ކުއްޔަކާ ނުލައި 3 އަހަރު ދުވަހަށް ދަނޑުވެރިކަން ކުރަން ބިން ދޫކުރަނީ
ބިމުގެ ޖާގަ އޮތް ރަށްރަށުން އެއްވެސް ކުއްޔަކާ ނުލައި ދަނޑުވެރިކަން ކުރަން ބިން ދޫކުރަން ނިންމާފައިވާ ކަމަށް ފިޝަރީޒް މިނިސްޓަރު ޒަހާ ވަހީދު ވިދާޅުވެއްޖެ އެވެ.
މިރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މިނިސްޓަރު ޒަހާ ވިދާޅުވީ، ކޮވިޑް-19 އާ ގުޅިގެން ކާނަގެ ޔަގީންކަން ކަށަވަރު ކުރުމަށް ދަނޑިވެރިކަމަށް ސަމާލުކަން ދީގެން ސަރުކާރުން ތަފާތު މަސައްކަތްތައް ކުރަމުން ދާ ކަމަށެވެ.
މި މަސައްކަތުގެ ދަށުން ބިން ދޫކުރަން ހަމަޖެހިފައިވަނީ ތިން އަހަރުގެ މުއްދަތަކަށް ކަމަށް މިނިސްޓަރު ޒަހާ ވިދާޅުވި އެވެ.
ޒަހީ ވިދާޅުވީ ކައުންސިލާ ގުޅިގެން ރަށްރަށުގައި މިހާރު ދަނޑުވެރިކަމަށް ބިން ދޫކޮށްގެން ކުރާ މަސައްކަތުގެ ތެރޭގައި ބިން ނަގާ ފަރާތްތަކުން އެ ތަނުގައި ހައްދާ ތަކެތީގެ ތަފާސްހިސާބު ކައުންސިލްތައް މެދުވެރިކޮށް ފޯރުކޮށްދޭންޖެހޭ ކަމަށެވެ.
އަދި ރަށްރަށުން ބިންތައް ދޫކުރާނީ މިނިސްޓްރީން އެކުލަވާލާ ގައިޑްލައިނެއްގެ ތެރެއިން ކަމަށާއި އަދި ބިންތައް ދޫކުރާއިރު އެ ބިމުގައި ހައްދަން ބޭނުންވާ ބާވަތެއް ހާމަކޮށް ކައުންސިލާއެކު އެއްބަސްވުމެއް އެކުލަވާލަންޖެހޭނެ ކަމަށްވެސް ޒަހާ ވިދާޅުވިއެވެ.
"އަޅުގަނޑުމެން ބޭނުންވަނީ ނަތީޖާ ހާސިލުވާ ގޮތަށް މި މަސައްކަތް ކުރަން. ހަމައެކަނި ބިންތަކެއް ކަނޑާފައި ދިނުމެއް ނޫން. އެ ބިންތަކުން އަޅުގަނޑުމެންނަށް ކާނާގެ ޔަގީންކަން، ފުއްދުންތެރިކަން އިތުރުކުރުމަށްޓަކާ، މީހުން ދިރިއުޅޭ ރަށްރަށުން 25 އިންސައްތައާ ހިސާބަށް މި ކާނާ ނެރުން" ޒަހާ ވިދާޅުވިއެވެ.
މީގެއިތުރުން ބިންތައް ދޫކުރުމަށްފަހު އެ ތަންތަނުގައި ކާނާގެ ތަކެތި ހައްދާތޯ ބަލާނެ ކަމަށްވެސް ޒަހާ ވިދާޅުވިއެވެ.
