ކޮވިޑްގެ މިހާލަތުގައިވެސް ރާއްޖެ ޒިޔާރަތްކުރާ ފަތުރުވެރިންނަށް، ރަައީސް ޞާލިޙު މަރުޙަބާ ދަންނަވައިފި
ފެތުރެމުން އަންނަ ކޮވިޑް-19 ގެ މިހާލަތުގައި ވެސް، ރާއްޖެއަށް ޒިޔާރާތްކުރަމުންދާ ފަތުރުވެރިންނަށް ރައީސް އިބްރާހީމް މުހައްމަދު ޞާލިޙު މަރުހަބާ ދަންނަވައިފި އެވެ.
ދުނިޔޭގެ ފަތުރުވެރިކަމުގެ މުނާސަބަތުގައި ރައީސް ޞާލިޙު ކުރެއްވި ޓްވީޓެއްގައި ވަނީ ރާއްޖޭގެ ފަތުރުވެރިކަމުގެ ސިނާއަތް ކުރިއަރުވާއި ކާމިޔާބީއަށް ގެންދިއުމަށް މަސައްކަތް ކުރަމުންދާ އަމިއްލަ ފަރާތްތަކާއި ޖަމިއްޔާތަކަށް އިތުރު ކާމިޔާބީއަށް އެދިލައްވާފައެވެ.
ކޮވިޑް-19 ގެ މިހާލަތުގައި ދިމާވެފައިވާ ގޮންޖެހުންތަކާ އެކު ވެސް ރާއްޖެއަށް ޗުއްޓީ ހޭދަކުރުމަށް އަންނަ ފަތުރުވެރިންނަށް ރައީސް ޞާލިޙު ވަނީ މަރުޙަބާ ދަންނަވާފައެވެ.
ރާއްޖޭގައި ފަތުރުވެރިކަން ފެށުނީ 1972 ވަނަ އަހަރު ހުޅުވި ކުރުނބާ މޯލްޑިވްސް ރިސޯޓާއެކު ގައެވެ. އެއަށްފަހު އިތުރު ރިސޯޓުތައް ހުޅުވެމުން ގޮސް މިހާރު 150 އަށް ވުރެ ގިނަ ރިސޯޓު ރާއްޖޭގައި އެބަ ހިންގައެވެ.
ރާއްޖޭގެ އިޤްތިސޯދު އެންމެ ބޮޑަށް ބަރޯސާ ވެފައިވާ ދާއިރާ އަކީ ވެސް ފަތުރުވެރިކަމުގެ ދާއިރާއެވެ. ނަމަވެސް މުޅި ދުނިޔެއަށް ކޮވިޑް-19 ފެތުރުމާއި ގުޅިގެން ރާއްޖޭގެ ބޯޑަރުތައް ވެސް ބަންދުކޮށް ފަތުރުވެރިކަމުގެ ސިނާޢަތު މެދުކަނޑާލަން ޖެހުނީ މާރޗް މަހުގެ މެދުތެރޭގައެވެ.
ޚިދުމަތް މެދުކަނޑާލި ނަމަވެސް ޖުލައި މަހުގެ 15 ވަނަ ދުވަހުން ފެށިގެން އަލުން ބޯޑަރުތައް ހުޅުވާލާ، ރިސޯޓުތަކާއި ސަފާރީތަކުން ދަނީ އަލުން ޚިދުމަތް ދެމުންނެވެ.
