ރިސޯޓް މުވައްޒިފުން އެހެން ރަށްތަކަށް ދިއުމުގެ ހުއްދަ ދީފި
ރިޒޯޓުތަކާއި ސަފާރީތަކުން އެހެން ރަށްރަށާއި ދެމެދު ދަތުރުކުރުމަށް އެޗްޕީއޭއިން ހުއްދަދީފިއެވެ.
މިގޮތަށް ހާމަކޮށްފައިވަނީ، ދިވެހި ރާއްޖޭގައި ފަތުރުވެރިން ރާއްޖެ އެތެރެވުމަށް ދޭ އޮންއެރައިވަލް ވިސާ މިދިޔަ މަހު 27 ވަނަ ދުވަހު ހުއްޓާލުމައި ގުޅިގެން ހާލަތަށް ބަލައި ރިޒޯޓްތަކާއި ސަފާރީތަކުން އެހެން ރަށްރަށާއި ދެމެދު ވަކި ގޮތެއް އަންގަންދެން ދަތުރުކުރުމަށް ހުއްދަދީފައިވާ ކަމަށް އެޗްޕީއޭއިން ނެރެފައިވާ އިޢުލާނެއްގައިވެއެވެ.
ރިޒޯޓްތަކުގައި އުޅޭ މީހުން މިހާރުވެސް ފައިބަނީ އޮންއެރައިވަލް ވިސާ ހުއްޓާލުމައި ގުޅިގެންް އެންމެ ފަހު ފަތުރުވެރިޔާ ރިޒޯޓުން ފުރާތާ 14 ދުވަސް ފަހުންނެވެ.
މިހާތަނަށް ރާއްޖެއިން ޖުމްލަ 19 މީހަކު ކޮވިޑް-19 އަށް ފައްސިވާއިރު މިބަލިން މިހާތަނަށް މުޅިން ރަނގަޅުވެފައިވާ 13 މީހުންނަކީ ބިދޭސީންނެވެ. ފައްސިވެފައިވާ 19 މީހުންގެ ތެރޭގައި ރާއްޖެއިން ފުރި ފަހުން ފައްސިވިކަން އެނގިފައިވާ އިޓަލީގެ ދެ ފަތުރު ވެރިން ހިމެނެއެވެ. އަދި މިހާރު ރާއްޖޭގައި ކޮވިޑް-19އަށް ފަރުވާ ދެމުންދަނީ އިނގިރޭސިވިލާތުން ރާއްޖެ އައި ފަހުން ފައްސިވި ހަތަރު ދިވެހިންނަށެވެ
