އަމާޒަކީ 3 މަސް ތެރޭ ރާއްޖެ ކޮވިޑް ފުރީ ގައުމަކަށް ހެދުން: އަލީ ވަހީދު
ސަރުކާރުގެ އަމާޒަކީ ކުރިއަށް އޮތް ތިން މަސް ތެރޭގައި ރާއްޖެ ކޮވިޑް-19 ފްރީ ގައުމަކަށް ހެދުން ކަމަށް ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެ އެވެ.
އޮންލައިންކޮށް މިއަދު ކުރިއަށް ގެންދިޔަ ރައްޔިތުން މަޖިލީހުގެ އިގްތިސާދީ ކޮމެޓީގައި ވާހަކަ ދައްކަވަމުން މިނިސްޓަރު އަލީ ވަހީދު ވިދާޅުވީ ކުރިއަށް އޮތް ތިން މަސް ތެރޭ ރާއްޖެއަކީ އޭސިޔާގެ ފުރަތަމަ ކޮވިޑް ފުރީ ގައުމަށް ﷲ އިރާދަކުރެއްވިއްޔާ ވާނެ ކަމަށާއި އެއަށްފަހު ރާއްޖޭގައި "ސޭފް ޓުއަރިޒަމް" ފެށުމުގެ މަސައްކަތް ފަށާނެ ކަމަށެވެ.
"ރާއްޖެއިން މިހާރު އަޅާފައިވާ ފިޔަވަޅުތައް ތަންފީޒުކޮށް ފަހަތަށް ފިޔަވަޅެއް ނޭޅިއްޖެ ނަމަ، ކުރިއަށް އޮތް ތިން މަސް ދުވަހުގެ ތެރޭގައި ދިވެހިންނަށް ހިންދެމިލުމަށް ފުރުސަތު ލިބިގެން ދާނެ، އެހިސާބުން ދެން އަޅުގަނޑުމެން ސޭފް ޓުއަރިޒަމެއް ނުވަތަ ރައްކާތެރި ޓުއަރިޒަމެއް ރާއްޖޭގައި ފެށުމަށްޓަކައި ކުރަން ޖެހޭ ދިރާސާތައް މިހާރު މިދަނީ ކުރަމުން،" މިނިސްޓަރު އަލީ ވިދާޅުވި އެވެ.
އަލީ ވަހީދު ވިދާޅުވީ ސަރުކާރުން އެންމެ މުހިންމުކަމެއް ދެނީ ރައްޔިތުންގެ ރައްކާތެރިކަމަށް ކަމަށެވެ. އަދި ކޮވިޑް-19ގެ ސަބަބުން ރާއްޖޭގެ އިގްތިސާދަށް އަންނަ ހީނަރުކަމުގެ ސަބަބުން ވިޔަފާރިވެރިން ވިޔަފާރިތައް "ފުނޑިގެން" ނުދާނެ ގޮތަށް ސަރުކާރުގެ ފިޔަވަޅުތައް ބަހައްޓަމުން އަންނަ ކަމަށް އޭނާ ފާހަގަ ކުރެއްވިއެވެ.
މިނިސްޓަރު ވިދާޅުވީ ކޮވިޑް-19އާ ގުޅިގެން ފަތުރުވެރިން އައުން މުޅިން ހުއްޓިފައިވީ ނަމަވެސް ހުރިހާ ކަމެއް ރަނގަޅަށް ގޮސްފި ނަމަ މިއަހަރުގެ ފަހު ކުއާޓާގައި ޓުއަރިސްޓުން ރާއްޖެ އަންނަން ފަށާނެ ކަމަށް އުންމީދު އެބަ އޮތް ކަމަށެވެ.
