ފުލުހުންގެ އިމާރާތްތައް ނިމުމުން ކުށުގެ ވެށިން މީހުން ދުރުކުރުމަށް ޚާއްސަ ޕްރޮގުރާމެއް ފެށޭނެ: ވަޒީރު އިޙްސާން
ފުލުހުންގެ އިމާރާތްތައް ނިމުމުން ކުށުގެ ވެށިން މީހުން ދުރުކުރުމަށް ޚާއްސަ ޕްރޮގުރާމެއް ފެށޭނެކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.
ވަޒީރު މިހެން ވިދާޅުވީ ތިލަދުންމަތީ ދެކުނު ބުރިއަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުރައްވަމުން ގެންދަވާ ދަތުރުފުޅުގެ ތެރެއިން ބިންގާ އަޅަމުންދާ ޕޮލިސް ސްޓޭޝަންތަކާ ގުޅޭގޮތުން ޕީއެސްއެމް ނިއުސްއަށް ދެއްވި އިންޓަވިއުއެއްގައެވެ.
ޕީއެސްއެމް ނިއުސްއަށް ދެއްވި އިންޓަވިއުގައި ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވީ މި ސަރުކާރު ވެރިކަމާ ހަވާލުވިއިރު، ގިނަ ރަށްރަށުގައި ފުލުހުންގެ ޚިދުމަތް ދެމުންދިޔައީ، ޚިދުމަތް ދެވޭނެ އެކަށީގެންވާ ފެންވަރުގެ ޢިމާރާތެއް ނެތި ކަމަށެވެ. އެހެންކަމުން ފުލުހުންގެ ޚިދުމަތުގެ ފެންވަރު ރަނގަޅުކޮށް، ގިނަ ފުލުހުންނަށް ތިބެވޭނެ ގޮތަށް ޒަމާނީ ވަޞީލަތްތައް ހިމެނޭހެން ފުލުހުންގެ އިމާރާތްތައް އެޅުމަކީ ސަރުކާރުގެ ބޮޑު އަމާޒެއްކަމަށް ވަޒީރު ވިދާޅުވިއެވެ.
"ސަރަހައްދީ ހެޑްކުއަރޓަރުތަކާއި އަތޮޅު ލެވެލްގެ ސްޓޭޝަންތަކާއި ހަނިމާދޫ ފަދަ ބޮޑެތި އާބާދީތަކުގައި ގިނަ ފުލުހުން ތިބެގެން ގިނަ ޚިދުމަތްތައް ދެވޭނެ ގޮތަށް ފުލުހުންގެ އިމާރާތްކުރުން އަމާޒަކީ." ވަޒީރު ވިދާޅުވިއެވެ.
ދާޚިލީ ވަޒީރު ވިދާޅުވީ އަލަށް އިމާރާތްކުރާ ފުލުހުންގެ ސްޓޭޝަންތަކުގައި ތަޙުޤީޤުކުރެވޭނެ ގޮތްގޮތާއި އިންޓަލެޖެންސް ސެލްތަކާއި ކަސްޓޯޑިއަލް ސެލްތަކުގެ އިތުރުން ވެހިކަލް ޓޯވިން ފެސިލިޓީއާއި ފުލުހުންގެ ވެހިކަލް މަރާމާތުކުރެވޭނެ ފެސިލިޓީތައް ޤާއިމުކުރެވޭނެ ކަމަށެވެ. އަދި މި ފެސިލިޓީތައް ރަށްރަށުގައި ޤާއިމުކުރެވުމާއެކު ކުށުގެ ވެށި ނައްތާލުމަށާއި ކުށުގެ ވެށީގައި މީހުން ހަރުނުލާނެ ގޮތްގޮތަށް ފުލުހުންގެ މަސައްކަތް ތަރުތީބުކުރުމަށް ޚާއްސަ ޕްރޮގުރާމެއް ފެށޭނެކަމަށް ވަޒީރު ވިދާޅުވިއެވެ.
"ފުލުހުންގެ މަސައްކަތްތައް ވަރަށް ބޮޑަށް އަމާޒުކުރާނަން ކުށަށް މީހުން އަރައިގަތުމުގެ ކުރިން ކުށުގެ ވެށިން މީހުން ދުރުކުރުމަށް ކުރަންޖެހޭ މަސައްކަތްތައް ކުރުމަށް. މިހާރަށް ވުރެ ވަރަށް ބޮޑަށް މި މަސައްކަތް ފުޅާކުރެވޭނެ. އަމަން އަމާންކަމާއި ސުލްހަ މަސަލަސްކަން މުޖުތަމަޢުގެ ތެރޭގައި ޤާއިމުކުރުމަށް ޓަކައި ރާއްޖޭގައި ހިންގޭ އެންމެ ބޮޑު މަޝްރޫޢު މިއީ." ވަޒީރު ވިދާޅުވިއެވެ.
މި ސަރުކާރުގެ އަމާޒަކީ ފުލުހުންގެ ޚިދުމަތް ޤާއިމުވެފައި ނެތް ހުރިހާ ރަށެއްގައި މިއަހަރުގެ ތެރޭގައި ފުލުހުންގެ ޚިދުމަތް ޤާއިމުކުރުމެވެ. އަދި އިމާރާތްކުރަމުންދާ ޕޮލިސް ސްޓޭޝަންތައް މި ދައުރުގެ ތެރޭގައި ނިންމުމަކީވެސް ސަރުކާރުގެ މުހިންމު އަމާޒެކެވެ.
