ރިޓަޔާޑް މީހުން މަގާމުތަކަށް އައްޔަނުކުރުމުން ރިޓަޔާޑް އެލަވަންސް ނުލިބޭ ގޮތް ހަދަނީ
ރިޓަޔާޑް މީހުން މަގާމުތަކަށް އައްޔަނުކުރުމުން ރިޓަޔާޑް އެލަވަންސް ނުލިބޭ ގޮތް ހަދަން ނިންމާފައިވާކަން ރައީސް ޑރ. މުހައްމަދު މުއިއްޒު މިރޭ އިއުލާންކުރައްވައިފި އެވެ.
މި ސަރުކާރުގައި ސަރުކާރުގެ ގިނަ ކުންފުނިތަކުގެ އެންމެ އިސްވެރިންނަށް ވަނީ ރިޓަޔާޑް ބޭފުޅުން އައްޔަނުކުރައްވައިފަ އެވެ. ބޮޑު މުސާރައެއް އެ ބޭފުޅުންނަށް ލިބޭ އިރު ރިޓަޔާޑް ފައިސާގެ ގޮތުގައި ވެސް ބޮޑު އަދަދެއް އެބޭފުޅުންނަށް ލިބޭތީ ގިނަ ބައެއްގެ ފާޑުކިއުން އޮންނަނީ އަމާޒުވެފަ އެވެ.
ނަމަވެސް ހުޅުމާލެ ފޭސް އެކެއްގެ ރައްޔިތުންނާ ބައްދަލުކުރައްވައި ރައީސް މުއިއްޒު މިއަދު ވިދާޅުވީ ރިޓަޔާޑް ބޭފުޅުންނަށް މަގާމުތައް އަރުވަނީ އެ ބޭފުޅުންގެ އަހުލާގަށާއި ހިންގުންތެރިކަމަށާއި އަދި ނަޒާހާތްތެރިކަމަށް ވެސް ބެލުމަށް ފަހު ކަމަށެވެ.
އެހެން ނަމަވެސް އެ ބޭފުޅުންނަށް ބޮޑެތި މަގާމުތައް ދިނުމަކީ ހަރަދުތައް ބޮޑުވާކަމެއްކަމަށް ހުދު ރައީސް ވެސް އެއްބަސްވެލެއްވި އެވެ.
އެހެންވެ ޑަބަލްކޮށް މުސާރަ ނަންގަވާ ގޮތަށް ބަދަލު ގެންނަން ނިންމަވާފައިވާ ކަމަށް ރައީސް ވިދާޅުވި އެވެ. އަދި އެކަން ބަދަލުކުރަން އަންގަވާފައިވާކަމަށް ވެސް ރައީސް ވިދާޅުވި އެވެ.
”އިލެކްޓެޑް މަޤާމަކަށް ނޫނީ އެޕޮއިންޓެޑް މަޤާމަކަށް އައިސްފި ނަމަ، އެއީ މިނިސްޓްރީއަކަށް ވިޔަސް، ކުންފުންޏަކަށް ވިޔަސް، އަދި އެހެން ދައުލަތުގެ މުއައްސަސާއަކަށް ކަމުގައިވިޔަސް، އެ މުއްދަތުގެ ތެރޭގަ [ރިޓަޔާޑް އެލަވަންސް] މެދުކެނޑޭނެ.“ރައީސް ވިދާޅުވި އެވެ.
