މެލޭޝިއާގައި ދިވެއްސަކު ކޮވިޑް-19 އަށް ފައްސިވިކަން ކަށަވަރު ވެއްޖެ
މެލޭޝިއާގައި ދިވެއްސަކު ކޮވިޑް-19 އަށް ފައްސިވިކަން ކަށަވަރު ކުރެވިއްޖެ ކަމަށާއި އޭނާގެ ހާލު ރަނގަޅު ކަމަށް މެލޭޝިއާގައި ހުންނަ ދިވެހިރާއްޖޭގެ އެމްބަސީން ބުނެފިއެވެ.
ހައިކޮމިޝަނުން މިރޭ ބުނީ މެލޭޝިއާގެ ހެލްތު މިނިސްޓްރީން މިއަދު ނެރުނު ރިޕޯޓެއްގައި ދިވެއްސަކު ކޮވިޑަށް ޕޮޒިޓިވް ވެފައިވާ ކަމަށް އޮތުމުން ހައިކޮމިޝަނުން އެކަން ބަލާފައިވާ ކަމަށާއި އެގޮތުން މެލޭޝިއާގެ ކަމާބެހޭ އިދާރާތަކުން ވަނީ މިކަން ކަށަވަރުކޮށްދީފައިވާ ކަމަށެވެ.
"މެލޭޝިއާގެ ކަމާބެހޭ އިދާރާތަކުން ވަނީ މިކަން ކަށަވަރުކޮށްދެއްވާ، އޭނާގެ ހާލު ރަނގަޅު މައުލޫމާތު ދެއްވާފައި. ދުއާ އަކީ އޭނާ އަށް ފުރިހަމަ ސިއްހަރެއް މިންވަރު ކުރެއްވުން" ހައިކޮމިޝަނުން ބުންޏެވެ.
މެލޭޝިއާގެ އިތުރުން މީގެކުރިން އިނގިރޭސިވިލާތުން ވެސް ވަނީ ދިވެއްސަކު ކޮވިޑަށް ޕޮޒިޓިވް ވެފައެވެ.
މެލޭޝިޔާއިން މިހާތަނަށް 4،119 މީހަކު ކޮވިޑަށް ޕޮޒިޓިވް ވެފައިވެއެވެ. އަދި އޭގެތެރެއިން 65 މީހަކު މިހާތަނަށް ވަނީ އެގައުމުން މަރުވެފައެވެ. ކޮވިޑް19 އާއި ގުޅިގެން މެލޭޝިއާއިން ވަނީ އެގަމުގެ ލޮކްޑައުންގެ މުއްދަތު އިތުރު ކޮށްފައެވެ.
