ދުވާލަކު އަންހެނަކު ދެކެ ހަގީގީ ލޯބިވަނީ ކޮން ފިރިހެނުންނެއް؟
ލޯތްބަކީ ފާޑެއްގެ އެއްޗެކޭ މީހުން ބުނެ އުޅޭ އަޑު ވަރަށް އަހަމެވެ. އެހެންނަމަވެސް މިއަދާއި ހަމައަށްވެސް ލޯތްބަކީ ކޯއްޗެއް ކަން އަހަރެންނަށް ނުވިސްނުނެވެ. ބައެއް މީހުން ލޯބީގައި ޖެހި މުޅި ދިރިއުޅުން ހަލާކުކޮށްލާ ތަން މި ދެލޮލުން ދެކެ އަތުން ހިފީމެވެ. ބައެއް މީހުން ލޯބިވެރިޔާ އަށް ހަރަދުކޮށް ކޮށް ބަނގުރޫޓް ވެގެން ދިޔަ ތަން ވެސް ދުށީމެވެ. އެކަމަކު އަހަރެންނަށް މިހާރު ފެންނަނީ މުޅިން އެހެން މަންޒަރެކެވެ. ގިނައިން މިކަން ފެންނަނީ ގިނަ ފިރިހެނުންގެ ކިބައިންނެވެ. އަހަރެން ކުރިން ހީކުރީ ލޯތްބަކީ އެކަކު ދެކެ ވެވޭ އެއްޗެއް ކަމަށެވެ. އެހެންނަމަވެސް ދުވާލަކު އަންހެނަކު ދެކެ ހަގީގީ ލޯބިވާ ފިރިހެނުން ފެނި އަހަރެން މިހުރީ މުޅިން ތަރި ބުރައިގެން ގޮސްފައެވެ.
ދިރިއުޅުމުގައި ދުވަސްތައް ވޭތުކުރަމުން ދާއިރު ކޮންމެ ދުވަހަކު ނުދަންނަ އެތައް ބަޔަކާ ދިމާވާނެއެވެ. ހިތްކިޔާ ރީތި ކުދިންނާއި ވެސް ދިމާވާނެއެވެ. މިހިސާބުން ހިތަށް އަރާ ސުވާލަކީ ދުވާލަކު އަންހެނަކު ދެކެ ލޯބިވުމަކީ އެހާ ފަސޭހާ ކަމެއް ބާވައެވެ. ކޮންމެ ދުވަހަކު އާ މީހުންނާއި ދިމާވާއިރު އެތަނުން ރީތިވާ އެންމެން ދެކެ ހަމަ ލޯބިވާން ޖެހޭބާއެވެ؟
މިގޮތަށް ދުވާލަކު އަންހެނަކު ދެކެ ނުވަތަ ހަފްތާއަކު އަންހެނަކު ދެކެ ލޯބިވާ ފިރިހެނުން އުޅެނީ ވަރަށް ވަފާތެރި މީހުންނަށް ވެގެންނެވެ. ފެންނަ ކޮންމެ އަންހެނަކު ދެކެ ހަގީގީ ލޯބިވާނެއެވެ. އޭނާއާއި އެކު އުމުރު ދުވަހު އުޅުމަށް ވައުދާއި އަހުދު ވާނެއެވެ. ދައްކާ ފޮނި ވާހަކަތަކުން ދެން ހީވަނީ އެހެން ކަމެއް ހެންނެވެ. ހީވަނީ އަންހެން ކުދިން މޮޔަކުރަން ޔުނިވަރސިޓީއަކުން ނުވަތަ ކޮލެޖަކުން ވަރަށް މޮޅަށް ކިޔަވާފައި ހުރި މީހެއް ހެންނެވެ. އަނެއްކާ އެގޮތަށް މެސެޖުކުރާ ނުވަތަ ވާހަކަ ދައްކާ އަންހެނުން ކައިރި ކިޔާނީ އެންމެ ވާހަކައެކެވެ.
މިއަދު ކިތަންމެ ވަރަކަށްވެސް ގިނަ އަންހެނުން ގެންގުޅެވިދާނެއެވެ. އެކަމަކު ހެޔޮ ވިސްނުން ލިބި ދިރިއުޅުމެއް ފެށުމަށް ރަނގަޅު ބައިވެރިއަކު ހޯދަން ފެށުމުން ދިމާވާނީ ހުސް ތިމާގެ ކުރީގެ ލޯބިވެރިންނާއިއެވެ. ނުވަތަ ތިމާ ލޯބީގައި ޖައްސާ ލަނޑު ދީފައި ހުރި އަންހެނެއްގެ އެކުވެރިޔަކާއެވެ.
Ads by STO
