ވިލިވަރު ކަރަންޓީން ފެސިލީޓީގައި އަލިފާނުގެ ހާދިސާއެއް ހިނގައިިފި
ކަރަންޓީނު ފެސިލިޓީއެއްގެ ގޮތުގައި ގާއިމުކުރި ކ. ވިލިވަރުގައި އަލިފާނުގެ ހާދިސާއެއް ހިނގައިފިއެވެ.
އެމްއެންޑީއެފްގެ މީޑިއާ އޮފިޝަލް ވިދާޅުވީ ކ. ވިލިވަރުގައި އަލިފާނުގެ ހާދިސާއެއް ހިނގައިގެން އެކަމުގެ ރިޕޯޓް ލިބުމުން އެމްއެންޑީއެފްގެ ފަޔަރ ޓީމުން ހަރަކާތްތެރިވަމުން ދާ ކަމަށެވެ.
މީޑިއާތަކަށް މައުލޫމާތު ދެމުން އެމްއެންޑީއެފްގެ މީޑިއާ އޮފިޝަލް ވިދާޅުވީ ވިލިވަރުގައި ހިނގި އަލިފާނުގެ ހާދިސާގެ ރިޕޯޓް ލިބުނީ، މިރޭ 19:41 ހާއިރު ކަމަށެވެ. ރޯވި އަލިފާން ގަނޑު އިތުރަށް ފެތުރުން ކޮންޓްރޯލް ކޮށްފައިވާ ކަމަށްވެސް ވިދާޅުވިއެވެ.
އަލިފާން ރޯވެފައިވަނީ ވިލިވަރުގައި މުދާ ލާފައި ހުރި ކޮންޓެއިނަރ އެއްގައި ކަމަށްވެސް އެމްއެންޑީއެފުން މައުލޫމާތު ދިނެވެ.
ރޯވި އަލިފާންގަނޑު ނިއްވުމުގެ މަސައްކަތް ދަނީ، އެ ރިސޯޓްގައި ތިބި ފުލުހުންނާއި ސިފައިން ކުރަމުންނެވެ.
ވިލިވަރަކީ ރާއްޖެއިން މިހާރު ހަލުވިކަމާއިއެކު ދުނިޔޭގެ އެކި ހިސާބުތަކުގައި ފެތުރެމުން އަންނަ ކޯވިޑް 19 ޖެހޭ މީހުންނަށް ފަރުވާ ދިނުމަށް ގާއިމުކުރި ކަރަންޓީނު ފެސިލިޓީއެކެވެ.
