މިއަދު ކޮވިޑް-19 އަށް ފައްސިވި މީހާއަށް ކުރިން އެއްވެސް އަލާމާތެއް ނުފެނޭ
މިއަދު ކޮވިޑް-19 އަށް ފައްސިވި މީހާ ޓެސްޓު ކުރީ އެއްވެސް އަލާމާތެއް ފެނިގެން ނޫން ކަމަށް ސަރުކާރުން ބުނެފިއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މީގެ ކުޑައިރުކޮޅެއް ކުރިން ބުނި ގޮތުގައި މި ބައްޔަށް ޕޮޒިޓިވްވި މީހާއަކީ އެރިޔަދޫ ކަރަންޓީނު ފެސިލިޓީގައި ކަރަންޓީނުކޮށްފައި ހުރި މީހެކެވެ. އެ މީހާއަކީ ފިލިޕީންސް އިން އެނބުރި ރާއްޖެއައި މީހެކެވެ.
މިރޭ ބޭއްވި ނޫސްވެރިންގެ ބައްދަލުވުމުގައި އައިޖީއެމްއެޗްގެ ޑޮކްޓަރު މޫސާ މުރާދު ވިދާޅުވީ އެ މީހާ ފައްސިވިކަން އެނގުނީ ކަރަންޓީނު ފެސިލިޓީން ދޫކޮށްލުމަށް ހެދި ޓެސްޓުގެ ނަތީޖާއިން ކަމަށެވެ. އަދި އޭނާ ޓެސްޓު ހެދި އިރުވެސް ބަލީގެ އެއްވެސް އަލާމާތެއް ފެންނަން ނެތް ކަމަށް ޑރ. ވިދާޅުވިއެވެ.
"އެ މީހާގެ ފަރާތުން އެއްވެސް އަލާމާތެއް ނުފެނޭ. ފެނުނު ނަމަ ކުރިން ޓެސްޓު ހަދާނެ. އޭނާ ޓެސްޓު ހެދީ ކަރަންޓީނުން ދޫކޮށްލާ އެންމެން ޓެސްޓު ހެދުމަށް އޮންނަ އުސޫލުގެ ދަށުން." ޑރ. މުރާދު ވިދާޅުވިއެވެ.
މިއަދު ބައްޔަށް ފައްސިވި މިމީހާއެކު މިހާތަނަށް ފަސް ދިވެއްސަކު މިވަނީ މި ބަލީގެ ޝިކާރައަކަށް ވެފައެވެ.
ރާއްޖެއިން ޖުމްލަ 20 މީހަކު ކޮވިޑް-19 އަށް ފައްސިވެފައިވާއިރު މީގެ ތެރެއިން 14 މީހަކު ބަލިން ރަނގަޅުވެ މިހާރު ވަނީ ދޫކޮށްލާފަ އެވެ.
