އަރަބިއްޔާ ކުރިން ހުރި އިމާރާތް ތަޅާލައި ޕާކިންއާއެކު ކޮމިއުނިޓީ ޕާކެއް ތަރައްގީކުރަނީ
އަރަބިއްޔާ ކުރިން ހުރި އިމާރާތް ތަޅާލައި ޕާކިންއާއެކު ކޮމިއުނިޓީ ޕާކެއް ތަރައްގީކުރަން ނިންމާފައިވާ ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.
ދެހާސް ތޭރަވަނަ އަހަރު ޗަންދަނީ މަގުގައި ހުޅުވި އަރަބިއްޔާ ސްކޫލުގެ އިމާރާތުގައި ރެނދުލުމާ ގުޅިގެން ކިޔަވައިދިނުން ރައްކާތެރި ނޫން ކަމަށް ކަނޑައަޅައި އެ އިމާރާތް ހުސްކުރީ 2021 ވަނަ އަހަރު އެވެ. އަދި އޭގެ ފަހުން އެ ސްކޫލުގެ ކިޔެވުން ފޮރިން މިނިސްޓްރީ ވަގުތީ ގޮތުން ކުރިން ހިންގި އިމާރާތަށްވެސް ބަދަލުކުރި އެވެ.
ރައީސް މުއިއްޒު މައްޗަށް ގޮޅީގެ ރައްޔިތުންނާ ބައްދަލުކުރައްވައި މިރޭ ވިދާޅުވީ އަރަބިއްޔާ ކުރިން ޗާންދަނީ މަހުގައި ހިންގި އިމާރާތް ތަޅާލަން ޕަބްލިކް ވޯކްސްއިން މިހާރު ރައްޔާރުވަމުންދާ ކަމަށެވެ.
އަދި އެ ތަން ތަޅާލުމަށް ފަހު މައިގަނޑު ދެ ގޮތަކަށް އެ ސަރަހައްދު ބޭނުންކުރަން ނިންމާފައިވާ ކަމަށް ވެސް ރައީސް ވިދާޅުވި އެވެ.
"އެ މުޅި ބިމަކީ، ގޯއްޗަކީ 11،000 އަކަފޫޓުގެ ގޯއްޗެއް، އެތަނުގައި އެންމެ ފުޅާކޮށް ނުވަތަ ބޮޑު ސަރަހައްދެއް ޕާކިންއަށް ސައިކަލ ފަދަ ޕާކިންއަށް ބޭނުން ކުރެވޭނެ ގޮތަށް ކަނޑައެޅުމުގެ އިތުރަށް، ޕާކެއް، ކުޑަކުދިންނަށް ނޫނިއްޔާ ސްކޫލްތަކަށް އަންނަ ކުދިންނަށް ބެލެނެވެރިންނަށް ވެސް ބޭނުންކޮށްލެވޭ ކަހަލަ، މަޑުކޮށްލެވޭ ކަހަލަ ކޮންސެޕްޓެއްގައި ބޭނުން ކޮށްލެވޭ ކަހަަލަ ގޮތަކަށް ގްރީން ސްޕޭސްއެއް ތަރައްގީ ކުރުން، ޕާކިން އާއި ކޮމިއުނިޓީ ޕާކަކަށް، ބޭނުން ކުރެވޭ ކަހަލަ ގޮތަކަށް ދެ ލެވެލްއަކަށް އަންނަ ކަހަލަ ތަރައްގީގެ މަޝްރޫއެއް ހިންގަން،". ރައީސް ވިދާޅުވިއެވެ.
ރައީސް ވިދާޅުވީ އެތަން ތަރައްގީކުރާން ރައްޔިތުންނަށް ހިޔާލު ހުށަހެޅޭނެ ކަމަށާއި އަދި އެ ހިޔާލުތަކާ އެއްގޮތަށް ތަރައްގީކުރަން ސަރުކާރުން އޮތީ ތައްޔާރަށް ކަމަށް ވެސް ރައީސް ވިދާޅުވި އެވެ.
"އަޅުގަނޑު މިހާރު ބޭނުންވަނީ ވަރަށް ބާރު ސްޕީޑުގައި އެ މަސައްކަތް ކުރިއަށް ގެންދަން. ގެންގޮސް މި އަންނަ ރަމަޝާން މަސް އަންނަންވާ އިރަށް އެ ތަން ނިންމާލެވޭތޯ ބަލަން" ރައީސް ވިދާޅުވި އެވެ.
