އަސާސީ ކާބޯތަކެތި ހުއްޓުމެއްނެތި ފޯރުކޮށްދޭނަން، ބަނޑަކަށް ނުޖެހޭނެ: ފައްޔާޒު
ކޮވިޑް-19އާ ގުޅިގެން އިގްތިސާދަށް ދިމާވެފައިވާ ލޮޅުމެއް އައި ނަމަވެސް އާންމުކޮށް ކާން ބޭނުންކުރާ ތަކެތި ހުއްޓުމެއްނެތި ފޯރޮކޮށްދޭނެ ކަމަށާއި ރައްޔިތުން ބަނޑަށް ޖެހުނަކަ ނުދޭނަން ކަމަށް އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވެއްޖެއެވެ.
މިރޭ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު ފައްޔާޒު ވިދާޅުވީ އަޅުގަނޑުމެން އާއްމުކޮށް ކައި އުޅޭ ކާބޯތަކެތި ކުރިޔަށް އޮތް އަހަރަށްވާ ސަޕްލައި ކުރަމުން ގެންދާނަނެ ކަމަށެވެ.
އަޅުގަނޑުމެން ޔަގީންކަން މި އަރުވަނީ ކާޑަށް، އަސާސީ ކާބޯތަކެއްޗަކަށް ޖެހުނަކަށް ނުދޭނަން، އެހެންނަމަވެސް ސްޓްރޯބެރީ ނުހުރެދާނެ. އެއީކީ އަޅުގަނޑު ބަލާނެވެސް އެއްޗެއް ނޫން. އަޅުގަނޑުމެން މިބަލަނީ އެންމެ އަސާސީކޮށް ކައިގެން ބޮއިގެން ތިބެވޭނެ ވަރު ގެރެންޓީ ކުރުން." ފައްޔާޒު ވިދާޅުވިއެވެ.
އޭނާ ވިދާޅުވީ ދުނިޔެ ބަނޑަށް ޖެހިއްޖިއްޔާ ރާއްޖެވެސް އެ ހާލަތަށް ހިނގައިދާނެ ކަމަށާއި ނަމަވެސް މިހާރު މިއޮތް ހާލަތަކީ އެފަދަ ހާލަތެއް ކަމަށް ގަބޫލު ނުކުރައްވާ ކަމަށް މިނިސްޓަރު ފައްޔާޒު ވިދާޅުވިއެވެ. މިއަދު ދުނިޔެއަށް ކުރިމަތިވެފައި މިވާ ހާލަތަކީ ވަގުތީ ހާލަތެއްގެ ގޮތުގައި ދުނިޔޭގެ ހުރިހާ ގައުމަކުން ވެސް ބަލަމުން އަންނަ ކަމަށާއި އެހެންކަމުން މި ހާލަތަކީ ރާއްޖެ "ބަނޑަށް" ޖެހޭނެ ފަދަ ހާލަތެއް ނޫން ކަމަށް އެމަނިކުފާނު ތަކުރާރު ކުރެއްވިއެވެ.
މިނިސްޓަރު ފައްޔާޒު ވިދާޅުވީ ރާއްޖޭގެ އިގްތިސޯދު ހަލާކު މީހުން ކާނެ ބޯނެ ގޮތެއް ނެތިއްޖެ ހާލަތަކަށް ގޮސްފި ނަމަ ދައުލަތުން އެކަން ވެސް ރައްޔިތުންނަށް ހަމަޖައްސައިދޭނެ ކަމަށެވެ. އޭގެ މާނައަކީ ކޮންމެ ގެއަކަށް ހަނޑޫ ބަސްތާއެއް ގެންދިއުން ނޫން ކަމަށާއި އެހެންނަމަވެސް އިގްތިސޯދު ހަލާކު މީހުން ކާނެ ބޯނެ ގޮތެއް ނެތިއްޖެ ހާލަތެއްގައި އެހެން ގައުމުތަކުންވެސް ކަންކުރާ ބީދައިން ބޮޑެތި ކެއުންތައް ކެއްކުމަށްފަހު ރައްޔިތުންނަށް ސަރުކާރުން ދޭނެ ކަމަށް މިނިސްޓަރު ފައްޔާޒު ވިދާޅުވިއެވެ.
