްކޮށް ހުރިތޯ ބަލައި އިސްކަންދެވޭނެ ކަމަށް މިނިސްޓްރީން އާންމު ކޮށްފައިވާ ބަޔާނުގައިވެ އެވެ.
ކޮވިޑް-19 އާއި ގުޅިގެން ދިވެހި މުވައްޒަފުން ވަޒީފާއިން ވަކިކޮށް ނުވަތަ ނޯޕޭ ނަގަން މަޖުބޫރު ކުރުވާފައިވާނަމަ އެ ފަރާތްތަކަށް އެ ލޯނު ނުލިބޭނެ ކަމަށް ފިނޭންސް މިނިސްޓްރީއިން ބުންޏެވެ. އަދި އެކަން ސަރުކާރުން ބަލަމުން ގެންދާނެ ކަމަށްވެސް އެ މިނިސްޓްރީގެ ބަޔާނުގައި ވަނީ ބުނެފަ އެވެ.
ހަ އިންސައްތައިގެ އިންޓެރެސްޓް ރޭޓަކާއި ހަ މަސް ދުވަހުގެ ގްރޭސް ޕީރިއަޑަކާއި އެކު ދޫކުރެވޭ މި ލޯންތައް އަނބުރާ ދެއްކުމަށް ތިން އަހަރުގެ މުއްދަތެއް ލިބިގެންދާނެ ކަމަށް ބަޔާނުގައު ބުނެފައިވެއެވެ.
Ads by STO
