ސަމާލުވޭ: މަންތާ އެއާގެ ނަމުގައި އޮވުވާލައިގެން ފައިސާ ނަގާ މައްސަލައެއް
މަންތާ އެއާ އިން މާލެ އިން ގަމަށް ދަތުރު ކުރުމަށް ޓިކެޓު ވިއްކަމުންދާ ކަމަށް ބުނެ މީސް މީޑިއާގައި ފެތުރެނީ ދޮގު ހަބަރެއް ކަމަށް އެ އެއާލައިނުން ބުނެފިއެވެ.
މަންތާގެ ނަމުގައި މާލެ-ގަން އެއްކޮޅު ޓިކެޓު 2900 ރުފިޔާ އަށް ވިއްކާ ކަމަށް ބުނެ މީސް މީޑިއާގައި ދަނީ ސްކްރީން ޝޮޓްތަކެއް ދަތުރުވަމުންނެވެ. މިއީ މި ނާޒުކު ދަނޑިވަޅުގައި ކަން ކުރަން ޖެހޭ ގޮތް ކަމަށް ބުނެ ގިނަ ބަޔަކު ދަނީ އެ އެއާލައިނަށް ފާޑުކިޔަމުންނެވެ.
ނަމަވެސް މަންތާ އެއާއިން ބުނީ އެ އެއާލައިނުން މާލެއިން ގަމަށް ޝެޑިއުލް ދަތުރުތައް ނުކުރާ ކަމަށާއި ކުރަނީ ހާއްސަ ޗާޓަރު ފްލައިޓުތަކެއް ކަމަށެވެ. އަދި ޓިކެޓުގެ ރުފިޔާ ޓްރާންސްފާ ކުރަން ބުނެ ފޮނުވަމުންދަނީ އެ އެއާލައިނުގެ އެކައުންޓު ނަމްބަރެއް ވެސް ނޫން ކަމަށް ވަނީ ބުނެފައެވެ.
"މާލެއާ ގަމާ ދެމެދު އަޅުގަނޑުމެން ކުރާ ހާއްސަ ދަތުރުތަކަށް ސޭލްސް އެޖެންޓުން މެދުވެރިކޮށް ޓިކެޓެއް ނުވިއްކަން. ރަނގަޅު ސައްހަ މައުލޫމާތު ހޯއްދެވުމަށް އަޅުގަނޑުމެންގެ ޓީމާ ކޮންޓެކްޓު ކުރައްވާ." މަންތާ އެއާއިން ބުނެއެވެ.
މަންތާ އިން މިވަގުތު ޝެޑިއުލް ދަތުރުތައް ކުރަމުންދަނީ ދ. ކުޑަހުވަދޫ އަށާއި ބ. ދަރަވަންދޫ އަށެވެ.
