ކޮޗިން އާއި ޓްރިވެންޑްރަމްގައި ތިބި އާއިލާތަކަށް ކެއާ ޕެކޭޖު ފޮނުވުމުގެ ފުރުސަތު
އިންޑިއާގެ ކޮޗިން އާއި ޓްރިވެންޑްރަމްގައި ތިބި ދިވެހި އާއިލާތަކަށް ކެއާ ޕެކޭޖު ފޮނުވުމުގެ ފުރުސަތު ހުޅުވާލައިފިއެވެ.
ފޮރިން މިނިސްޓްރީން މިއަދު ބުނީ ޓްރިވެންޑްރަމް އަދި ކޮޗިންގައި ދިރިއުޅެމުން އަންނަ ދިވެހި އާއިލާތަކަށް ސަރުކާރުން އެހީތެރިކަން ފޯރުކޮށްދިނުމުގެ ގޮތުން އަންނަ ހޮނިހިރު ދުވަހު ޓްރިވެންޑްރަމް އަށް ދަތުރު ކުރުމަށް ހަމަޖެހިފައިވާ މޯލްޑިވިއަންގެ ފްލައިޓުގައި ކެއާ ޕެކޭޖު ފޮނުވަން ބޭނުންވާ ފަރާތްތަކަށް އެ ފުރުސަތު ހުޅުވާލާފައިވާ ކަމަށެވެ.
އެގޮތުން ކޮންމެ އާއިލާއަކަށް ކެއާ ޕްކޭޖުގެ ގޮތުގައި ފޮނުވޭނީ ގިނަވެގެން 15 ކިލޯ ކަމަށް އެ މިނިސްޓްރީން ބުނެއެވެ.
މި ފުރުސަތުގައި 600 ފަރާތަކަށް ކެއާ ޕެކޭޖު ފޮނުވޭނެ ކަމަށް ފޮރިން މިނިސްޓްރީން މައުލޫމާތުދެއެވެ. އަދި ކެއާ ޕެކޭޖު ފޮނުވަން ބޭނުންވާ ފަރާތްތަކުން ވެލާނާ އިންޓަނޭޝަނަލް އެއާޕޯޓުގެ ޑިޕާޗާ ހޯލު ކައިރީގައި ބަހައްޓާފައިވާ ހާއްސަ ކައުންޓަރުތަކުން، މާދަމާ ހެނދުނު 08:00 އިން މެންދުރު 11:00އަށް އަދި މެންދުރުފަހު 14:00އިން ހަވީރު 18:00އާ ދެމެދުގެ ވަގުތެއްގައި ކެއާ ޕެކޭޖުތައް ހިފައިގެން ދިއުމަށް އެ މިނިސްޓްރީން އިލްތިމާސްކުރެއެވެ.
މީގެކުރިންވެސް ފޮރިން މިނިސްޓްރީން ވަނީ މޯލްޑިވިއަންގެ އެހީތެރިކަމާއި އެކުގައި ސްރީލަންކާ އަދި މެލޭޝިޔާގައި ދިރިއުޅޭ ދިވެހި އާއިލާތަކަށް ކެއާ ޕެކޭޖު ފޮނުވުމުގެ ފުރުސަތު ފަހި ކޮށްދީފައެވެ. އެގޮތުން ލަންކާއަށް 9 ޓަނުގެ ކެއާ ޕެކޭޖު ފޮނުވިއިރު މެލޭޝިޔާ އަށް ވަނީ 7 ޓަނުގެ ކެއާ ޕެކޭޖު ފޮނުވާފައެވެ
