އެސްއީޒެޑްތަކުގައި ޓައުންޝިޕް ތަރައްގީކުރެވޭ ގޮތަށް ފާސްކުރި ބިލު ތަސްދީގުކޮށްފި
އިގުތިސާދީ ހާއްސަ ސަރަހައްދުތައް ނުވަތަ އެސްއީޒެޑްތަކުގައި ޓައުންޝިޕް ތަރައްގީކުރެވޭ ގޮތަށް ރައްޔިތުންގެ މަޖިލީހުން ފާސްކުރި ބިލު ރައީސް ޑރ. މުހައްމަދު މުއިއްޒު މިއަދު ތަސްދީގުކުރައްވައިފި އެވެ.
ސްޕެޝަލް އިކޮނޮމިކް ޒޯނުގެ ގާނޫނަށް އިސްލާހު ގެންނަން ހުށަހެޅި އެ ބިލު މަޖިލީހުން ފާސްކުރީ މިދިޔަ ބުދަ ދުވަހު އެވެ.
އަދި ރައީސް މުއިއްޒު މިއަދު އެ ބިލު ތަސްދީގުކުރެއްވުމާއެކު އެ ބިލު ގާނޫނަކަށްވެ މިހާރު ވަނީ އަމަލުވެސް ކުރަން ފަށައިފައެވެ.
އަދި ގާނޫނުގައި މިހާރު ވަނީ ސަސްޓެއިނަބަލް ޓައުންޝިޕްގެ ގޮތުގައި ސްޕެޝަލް އިކޮނޮމިކް ޒޯން ކަނޑައެޅުމަށް މަގުފަހިކުރުމަށް ޓަކައި، އެ ޒޯނާގުޅޭ ޝަރުތުތަކާއި އުސޫލުތައް ބަޔާންކޮށްފަ އެވެ.
އެގޮތުން ސަސްޓެއިނަބަލް ޓައުންޝިޕް ތަރައްގީކުރުމުގެ ހާއްސަ ޝަރުތުތަކުގެ ތެރޭގައި، ޒޯނުގައި ކުރާ އިންވެސްޓްމަންޓަކީ 500,000,000 މިލިޔަން އެމެރިކާ ޑޮލަރަށްވުރެ ކުޑަނޫން އަދަދެއްގެ އިންވެސްޓްމަންޓަކަށް ވާންޖެހޭކަމަށް ގާނޫނުގައި މިހާރު ވަނީ ހިމަނައިފަ އެވެ.
އަދި ލަގްޒަރީ ޓޫރިޒަމްގެ ތަފާތު ހިދުމަތްތައް ހިމެނޭހެން ތަރައްގީކުރެވޭ އިންޓަގްރޭޓަޑް ޓޫރިޒަމް ޑިވެލޮޕްމަންޓެއް ޒޯނުގައި ގާއިމުކުރުން ނުވަތަ ލަގްޒަރީ ޓޫރިޒަމްގެ ތަފާތު ހިދުމަތްތަކާއި ލަގްޒަރީ ރެސިޑެންޝަލް ފެސިލިޓީތައް ހިމެނޭހެން ތަރައްގީކުރެވޭ ލާޖް-ސްކޭލް ރިއަލް އެސްޓޭޓް ޑިވެލޮޕްމަންޓެއް ޒޯނުގައި ގާއިމުކުރުން ވެސް ހިމަނާފައި ވެއެވެ.
އޭގެ އިތުރުން، އެފަދަ ޒޯނުގައި ހަކަތަ އުފެއްދުމަށާއި ކުނި މެނޭޖްކުރުމަށް ގާއިމުކުރެވޭ އިންފްރާސްޓްރަކްޗާ އާއި ވަސީލަތްތަކަކީ ސެލްފް-ސަފިޝެންޓް އިންފްރާސްޓްރަކްޗާ އަދި ވަސީލަތްތަކެއް ކަމުގައިވުމާއެކު، ޒޯން ހިންގުމަށް ބޭނުންކުރާ ހަކަތައިގެ މަދުވެގެން 60 ޕަސެންޓްއަކީ އިއާދަކުކުރަނިވި ހަކަތައަށް ވާންވާނެކަމަށް ވެސް ވަނީ ބަޔާންކޮށްފައެވެ.
އެފަދަ ޒޯނެއްގައި ޑިވެލޮޕަރަށް ނުވަތަ އެފަދަ ޒޯނެއްގެ އިންވެސްޓަރުންނަށް ލިބިދެވޭ ހާއްސަ އިނާޔަތްތައް ވެސް ހިމަނާފައި ވެއެވެ.
