ފާޑުކިޔުންތައް އަމާޒުވުމާ ގުޅިގެން، މީޑިއާނެޓުން ޕީސް ޓީވީ ފެންނަ ގޮތް ހަދައިފި
ގިނަ ބައެއްގެ ފާޑުކިޔުންތައް އަމާޒުވުމަށްފަހު މީޑިއާނެޓުން އަލުން ޕީސްޓީވީ ފެންނަ ގޮތް ހަދައިފިއެވެ.
މީޑިއާ ނެޓާއި ހަވާލާދީ ރާއްޖޭގެ ބައެއް އޮންލައިން ނޫސްތަކުން ރިޕޯޓުކޮށްފައިވާ ގޮތުގައި ޓީވީ ނުފެނުނީ ސިގްނަލްއަށް ދިމާވި މައްސަލައަކުން ކަމަށާއި މިހާރު އެ ޗެނަލް ކުރިއެކޭ އެއްގޮތަށް ފެންނާނެ ކަަމަށެވެ. އަދި މީގެ ކުރިންވެސް އެހެން ޗެނަލްތަަކަށް ދިމާވި ސިގްނަލްތަކާ ގުޅިގެން ވެސް ބައެއް ޗެނަލްތައް މެދުކެނޑުނުކަން މީޑިއާ ނެޓުން ފާހަގަކޮށްފައިވެއެވެ.
ދުނިޔޭގައި ތިއްބެވި މަޝްހޫރު ދީނީ އިލްމުވެރިންގެ ތަފާތު ދަރުސްތަކާއި، ޕްރޮގްރާމްތައް ފޮނުވަމުންދާ "ޕީސް ޓީވީ" މީޑިއާ ނެޓުން ނެގުމާއި ގުޅިގެން ވަރަށް ގިނަ ބަޔަކު ވަނީ މީސްމީޑިއާގައި ކަންބޮޑުވުން ފާޅުކޮށްފައެވެ.
ސޯޝަލް މީޑިއާގައި ކަންބޮޑުވުން ފާޅުކުރި ބައެއް މީހުން ބުނީ "ޕީސްޓީވީ" ނުލިބޭތީ މީޑިއާ ނެޓްގެ ކޯލް ސެންޓަރަށް ގުޅުމުން އެ ޗެނަލް ދެއްކުން ހުއްޓާލީ އާންމުންގެ އެދުމުގެ މަތިން ކަމަށް ބުނެ ޖަވާބު ދީފައިވާ ކަމަށެވެ. އެގޮތުން މީޑިއާ ނެޓުން ކުރިއަށް ގެންދިޔަ ހިޔާލު ހޯދުމެއްގައި "ޕީސް ޓީވީ" ބަލަން ބޭނުން ނުވާ ކަމަށާ އަދި އެ ޗެނަލް މީޑިއާ ނެޓްގެ ޗެނަލްތަކުގެ ލިސްޓުން ނަގަން ގިނަ ބަޔަކު އެދިފައިވާ ކަމަށް ޖަވާބުދިން ފަރާތުން ބުނެފައިވާ ކަމަށް ބައެއް މީހުން ވަނީ ބުނެފަ އެވެ.
ނަމަވެސް އެކަމާ ގުޅިގެން މީޑިއާ ނެޓުން ރަސްމީކޮށް އެއްޗެއް ބުނެފައެއް ނުވެއެވެ.
އިންޑިއާއިން ބޮޑެތި ތުހުމަތުތަކެެއް ކުރަމުންދާ މަޝްހޫރު ދީނީ އިލްމުވެރިޔާ ޑރ. ޒާކިރު ނައިކް އިސްކޮށް ހުންނަވާ ހިންގަމުންދާ ޕީސް ޓީވީ އިންޑިއާ އާއި ބަންގްލަދޭޝް ގައި ދެއްކުން ވަނީ މަނާކޮށްފައެވެ.
