މެލޭޝިއާގައި ތިބި އާއިލާތަކަށް ފޮނުވަން ހަތް ޓަނުގެ ކާގޯ ހަވާލުކޮށްފި
މެލޭޝިއާގައި އުޅޭ ދިވެހިންނަށް އެހީގެ ތަކެތި ފޮނުވުމުގެ ފުރުސަތު ހުޅުވާލުމުން ގާތްގަނޑަކަށް ހަތް ޓަނުގެ ތަކެތި އެ އެއާލައިނާ ހަވާލުކޮށްފައިވާ ކަމަށް މޯލްޑިވިއަން އިން ބުނެފިއެވެ.
މި ތަކެތި މޯލްޑިވިއަން އާއި ހަވާލުކުރުމުގެ ކަންކަން ކުރިއަށް ގެންގޮސްފައިވަނީ އިއްޔެ ހެނދުނު 8:00 އިން ފެށިގެން ހަވީރު 4:30 އާއި ހަމައަށެވެ.
ރޭ ބޭއްވި ނޫސްވެރިންގެ ބައްދަލުވުމެއްގައި މޯލްޑިވިއަންގެ މެނޭޖަރ ޕީއާރް އެންޑް ކޮމިއުނިކޭޝަންސް މޫސާ ވަސީމް ވިދާޅުވީ މޯލްޑިވިއަންގެ ފްލައިޓު މެލޭޝިއާ އަށް ދިޔައީ އެތަކެއްޗާއެކު ކަމަށާއި އެގޮތުން ދިވެހި އާއިލާތަކަށް ފޮނުވަން ހަވާލުކުރި ގާތްގަނޑަކަށް ހަތް ޓަނުގެ ތަކެތި މިހާރު މެލޭޝިއާ އަށް ވާނީ ގޮސްފައި ކަމަށެވެ.
މީގެއިތުރުން މެލޭޝިއާ އަށް ދިޔަ ފްލައިޓުގައި ރާއްޖޭގައި ތިބި މެލޭޝިއާގެ 30 ފަރާތެއް އެ ގައުމަށް ގެންގޮސްދީފައިވާ ކަމަށްވެސް މޫސަ ވިދާޅުވިއެވެ.
ރާއްޖެ އަންނަ ހުރިހާ ދިވެހިން ވެސް 14 ދުވަހުގެ މުއްދަތަށް ކަރަންޓީނު ފެސިލިޓީގައި ތިބެން ޖެހޭނެއެވެ. އަދި ކަރަންޓީނުގެ މުއްދަތު ނިމުމުން ދޫކޮށްލުމުގެ ކުރިން ކޮވިޑަށް ޓެސްޓު ކުރުމަށް ވެސް ވަނީ ނިންމާފައެވެ.
